NA BÍBLIA nu ta lé sobri txeu ómi fiel ki tinha ‘sentimentus sima di nos’. (Tia. 5:17) Pur izénplu, nu pode ntende dretu kuzê ki Polu kria flaba na Romanos 7:21-24 : ‘Óras ki N krê faze kel ki é dretu, kel ki é mariadu ta sta na mi. Ómi mizeriadu ki mi é!’ Kes sentimentu di Polu li ta nkoraja-nu óras ki nu ten ki lida ku nos própi inperfeson.

Polu tanbê pâpia di otus sentimentu. Na Gálatas 2:20, el fla ku tudu sertéza: ‘Fidju di Deus ama-m i el ntrega se kabésa pa mi.’ É si tanbê ki nu ta xinti? Pode ser ki é ka tudu óra ki nu ta xinti si.

Si inda nu sta xinti kasábi i sen valor pamodi kuzas mariadu ki nu fazeba antis, pode ser difísil nu kridita ma Jeová ta ama-nu i ma el purdua-nu. Tanbê pode ser txeu difísil odja sakrifisiu ki Jizus faze pa nos sima un prezenti. Má Jizus krê pa nu odja resgati sima un prezenti? Kuzê ki pode djuda-nu pensa si? Nu ben odja.

Sin, Jizus krê pa nu odja resgati sima un prezenti pa nos. Modi ki nu pode ten kel sertéza li? Imajina kel situason ki nu ta atxa na Lucas 23:39-43. Un ómi sta pregadu na un staka di tortura na ladu di Jizus. El ta rekonhise ma el fazeba un kuza mariadu. Kel krimi ki el faze sô podia ser un kuza gravi, pamodi móre na un staka éra kastigu pa kes kriminozu ki ta fazeba krimis gravi. El sta txeu preokupadu ku se situason, ki el ta inplora Jizus: ‘Lenbra di mi óras ki bu entra na bu Reinu.’

Kuzê ki Jizus faze? Imajina dór ki Jizus xinti kantu el vira róstu pa kel kriminozu. Nbóra el sta kuazi ta móre, Jizus ta da un sorizu i el ta garanti-l: ‘Oji N ta fla-u ku tudu sertéza ma bu ta ben sta ku mi na Paraízu.’ Jizus podia sô lenbraba kel ómi ma ‘Fidju di Ómi ben pa da se vida pa resgata un monti di algen.’ (Mat. 20:28) Má Jizus ku bondadi, mostra modi ki se sakrifisiu ta djudaba kel ómi. Nu ta odja kel-li kantu Jizus uza kes pronómi ‘bu’ i ‘mi’. I Jizus pâpia di benson ki se sakrifisiu ta daba kel ómi, ki éra kel xansi di vive na un paraízu na Téra.

Di sertéza, Jizus kria pa kel ómi odjaba resgati sima un prezenti spesial pa el. É si ki Jizus xinti pa kel kriminozu ki nen ka tevi oportunidadi di sirbi Deus. Nton, imajina kuzê ki el ta xinti pa un kriston batizadu i ki ta sirbi Deus! Kuzê ki ta pô-nu ta kridita ma sakrifisiu di Jizus ta djuda-nu, sikrê antis nu fazeba kuzas mariadu?

Jizus da Polu un diziginason di prega. Kel-li djuda-l ntende ma Jizus móre pa el.  Di ki manera? El splika: ‘N ta agradise Kristu Jizus, nos Sinhor, ki da-m puder, pamodi el atxa ma mi é fiel i el skodje-m pa un trabadju, sikrê antis N ta papiaba mal di algen, N ta pirsigiba i N ta injuriaba algen.’ (1 Tim. 1:12-14) Polu resebe un trabadju, sikrê ku tudu kuza mariadu ki dja el fazeba. Kel-li konvense-l ma el purduadu, ma Jizus ta amaba el i ta kunfiaba na el. Jizus tanbê da-nu un diziginason di prega notísias sábi. (Mat. 28:19, 20) Kel-li pode djuda-nu ntende ma Jizus móre pa nos tanbê.

Albert, ki ka dura ki volta pa Jeová, dipôs ki el pasa uns 34 anu dizasosiadu, splika: “N ta lenbra sénpri di nhas pekadu. Má, óras ki N ta sta na pregason, N ta xinti sima apóstlu Polu. N ta xinti ma Jizus da-m un trabadju. Kel-li ta dexa-m más kontenti i ta djuda-m pensa dretu di nha kabésa, di nha vida i di nha futuru.” — Sal. 51:3.

Antis di Allan prende verdadi, el faze txeu krimi i el éra txeu violéntu. El fla: “Inda N ta pensa na tudu kes kuza mariadu ki N faze pa otus algen. Alvês kel-li ta dexa-m tristi. Má, N ta agradise Jeová pamodi el ta uza un pekador sima mi pa prega notísias sábi pa otus. Óras ki N ta odja pesoas ta reaji pa kes notísia sábi, kel-li ta lenbra-m di modi ki Jeová é bon i un Deus di amor. N ta xinti ma el ta uza-m pa djuda otus algen ki tanbê faze kuzas mariadu.”

Óras ki nu ta sta na pregason, nu ta konsentra na faze i na pensa kuzas dretu. Kel-li ta djuda-nu ten sertéza ma Jizus ten mizerikórdia, el ten amor i el ta kúnfia na nos.

Timenti nu sta vive na es mundu mau di Satanás ki sta ben ser distruídu, nos korason pode kontinua ta kondena-nu pamodi kes kuza mariadu ki nu fazeba antis. Kuzê ki ta djuda-nu luta kóntra kes sentimentu li?

Jean, alvês ta xinti kulpadu pamodi el ta lebaba un vida di mintira kantu el éra más nova. El fla: “N gosta txeu di kel testu ki ta fla ma ‘Deus é más grandi di ki nos korason’.” (1 João 3:19, 20 ) Nos tanbê, nu pode fika konsoladu di sabe ma Jeová ku Jizus ta ntende, midjór ki nos, ma nos é inperfetu. Ka bu skese ma es ka uza resgati pa umanus perfetu, má pa umanus pekador ki rapende. — 1 Tim. 1:15.

Bu korason pode fika kalmu ku kel verdadi li. Pur isu, midita ku orason na manera di Jizus trata umanus inperfetu i faze bu midjór pa bu kunpri kel trabadju ki el da-u. Si bu faze sima Polu, bu ta pode fla: Jizus ‘ama-m i el ntrega se kabésa pa mi.’