DAVIDI tubaka bangogo yai sambu na kusikisa Abigaile yina kwisaka kukutana ti yandi. Inki pusaka Davidi na kusikisa yandi mpi mbandu ya Abigaile ke longa beto nki?

Davidi kutanaka ti Abigaile ntangu yandi tinaka ntotila Saule. Abigaile vandaka nkento ya Nabale, mvwama yina vandaka ti mameme mingi na bangumba, na sudi ya Yudea. Davidi ti bansadi na yandi vandaka kutanina bangungudi mpi mameme ya Nabale, bo vandaka bonso “kibaka ya lutaninu” sambu na bo. Na nima, Davidi tindaka bansadi na yandi na kulomba Nabale ‘konso kima yina yandi lenda pesa bo.’ (1 Sam. 25:8, 15, 16) Yo vandaka ve mpasi nde Nabale kupesa Davidi bima sambu Davidi ti bansadi na yandi taninaka bima ya Nabale.

Kansi Nabale vandaka kusala mambu bonso zina na yandi, disongidila “Kilawu” to “Zoba.” Nabale vutulaka mvutu ya mbi, yandi fingaka Davidi mpi buyaka kusadisa Davidi. Yo yina, Davidi bakaka lukanu ya kupesa Nabale ti bantu ya nzo na yandi ndola sambu na mvutu ya mbi yina yandi pesaka mpi sambu na buzoba na yandi.—1 Sam. 25:2-13, 21, 22.

Ntangu Abigaile bakisaka mpasi ya ngolo yina Davidi zolaka kunatila dibuta na yandi, yandi salaka mambu na kikesa yonso. Na luzitu yonso, Abigaile yibusaka Davidi nde Davidi kele nsadi ya Yehowa. Abigaile natilaka Davidi, yina ta kuma ntotila, mpi bansadi na yandi madia. Davidi bakisaka nde Yehowa muntu tindaka Abigaile na kukanga yandi nzila ya kusala disumu. Davidi songaka Abigaile nde: “Bika Nzambi kusakumuna mabanza na nge ya mbote! Bika Nzambi kusakumuna nge sambu nge me kanga mono nzila bubu yai sambu mono kuma ve na mfuka ya menga.”—1 Sam. 25:18, 19, 23-35.

Beto fwete vanda ve ata fioti bonso Nabale, disongidila kukonda kumonisa ntonda na mambu ya mbote yina bantu ke sadilaka beto. Diaka, ntangu beto ke mona nde mambu ya mbi ke zola kusalama, beto fwete sala yonso sambu yo salama ve. Beto lenda tuba bonso muyimbi-bankunga, yina songaka Nzambi nde: “Longa mono mabanza ya mbote mpi nzayilu.”—Nk. 119:66.

Mambu ya beto ke sala lenda sadisa bantu na kubakisa nde beto kele mayele to beto kele ti mabanza ya mbote. Bonso Davidi, bo lenda tuba na ndinga ya ngolo to na nsi ya ntima nde: “Bika Nzambi kusakumuna mabanza na nge ya mbote!”