Maliko 10:1-52
-
Mũtwaano na kũthasya mũtwaano (1-12)
-
Yesũ aiathima syana (13-16)
-
Ĩkũlyo ya mũndũ mũthwii (17-25)
-
Kwĩyĩima maũndũ kwondũ wa Ũsumbĩ (26-31)
-
Kwathanwa ĩngĩ kwa kĩkw’ũ kya Yesũ (32-34)
-
Ũndũ Yakovo na Yoana mendaa (35-45)
-
Yesũ nĩ wovosyo kwondũ wa aingĩ (45)
-
-
Kũvow’a kwa Valitimeo ũla waĩ kĩlalinda (46-52)
10 Nĩwookĩlile auma vau na athi mĩvakanĩ ya Yutia, mũingo wa Yolotani, na ĩkomano yoombana ĩngĩ vala waĩ. Na o tondũ weekaa, ambĩĩa kũyĩmanyĩsya ĩngĩ.
2 Na Avalisi mooka vala ũĩ mayenda kũmũtata, na mamũkũlya kana nĩ ũndũ wosanĩte na mĩao mũndũũme kũthasya mũtwaano na kĩveti kyake.
3 Nake amasũngĩa: “Mose amwĩaĩe ata?”
4 Mamwĩa: “Mose nĩweetĩkĩlĩtye mũndũũme kũandĩkĩa kĩveti kyake valũa wa kũthasya mũtwaano na kũkĩlũngya.”
5 Ĩndĩ Yesũ amea: “Nũndũ wa wũmũ wa ngoo syenyu, nĩwamũandĩkĩie mwĩao ũsu.
6 Ĩndĩ kuma mwambĩlĩlyonĩ wa wũmbi, ‘Amombie mũndũũme na mũndũ mũka.
7 Nũndũ wa kĩtumi kĩu mũndũũme akatia ĩthe na inyia,
8 na me elĩ makeethĩwa mwĩĩ ũmwe,’ na kwoou mayĩthĩawa me elĩ ĩngĩ, ĩndĩ nĩ mwĩĩ ũmwe.
9 Kwoou kĩla Ngai ũlũmanĩtye vamwe, mũndũ ndakakĩtaanany’e.”
10 Na yĩla malikile ĩngĩ nyũmba, amanyĩw’a make mambĩĩa kũmũkũlya ĩũlũ wa ũndũ ũsu.
11 Nake amea: “Mũndũ o na wĩva ũla ũthaasya mũtwaano na kĩveti kyake na aitwaa kĩngĩ, ethĩawa aikĩvĩtĩsya kwa kwĩka ũlaalai,
12 na ethĩwa kĩveti nĩkyathasya mũtwaano na mũũme wakyo na kĩitwawa nĩ ũngĩ, kĩthĩawa kĩyĩka ũlaalai.”
13 Na andũ mambĩĩa kũmũetee syana nini nĩ kana aikwate na moko, ĩndĩ amanyĩw’a mamakany’a.
14 Yĩla Yesũ woonie ũu nĩwathatie, na amea: “Ekanai na syana nini syũke vala nĩĩ; mũikatate kũisiĩĩa, nũndũ Ũsumbĩ wa Ngai nĩ wa ala mailye tasyo.
15 Nĩ w’o nĩngũmwĩa, mũndũ o na wĩva ũla ũtawosaa Ũsumbĩ wa Ngai ta kana kanini, ndakalika nongi Ũsumbĩnĩ ũsu.”
16 Na oosa syana isu na ambĩĩa kũiathima na kũsilĩĩla moko make.
17 Na e nzĩanĩ aendete, mũndũ ũmwe ooka asembete atulya ndu mbee wake na amũkũlya: “Mũmanyĩsya mũseo, naĩle kwĩka ata nĩ kana nĩkwata thayũ wa tene na tene?”
18 Nake Yesũ amwĩa: “Nĩkĩ ũũmbĩta mũseo? Vaiĩ mũndũ mũseo eka o ũmwe, nake nĩ Ngai.
19 Nĩwĩsĩ mĩao ĩno: ‘Ndũkoae, ndũkalaalae, ndũkoye, ndũkaumye ũkũsĩ wa ũvũngũ, ndũkavenane na ũkengani, nenga ndaĩa ĩthe waku na inyia waku.’”
