Beto yonso beto fwete pona, kana beto ta sadila Yehowa to beto ta sadila Satana ti bademo na yandi. Beto lenda sadila ve bo zole na mbala mosi. Yo kele kibeni mbote nde beto sadila Yehowa.

Mutindu beto me katuka kumona yo, bademo ke sepelaka kuniokula bantu mpi kukusa bo. Yehowa kele ve mpidina. Yandi ke zolaka bantu mutindu tata ke zolaka bana na yandi. Yandi Muntu Ke Pesaka “konso dikabu ya mbote mpi konso kado ya kukuka.” (Yakobo 1:17) Yandi ke pimisaka ve bantu konso kima ya mbote, ata kusala mpidina lenda lomba yandi mambu mingi.​—Baefezo 2:4-7.

Yindula mambu yina Yezu, Mwana ya Nzambi, salaka na ntoto. Yandi salaka nde bababa kutuba diaka mpi bifwa-meso kumona diaka. Yandi belulaka bantu ya maladi ya lepre mpi bikata. Yandi basisaka bademo na nitu ya bantu mpi belulaka maladi ya mitindu yonso. Na ngolo ya Nzambi, Yezu futumunaka nkutu bafwa.​—Matayo 9:32-35; 15:30, 31; Luka 7:11-15.

Na kisika ya kuta luvunu sambu na kukusa beto, Nzambi ke tubaka ntangu yonso kieleka. Yandi  ke kusaka ve ata muntu mosi.​—Kutanga 23:19.

Kaka mutindu nzo ya yuyu ke kangaka kiningi-ningi ngolo, boma ya kukonda mfunu mpi luvunu me kangaka bamilio ya bantu ya ngolo. Bo ke waka boma ya bafwa. Bo ke waka boma ya bademo. Bo ke waka boma nde bo ta loka bo mpi nde mambu ya mbi ta kumina bo. Bo ke waka boma ya bandoki mpi ya bankisi. Mambu ya bo ke ndimaka ya me simbama na luvunu ya Satana Diabulu mpi mambu ya bo ke salaka me kangaka bo ngolo. Bansadi ya Nzambi ke kangamaka ve ata fioti na mutambu yina mosi.

Yehowa kele ngolo mingi kuluta Satana. Kana nge sadila Yehowa, yandi ta tanina nge na ntwala ya bademo. (Yakobo 4:7) Bo lenda loka nge ve. Mu mbandu, na Nigéria, bandoki tatu ya nene zolaka kuloka Mbangi ya Yehowa mosi ya buyaka kukatuka na mbanza sambu na kufwa yandi. Ntangu bo monaka nde kindoki na bo me simba ve, ndoki mosi na kati na bo kumaka kuwa boma mingi. Yandi kwendaka na nzo ya Mbangi yina ya Yehowa mpi lombaka yandi pardo.

Kana bademo ke yangisa nge, nge lenda binga Yehowa na zina na yandi mpi yandi ta tanina nge. (Bingana 18:10) Kansi sambu Nzambi kutanina nge, nge fwete yambula bisalu yonso ya bampeve ya mbi mpi kuyambula kusambila bademo. Na Efezo na ntangu ya ntama, bantu yina vandaka kusambila  Nzambi salaka buna. Bo vukisaka mikanda na bo yonso ya mazi mpi bo yokaka yo tiya. (Bisalu 19:19, 20) Bubu yai, bansadi ya Nzambi fwete sala mpi kiteso mosi. Yambula kindoki, bankisi, bansinga sambu na “kuditanina,” mikanda ya mazi mpi konso kima yina kele ti kuwakana ti bisalu ya bampeve ya mbi.

Kana nge ke zola kusepedisa Nzambi, kuyambula lusambu ya  luvunu mpamba me fwana ve. Nge fwete bika mpi kusala mambu ya mbi. Nge fwete sala mambu ya lusambu ya kieleka. Biblia ke monisa mambu ya kusala:

Satana ti bademo kele ti bantu awa na ntoto ya ke longa mambu ya luvunu mpi ke sala mambu ya mbi. Kansi Yehowa mpi kele ti bantu. Bantu yango kele Bambangi ya Yehowa. (Yezaya 43:10) Na ntoto ya mvimba, bo kele bantu kuluta bamilio sambanu. Bo yonso ke salaka bikesa sambu na kusala mambu ya mbote mpi kulonga bantu kieleka. Na bansi mingi, nge lenda kutana ti bo na Nzo ya Kimfumu. Kuna bo ta yamba nge na kiese yonso.

Kisalu na bo kele ya kusadisa bantu na kusadila Nzambi. Bo ta longuka Biblia ti nge na nzo na nge. Bo ta sadisa nge na kuzaba inki mutindu nge lenda sambila Yehowa na mutindu ya mbote. Nge ta futa kima mosi ve. Bambangi ya Yehowa ke vandaka na kiese ya kulonga bantu kieleka sambu bo ke zolaka bo mpi bo ke zolaka Yehowa Nzambi.