YEZU kutelamaka sambu na kupema penepene na dibulu ya Samaria. Balongoki na yandi kwendaka kusumba madya na mbanza. Nkento mosi kwisaka kubaka masa. Yezu tubilaka yandi nde: ‘Pesa mono masa ya kunwa.’

Dyambu yango kuyitukisaka nkento yina mingi. Keti beno kezaba sambu na nki? Yau kele sambu Yezu kele Muyuda, mpi yandi kele muntu ya Samaria. Bayuda mingi vandaka kuzola ve bantu ya Samaria mpi bau vandaka zola ve kusolula ata fyoti ti bau! Kansi Yezu vandaka kuzola bantu ya mitindu yonso. Yandi tubaka na nkento nde: ‘Kana nge zabaka nani yai kelomba nge masa ya kunwa, nge muntu zolaka kulomba yandi masa yina, mpi yandi zolaka kupesa nge masa ya moyo.’

Nkento vutulaka nde: ‘Dibulu kele nda, mpi nge kele ve na kantini. Wapi nge zolaka kubaka masa yina ya moyo?’

Yezu tubaka dyaka nde: ‘Kana nge nwa masa ya dibulu yai, nge tawa dyaka kiwini. Kansi masa yina ya mono kepesaka kezingisaka mvula na mvula.’

Ebuna nkento tubaka nde: ‘Mfumu, pesa mono masa yina sambu mono kuwa dyaka nzala ya masa ve mpi mono vanda dyaka na mfunu ya kwisa kubaka masa awa ve.’

Nkento vandaka kuyindula nde Yezu tubilaka sambu na masa ya kyeleka, kansi yandi tubilaka kyeleka yina ketadila Nzambi na Kimfumu na yandi. Kyeleka yina kele bonso masa yina kepesaka luzingu. Yo lenda pesa muntu luzingu ya mvula na mvula.

Yezu tubilaka yandi nde: ‘Kwenda kubingila mono bakala na nge mpi beno kwisa awa.’

Nkento vutulaka nde: ‘Mono mekwelaka ve.’

Yezu tubaka nde: ‘Yau kele ya kyeleka. Nge vandaka ntete na babakala tanu mpi bakala ya nge kele na yandi ntangu yai kele ya nge ve.’

Nkento yitukaka sambu Yezu tubaka mambu ya kyeleka. Inki mutindu yandi zabaka mambu yina? Ya kyeleka, yau kele sambu Yezu tindamaka na Nzambi; na yau, Nzambi kuzabisaka yandi mambu yina. Na ntangu yina, balongoki na yandi vutukaka, mpi bau yitukaka na kumona nde Yezu vandaka kutuba ti nkento ya Samaria.

Nkenda yai kelonga beto inki? Yau kesonga beto nde Yezu vandaka muntu ya mbote sambu na bantu ya mpusu yonso. Yandi vandaka kabula ve bikanda. Beto mpi fwete vanda mutindu yina. Beto fwete yindula ve nde bantu yankaka kele mbi kaka sambu bau kele na mpusu ya nitu mosi buna. Yezu vandaka kuzola nde bantu yonso kukuma na nzayilu ya kyeleka yina kenataka na luzingu ya mvula na mvula. Beto mpi fwete zola kusadisa bantu na kulonguka kyeleka.