20 Mũndũ ũsu amwĩa: “Mũmanyĩsya, maũndũ asu onthe nambĩĩie kũmaatĩĩa kuma nĩ mũnini.”
21 Na Yesũ amũsisya, amwenda, na amwĩa: “Ve ũndũ ũtialĩtye: Enda ũkathoosye syĩndũ ila wĩ nasyo na ũinenga ngya, na ũkeethĩwa na ũthwii ĩtunĩ; na ĩndĩ ũyũka ũtw’ĩke mũatĩĩi wakwa.”
22 Ĩndĩ nĩwakwatiwe nĩ kĩmako yĩla wasũngĩiwe ũu na athi e na kyeva ngoonĩ, nũndũ aĩ na syĩndũ mbingĩ.
23 Na Yesũ asisya ngalĩko syonthe na amea amanyĩw’a make atĩĩ: “Ũkeethĩwa wĩ ũndũ wĩ vinya ta kĩ kwa ala me mbesa kũlika Ũsumbĩnĩ wa Ngai!”
24 Ĩndĩ amanyĩw’a maseng’a nũndũ wa ndeto syake. Nake Yesũ amea: “Syana, nĩ ũndũ wĩ vinya ta kĩ kũlika Ũsumbĩnĩ wa Ngai!
25 Nĩ ũndũ wĩ laisi kwa ngamĩle kũlikĩla kalimanĩ ka singano, kwĩ mũndũ mũthwii kũlika Ũsumbĩnĩ wa Ngai.”
26 Namo maseng’a mũno na mamũkũlya:* “Nũũ ũtonya kũtangĩĩwa?”
27 Yesũ amaketeea na asya: “Ũndũ ũũ ndũtonyeka kwa andũ, ĩndĩ ũu tiw’o vailye kwa Ngai, nũndũ maũndũ onthe nĩmatonyeka kwa Ngai.”
28 Nĩvo ĩndĩ Vetelo wambĩĩie kũmwĩa: “Sisya! Ithyĩ nĩtwatiie syĩndũ syonthe na twakũatĩĩa.”
29 Nake Yesũ asya: “Nĩ w’o nĩngũmwĩa, vaiĩ mũndũ waatia nyũmba kana ana-a-inyia kana eĩtu-a-inyia kana ĩthe kana inyia kana syana kana mĩũnda, kwondũ wakwa na kwondũ wa ũvoo mũseo,
30 ũtakakwata kũndũ 100 ĩvindanĩ yĩĩ—nyũmba, ana-a-inyia, eĩtu-a-inyia, aa-inyia, syana, mĩũnda, vamwe na mothĩny’o—na ĩvinda yĩla yũkĩte,* thayũ wa tene na tene.
31 Ĩndĩ aingĩ ala me mbee makeethĩwa ĩtina, na ala me ĩtina makeethĩwa mbee.”
32 Na me nzĩanĩ mambatĩte Yelusaleme, Yesũ aĩ mbee woo, na maseng’a, na ala mamaatĩĩe makwatwa nĩ wia. Na ĩngĩ ameta nzama ala Ĩkũmi na Elĩ na ambĩĩa kũmatavya maũndũ aa ala maĩ vakuvĩ kũmũkwata:
33 “Sisyai! Twambatĩte Yelusaleme na Mwana wa mũndũ akanenganwe mokonĩ ma anene ma athembi na aandĩki. Makamũsilĩla kũawa na maimũnengane kwa andũ ma mbaĩ ingĩ,
34 na asu makamũthekeea na maimũtw’ĩlanga mata na maimũvũa na maimũaa, ĩndĩ ĩtina wa mĩthenya ĩtatũ akathayũũka.”
35 Na Yakovo na Yoana, ana ma Sevetii, mooka vala waĩ na mamwĩa: “Mũmanyĩsya, twĩenda ũtwĩke ũndũ o na wĩva ũla tũũkũkũlya.”
