Tudu anu, na dia 14 di mês di nizan, judeus ta komemoraba Páskua. Páskua ta sirbiba pa lenbra-s modi ki Jeová tra-s di skravidon na Ijitu i leba-s pa téra ki el prometeba es. Na anu 33, Jizus ku se apóstlus komemora Páskua na un sala na un primeru andar di un kaza na Jiruzalen. Kantu es kaba di kume, Jizus fla: ‘Un di nhos ta ben trai-m.’ Apóstlus fika spantadu i es pergunta Jizus: ‘Kenha ki é kel algen li?’ Jizus fla: ‘É kel ómi ki N sta ben da pon.’ Nton el da Judas Iskariótis un padás di pon. Kel óra Judas labanta i sai di sala.

Nton Jizus faze un orason, el panha pon ki es tinha la, el parti-s i el da kes apóstlu ki fikaba ku el kada un di es un padás. Jizus fla-s: ‘Nhos kume kel pon li. El ta reprizenta nha korpu, ki N ta ben da pa nhos.’ Dipôs el faze orason pa un vinhu i el da se apóstlus. El fla-s: ‘Nhos bebe es vinhu. El ta reprizenta nha sangi, ki N ta ben da pa pekadus pode ser purduadu. N ta promete ma nhos ta bai ser rei djuntu ku mi na Séu. Nhos faze kel-li tudu anu pa nhos lenbra di mi.’ Sigidoris di Jizus tudu anu inda ta djunta na es dia pa faze kel ki Jizus manda. Kel runion gósi ta txomadu di Komemorason di mórti di Kristu.

 Dipôs ki es kume, apóstlus kumesa ta diskuti kal di es ki éra más inportanti. Má Jizus fla-s: ‘Algen ki é más grandi entri nhos é kel ki ta odja se kabésa kómu más pikinoti ô algen ménus inportanti.

‘Nhos é nhas amigu. N fla nhos tudu kuza ki nha Pai krê pa N fla nhos. Ka ta dura N ta bai atxa nha Pai ki sta na Séu. Nhos ta fika i gentis ta fika ta sabe ma nhos é nhas disiplu, pamodi amor ki nhos ten pa kunpanheru. Nhos debe ama kunpanheru sima N ama nhos.’

Na fin, Jizus ora ta pidi Jeová pa proteje tudu se disiplus. El pidi Jeová pa djuda-s trabadja djuntu, na pas. El ora pa nómi di Jeová ser santifikadu. Dipôs, Jizus ku se apóstlus kanta lovor pa Jeová i es sai di kel sala. Dja staba kuazi ta txiga óra di Jizus prendedu.