Mórti é un kuza ki ta traze txeu dór i sufrimentu. É pur isu ki Bíblia ta txoma mórti di inimigu. (1 Coríntios 15:26) Na lison 27, bu prende ma Jeová ta ben kaba ku es inimigu. Má, kuzê ki ta ben kontise ku kes algen ki dja móre? Na kel lison li, bu ta ben prende sobri un otu promésa bunitu ki Jeová faze: el ta ben da bilhons di algen vida otu bês pa es ben vive pa tudu ténpu. El ta ben resusita-s! Kel-li ta ben kontise mê? Es ta ben resusitadu pa vive na Séu ô na Téra?

1. Kuzê ki Jeová krê faze pa kes algen ki nu ta ama ki dja móre?

Jeová tene vontadi di traze kes algen ki dja móre pa vive otu bês. Un ómi fiel ki txomaba Jó, tinha sertéza ma Deus ka ta skeseba di el óras ki el moreba. El fla Deus: ‘Bu ta txoma-m i N ta responde-u di Sipultura.’ — Lé Jó 14:13-15.

2. Modi ki nu sabe ma kes algen ki dja móre pode ben resusitadu?

Kantu Jizus staba na Téra, Deus da-l puder pa el resusita pesoas. Jizus resusita un minina di 12 anu i fidju di un viúva. (Marcos 5:41, 42; Lucas 7:12-15) Dipôs, Lázaru ki éra amigu di Jizus móre. Nbóra Lázaru staba mortu i dja tinha kuatu dia ki el nteradu, Jizus resusita-l. Dipôs ki Jizus faze un orason pa Deus, el fla: ‘Lázaru, sai pa fóra!’ I ‘kel ómi ki staba mortu sai’. Lázaru staba bibu otu bês! (João 11:43, 44) Imajina modi ki família i amigus di Lázaru fika kontenti di odja-l!

3. Kal ki é speransa pa bus família i amigus ki dja móre?

Bíblia ta promete: ‘Ta ben ten resureison’. (Atos 24:15) Kes algen ki Jizus resusitaba kantu el staba na Téra ka bai pa Séu. (João 3:13) Es fika kontenti di vive otu bês li na Téra. Di mésmu manera, ka ta dura Jizus ta ben resusita bilhons di algen pa ben vive pa tudu ténpu na un paraízu na Téra. El fla ma ‘tudu kes ki sta na sipultura mimorial’ ta ben ser resusitadu. Kel-li krê fla ma tudu kes algen ki sta na mimória di Deus ta ben vive otu bês, ti mésmu kes algen ki talvês ka sta lenbradu di es más. — João 5:28, 29.

 SABE MÁS

4. Jizus prova ma el pode resusita mortus

Prende más sobri kuzê ki Jizus faze pa se amigu Lázaru. Lé João 11:14, 38-44, i dipôs pâpia sobri kes pergunta li:

• Modi ki nu sabe ma Lázaru staba mortu mê? — Odja versíklu 39.

• Si Lázaru staba na Séu, bu ta atxa ma Jizus ta traba el di la pa ben vive otu bês li na Téra?

Odja VÍDIU.

5. Txeu algen ta ben ser resusitadu!

Lé Salmo 37:29, i dipôs pâpia sobri kel pergunta li:

• Bilhons di algen ta ben ser resusitadu. Na undi ki es ta ben vive?

Jizus ka ta ben resusita sô kes algen ki adora Jeová. Má tanbê, el ta ben resusita otus algen. Lé Atos 24:15, i dipôs pâpia sobri kel pergunta li:

• Kenha ki bu ta gostaba di odja na resureison?

• Modi ki speransa di resureison konsola i nkoraja pai ku mai di Phelicity?

 REZUMU

Bíblia ta promete ma bilhons di kes algen ki dja móre ta ben resusitadu. Jeová tene vontadi pa es ben vive otu bês, i el da Jizus puder pa faze kel-la.

Perguntas di rezumu

• Modi ki nu sabe ma Jeová ku Jizus tene vontadi di resusita kes algen ki dja móre?

• Na undi ki kes bilhon di algen ki resusitadu ta ben vive? Na Séu ô na Téra? Pamodi ki bu ta responde si?

• Pamodi ki bu ten sertéza ma kes algen ki bu ta ama ta ben vive otu bês?