36 Nake amakũlya: “Mwĩenda nĩmwĩke ata?”
37 Namo mamũsũngĩa: “Tũnenge mwanya twĩĩkala, ũmwe kw’okonĩ kwaku kwa aũme na ũla ũngĩ kw’okonĩ kwaku kwa aka ũtheunĩ waku mũtisu.”
38 Ĩndĩ Yesũ amea: “Mũyĩsĩ kĩla mũũvoya. Nĩmũtonya kũnyw’a kĩkombe kĩĩ ngũnyw’a, kana nĩmũtonya kũvatiswa ũvatiso ũũ ngũvatiswa?”
39 Namo mamwĩa: “Nĩtũtonya.” Nake Yesũ amea: “Kĩkombe kĩĩ ngũnyw’a, mũkanyw’a, na ũvatiso ũũ ngũvatiswa, mũkavatiswa.
40 Ĩndĩ kwĩkala kw’okonĩ kwakwa kwa aũme kana kw’okonĩ kwakwa kwa aka ti ĩũlũ wakwa kũnengane, ĩndĩ vakekala ala maseũvĩw’e.”
41 Yĩla ala angĩ ĩkũmi meewie ũndũ ũsu, mamathatĩa Yakovo na Yoana.
42 Ĩndĩ Yesũ ameta vala ũĩ, na amea: “Nĩmwĩsĩ kana ala matalawa ta masumbĩkĩte andũ ma mbaĩ ingĩ nĩmenenevasya, na ala me na ũkũmũ nĩmavinyĩĩaa ala angĩ.
43 Inyw’ĩ mũyaĩle kwĩthĩwa mũilye ũu; ĩndĩ mũndũ o na wĩva ũla ũkwenda kwĩthĩwa e mũnene katĩ wenyu aĩle kwĩthĩwa e mũthũkũmi wenyu,
44 na mũndũ o na wĩva ũla ũkwenda kwĩthĩwa e mbee katĩ wenyu aĩle kwĩthĩwa e ngombo ya onthe.
45 Nũndũ o na Mwana wa mũndũ ndaaũka kũthũkũmwa, ĩndĩ kũthũkũma na kũnengane thayũ wake wĩthĩwe wovosyo kwondũ wa aingĩ.”
46 Na mathi mavika Yeliko. Ĩndĩ we na amanyĩw’a make vamwe na ĩkomano ĩnene mayumaala Yeliko, Valitimeo (mwana wa Timeo), mũvoyi kĩlalinda, ailyĩ nthĩ ũtee wa nzĩa.
47 Yĩla weewie nĩ Yesũ Mũnasaleti, ambĩĩa kũneena na wasya mũnene, akyasya: “Mwana wa Ndaviti, Yesũ, mbĩw’ĩe tei!”
48 Yĩla aingĩ meewie ũu mambĩĩa kũmũkany’a makĩmwĩa akilye, ĩndĩ aendeea kũneena na wasya mũnene, akyasya: “Mwana wa Ndaviti, mbĩw’ĩe tei!”
49 Kwoou Yesũ aũngama na asya: “Mwĩtei oke vaa nĩĩ.” Na meeta mũndũ ũsu kĩlalinda, makĩmwĩa: “Ĩthĩwa na ũkũmbaũ! Ũkĩla; nũkũkwĩta.”
50 Nake ekya ngũa yake ya ĩũlũ, aũngama mĩtũkĩ, na athi vala ve Yesũ.
51 Na ĩndĩ Yesũ amũkũlya: “Wĩenda ngwĩke ata?” Na mũndũ ũsu kĩlalinda asya: “Lavoni,* eka nambĩĩe kwona ĩngĩ.”
52 Nake Yesũ amwĩa: “Enda. Mũĩkĩĩo waku nĩwakũvosya.” Na vau kwa vau ambĩĩa kwona ĩngĩ, na ambĩĩa kũatĩĩa Yesũ nzĩanĩ.
Maelesyo ma kwongeleela
^ Kana nĩvatonyeka, “makũlany’a.”
^ Sisya Maelesyo ma Ndeto.
^ Ũalyũlo wayo nĩ, “Mũmanyĩsya.”
