Tito 1:1-16
1 Nyie Vaulo, ngombo ya Ngai na mũtũmwa wa Yesũ Klĩsto kwosana na mũĩkĩĩo wa anyuve ma Ngai na ũmanyi wa w’o ĩũlũ wa ũla w’o na kwosana na kĩkĩo kya Ngai
2 na mũsingi waw’o nĩ wĩkwatyo wa thayũ wa tene na tene ũla Ngai wathanie kuma tene, nake ndatonya kũneena ũvũngũ;
3 ĩndĩ ĩvinda yake yĩla yaĩlĩte yavika nĩwamanyĩthanisye ndeto yake kwĩsĩla wĩa wa kũtavany’a ũvoo mũseo ũla nanengiwe na wosanĩte na mwĩao wa Ngai, Mũtangĩĩi waitũ;
4 kwa Tito, mwana wakwa wa w’o kwosana na mũĩkĩĩo ũla twĩ naw’o:
Ĩthĩwa na ũseo mwingĩ na mũuo kuma kwa Ngai, ũla nĩwe Asa, na kuma kwa Klĩsto Yesũ Mũtangĩĩi waitũ.
5 Nakũtiie Kilete nĩ kana ũlũnge maũndũ ala maaĩle kũlũngwa* na ũinyuva atumĩa kĩla ndũa, o tondũ nakwĩaĩe:
6 ethĩwa ve mũndũ o na wĩva ũtaweteka ũthũku, mũũme wa kĩveti kĩmwe, wĩ na syana mbĩtĩkĩli itawetanĩaw’a na mĩkwa na mbĩwi.
7 Nũndũ ethĩwa mũndũ nũnyuvĩtwe nĩ Ngai ethĩwe mũũngamĩi wa nyũmba, kana mũsyaĩĩsya, no nginya ethĩwe mũndũ ũtaweteka ũthũku, ũte wa mĩtavyo, ũtathataa mĩtũkĩ, ũte mũnywi,* ũte wa ithokoo, na ũtamanthaa na ĩtomo nzĩa sya kwĩyĩuna mwene,
8 mũndũ mũlau, wendete ũseo, wĩ na kĩlĩko kĩanĩu, mũlũngalu, mũĩkĩĩku, wĩsiĩĩaa,
9 ũlũmasya vyũ ĩla ndeto ya kũĩkĩĩka ũtũĩkanĩ wake wa kũmanyĩsya, nĩ kana ethĩwe atonya kũthangaasya angĩ kwa momanyĩsyo ala maseo* na kũmakany’a ala meũleana namo.
10 Nũndũ kwĩ andũ aingĩ mate ewi, maneenaa ndeto itatethya, na akengani, na mũno mũno ala malũmanasya na nzaĩko.
11 Nĩ ũndũ wa vata mavindĩthw’e, nũndũ andũ asu maendeeaa kwasya nyũmba nima kwa kũmanyĩsya maũndũ mataĩle kũmanyĩsya, maimantha nzĩa sya kwĩyĩuna mo ene.
12 Mwathani ũmwe woo aisye: “Akilete nĩ aneeni ma ũvũngũ mavinda onthe na nĩ nyamũ nthũku sya kĩthekanĩ, ayi matatethasya wĩa.”
13 Ũkũsĩ ũsu nĩ wa w’o. Na nũndũ wa kĩtumi kĩu endeea kũmakany’a kwa ũito nĩ kana methĩwe me alũmu* mũĩkĩĩonĩ,
14 mate kwĩthukĩĩsya mbano sya Ayuti na mĩao ya andũ ala matiĩte ũla w’o.
15 Syĩndũ syonthe nĩ ntheu kwa andũ ala atheu; ĩndĩ kwa ala avuku na mate na mũĩkĩĩo, vaiĩ kĩndũ kĩtheu, nũndũ wasya woo wa ngoo na ilĩko syoo nĩ mbuku.
16 Mawetaa ũtheinĩ kana nĩmamwĩsĩ Ngai, ĩndĩ mekonĩ moo nĩmamũkaĩaa, nũndũ mo nĩ andũ matesa kwendeka na mate ewi na matetĩkĩlĩka wĩanĩ mũseo o na wĩva.
