MARSI 3, 2020
BANSANGU YA NTOTO YA MVIMBA

Nsoba Sambu na Coronavirus mpi Mambu ya Kusala Sambu na Kuditanina

TALA NA

Nsoba Sambu na Coronavirus mpi Mambu ya Kusala Sambu na Kuditanina

Babiro ya Bambangi ya Yehowa ya ke twadisaka kisalu na ntoto ya mvimba ke landila konso kilumbu mambu ya me tala maladi yai ya bo ke binga Coronavirus mpi ya bantu mingi me zaba na zina ya COVID-19 sambu na kuzaba bisika yina yo me panzana. Mambu yina Biblia me tubaka na ntwala ke sadisa beto na kuzaba nde kipupa kele na kati ya mambu ya bilumbu ya nsuka. (Luka 21:11) Kana maladi mosi me panzana na bwala mosi, yo ke vandaka mbote na kubaka bangidika sambu na kuditanina mpi kutanina bantu ya nkaka.—Bingana 22:3.

Bampangi ya nkaka lenda kudiyula nde: Bampangi kele nki mutindu na bansi yina maladi yai me panzana? Maladi ya COVID-19 me pusa Babetele ya Italie, ya Japon, ya Corée du Sud mpi ya bansi ya nkaka na kusala bansoba yina kele mfunu. Na bansi ya nkaka, Betele me buya nde bantu kukwisa diaka kusala baviziti. Na bansi ya nkaka diaka, leta me buyisa bantu mingi na kuvukana kisika mosi. Diambu yina me sala nde Betele kubuyisa nde balukutakanu ya nziunga kusalama. Diaka, yo lombaka nde mabundu kusoba bangidika yina bo me bakaka sambu na kisalu ya kusamuna mpi balukutakanu ya dibundu. Ata mambu yai ya mpasi me kumina beto, bampangi na beto ke landa kupesana kikesa na kimpeve.—Yude 20, 21.

Na mambu yai, bampangi na beto me mona nde minsiku ya Biblia ya kele awa na nsi ke sadisa bo. Bandongisila yina lenda sadisa nge ti dibuta na beno kana na kisika yina beno ke zinga, maladi mosi buna me kota.

Kuwa Boma Ve. Yo kele mbote na kuzaba nde kipupa mosi buna me kota na bwala na beno mpi na kubaka bangidika ya mbote sambu na kuditanina. Kansi nge fwete wa boma ve.—Bingana 14:15; Yezaya 30:15.
Landa Bantuma Yina Leta Ke Pesa. Mbala mingi bamfumu ya kele na kisika yina nge ke zingaka ke tulaka bansiku sambu na kutanina bantu. Nge fwete lemfuka na bansiku yina leta ke baka mpi kuzitisa mambu yina bo ke tuba.—Baroma 13:1.
Landa Kuvanda Bunkete. Yo kele mfunu na kuyobisa maboko mbala na mbala ti savon mpi masa to na kusadila nkisi ya masa ya ke fwaka mikrobe na maboko mpi ya ke vandaka ti alkole (désinfectant pour les mains à base d’alcool). Beto fwete tula bunkete na bisika yina beto ke simbaka mbala na mbala na nzo na beto to na Nzo ya Kimfumu. Diaka, bantu ya mayele ya ke tadilaka mambu ya kimunganga ke buyisaka bantu na kupesana mbote na maboko kana maladi mosi me kota na bwala mosi buna, mpamba ve kupesana mbote na maboko lenda sala nde bantu ya nkaka kubaka mpi maladi yina. Sambu na Coronavirus, Kimvuka ya Ntoto ya Mvimba Yina Ke Talaka Mambu ya Sante (Organisation mondiale de la santé) me pesa bandongisila ya nkaka sambu na bisika yina bantu ke vandaka mingi.
Zola Bantu ya Nkaka. Beto yonso me zaba nde balukutakanu ya Bukristu mpi kudipesa na kisalu ya kusamuna kele mfunu, kansi kana nge ke bela, yo ta vanda mbote nde nge bikala na nzo sambu nge pesa ve bantu ya nkaka maladi. Kana nge sala mutindu yina, nge ta monisa nde nge ke zolaka bampangi na beto mpi nge ta tanina bo mpi bantu yina ke zingaka pene-pene ti nge, bayina kele ve Bambangi ya Yehowa.—Matayo 22:39.
Landa Bansoba ya Bo Ke Sala na Bangidika ya Dibundu. Na bansi yina maladi mosi me panzana, yo lenda vanda mfunu nde Betele kulomba nde balukutakanu ya dibundu, balukutakanu ya nziunga mpi balukutakanu ya nkaka ya sipesiali kusalama ve. Mambu me salama mutindu yina na babwala yina maladi ya COVID-19 me panzana mingi kibeni, mu mbandu na babwala ya nkaka ya Italie, ya Japon mpi ya Corée du Sud. Na kutadila mutindu mambu ke kwendila na babwala yina, bankuluntu lenda pesa bampangi nswa ya kulanda na banzo balukutakanu yina bo me kotisaka dezia ndinga. Bansamuni lenda sala kisalu ya kusamuna na nzila ya telefone, ya ba message, to bo lenda sonikila bantu mikanda.