N nase na un sidadi di Ungria, ki txoma Székesfehérvár. El é un sidadi antigu ki dja ten uns mil anu di stória. Má inda N ta lenbra di kes monti stragu ki Sugundu Géra na Mundu Interu faze na kel sidadi.

Kantu mi éra mininu, é nhas avó ki ta kuidaba di mi. N ta lenbra di es ku amor, prinsipalmenti di nha avó Elisabeth. El djuda-m ten un fé fórti na Deus. Kantu N tinha três anu, dja N ta fazeba orason di Pai-Nosso tudu dia di noti djuntu ku el. Má, N ben ntende kel orason li sô kantu N tinha kuazi 30 anu.

Nhas avó ta kuidaba di mi pamodi nha mai ku nha pai ta trabadjaba dia ku noti pa djunta dinheru pa kunpra un kaza. Má tudu sugundu sábadu di mês, nha família ta djuntaba pa kume djuntu. N gostaba txeu di kes momentu la.

Na anu 1958, nha mai ku nha pai alkansa ses sonhu: es konsigi kunpra un kaza. N fika txeu kontenti pamodi gósi nos três ta ba moraba tudu djuntu! Má nha alegria kaba faxi, pamodi 6 mês dipôs nha pai móre di kánser.

N fika tristi dimás. N ta lenbra ma N ora i N fla Deus: “N inplora nho pa nhu salva nha pai. N meste di el. Pamodi ki nhu ka obi nhas orason?” N tinha gana di sabe undi ki nha pai staba. N ta fikaba ta pergunta: ‘El bai pa Séu? Ô el dexa di izisti pa tudu ténpu?’ N tinha inveja di kes mininu ki tinha pai.

Duránti txeu anu, N ta baba simitériu kuazi tudu dia. N ta poba duedju na kóba di nha pai i N ta oraba: “Deus, favor, N krê sabe undi ki nha pai sta.” N ta oraba tanbê pa N ntende kal ki é obijetivu di vida.

Kantu N tinha 13 anu, N disidi prende alimon. N pensa ma na meiu di kes monti livru konxedu, ki skrebedu na alimon, N ta atxaba respósta pa nhas pergunta. Na anu 1967, N bai studa na un sidadi di Alimanha, ki txoma Iena. N ta leba livrus di kes filózofu alimon un tras di kel otu. Prinsipalmenti kes ki ta tentaba splika pamodi ki nu sta li. N atxa uns ideia interesanti, má ninhun di es ka konvense-m. Nton, N kontinua ta djobe respóstas.

Na anu 1970, N torna bai pa Ungria i la N konxe Rose, ki ben bira nha mudjer. Na kel ténpu, govérnu di Ungria éra kumunista. Nton, nu bai pa Áustria lógu dipôs ki nu kaza. I di la nu tinha planu di muda pa Sidnei na Austrália, undi ki nha tiu ta moraba.

N atxa trabadju faxi na Áustria. Un dia, un koléga di trabadju fla-m ma N ta atxaba respósta pa tudu nhas pergunta na Bíblia. El da-m alguns livru ku bazi na Bíblia. N lé kes livru uma faxi i N krê prendeba más. Nton, N skrebe pa Tistimunhas di Jeová ta pidi más livru.

Na kel dia ki nu faze un anu kazadu, un jóven di Áustria, ki éra Tistimunha di Jeová, vizita-nu na nos kaza. El traze-m kes livru ki N pidi i el oferese-m un studu di Bíblia, i N seta studa Bíblia. Dja ki N tinha gana di prende más, nu ta studaba dôs bês pa simana i nu ta studaba uns kuatu óra na kada studu!

N gosta dimás di kuzê ki Tistimunhas di Jeová staba ta inxina-m na Bíblia. Kantu es mostra-m na nha Bíblia ma nómi di Deus é Jeová, N fika spantadu. Duránti kes 27 anu ki N bai igreja, nunka N ka obiba ta fladu na nómi di Deus. N fika dimiradu ku respóstas klaru ki Bíblia ta da. Pur izénplu, N prende ma mortus ka sabe di nada, ma es sta sima na un sónu pizadu. (Eclesiastes 9:5, 10; João 11:11-15) Tanbê N prende sobri kel promésa ki sta na Bíblia sobri un mundu novu na undi ki ‘ka ta ten más mórti’. (Apocalipse 21:3, 4) N tene speransa di odja nha pai otu bês pamodi na kel mundu novu ‘ta ben ten resureison’. — Atos 24:15.

Rose kumesa ta studa Bíblia tanbê di tudu korason. Nu faze prugrésu faxi i déntu di dôs mês dja nu tirminaba di studa kel livru! Nu kumesa ta sisti tudu runion ki Tistimunhas di Jeová ta fazeba na Salon di Reinu. Nu fika txeu dimiradu di odja amor ku union ki es tinha i kel manera ki es ta djudaba kunpanheru. — João 13:34, 35.

Na anu 1976, mi ku Rose muda pa Austrália. Nu djobe Tistimunhas di Jeová lógu i es resebe-nu rei di dretu. Na anu 1978, nu bira Tistimunha di Jeová.

Ti ki enfin, N atxa respósta pa kes pergunta ki N djobe duránti txeu ténpu. Pamodi N bira más amigu di Deus, N atxa kel midjór Pai ki un algen pode ten. (Tiago 4:8) I N ta da txeu valor pa kel speransa ki N ten di torna odja nha pai otu bês na mundu novu. — João 5:28, 29.

Na anu 1989, mi ku Rose disidi torna volta pa Ungria, pa nu pâpia ku nos família, amigus i ku otus algen sobri nos krénsas. Nu tevi priviléjiu di inxina un monti di algen sobri Bíblia. Más di 70 di kes algen bira Tistimunha di Jeová i nha mai é un di es.

Duránti 17 anu, N ora ta pidi respósta pa nhas pergunta. Dja pasa 39 anu désdi ki N kumesa ta studa Bíblia. Inda N ta kontinua ta ora, má gósi N pode fla: “Obrigadu nha Pai ki N krê txeu, pamodi bu responde-m kes orason ki N ta fazeba désdi mininu.”