Yĩla ũkwenda kũmanya mũndũ, mbee ũmũkũlasya-ĩ, “Wĩtawa ata?” Nao ũkamũkũlya Ngai ũndũ we wĩtawa wĩona ta ũsũngĩa ata?

‘Ninyie Yeova, nĩyo syĩtwa yakwa.’​—Isaia 42:8.

Ngai nĩwonaa ĩsyĩtwa yake yĩ ya vata. Vai mũndũ waamũtwʼĩĩa Ngai ĩsyĩtwa, ĩndĩ nĩwe weenengie ĩsyĩtwa yĩu. Yeova aisye atĩĩ: “Yĩu nĩyo syĩtwa yakwa kũvika tene na tene, nayo nĩ ya kũndilikana kũvika nzyawa syonthe.” (Kuma 3:15) Mbivilianĩ, ĩsyĩtwa ya Ngai yonekaa mavinda maingĩ kũvĩtũka masyĩtwa make ma ũnene ta, Mwene Vinya Wʼonthe, Asa, Mwĩaĩi, kana Ngai. O na yonekaa mavinda maingĩ kũte masyĩtwa ma andũ ta Avalaamu, Mose, Ndaviti, kana Yesũ. Ũndũ wa vata nĩ kana nĩ wendi wa Yeova ĩsyĩtwa yake yĩmanyĩke. Mbivilia yaĩtye atĩĩ: “Nĩ kana mamanye no we wĩ weka, syĩtwa yaku nĩ Yeova, Nue Wĩ Ĩũlũ wa Onthe ĩũlũ wa nthĩ yonthe.”​—Savuli 83:18.

Yesũ nĩwoonaa ĩsyĩtwa ya Ngai yĩ ya vata. Nthĩnĩ wa ĩla mboya yĩsĩkĩe ta Mboya ya Mwĩaĩi, Yesũ amanyĩisye aatĩĩi make mamũvoyae Ngai matũmĩĩte ndeto: “Ĩsyĩtwa yaku yĩtaĩwe.” (Mathayo 6:9) O nake Yesũ mwene amũvoyie Ngai asya: “Asa, yĩkumye ĩsyĩtwa yaku.” (Yoana 12:28) Yesũ nĩwoonaa kũkumya ĩsyĩtwa ya Ngai wĩ ũndũ wa vata mũno thayũnĩ wake, na nĩkyo kĩtumi wawetie ndeto ii mboyanĩ yake: “Nĩnĩmamanyĩthĩtye ĩsyĩtwa yaku na ngaendeea kũtuma yĩmanyĩka.”​—Yoana 17:26.

Ala mamwĩsĩ Ngai nĩmonaa ĩsyĩtwa yake yĩ ya vata. Athũkũmi ma Ngai ma tene nĩmeesĩ kana kũsũvĩwa kwoo na kũtangĩĩwa kwoo nĩkwakonanĩtye na ĩsyĩtwa ya Ngai. Na ũu nĩwʼo nũndũ Mbivilia yaĩtye atĩĩ: “Syĩtwa ya Yeova nĩ mwako mũtũlu wa mũnyoolo, ũla mũlũngalu akĩĩaa vo, na nde na mũisyo.” (Nthimo 18:10) Mbivilia ĩsyokete ĩkasya atĩĩ:  “O ũla ũkekaĩla syĩtwa ya Yeova nũkatangĩĩwa.” (Yoeli 2:32) Mbivilia yonanĩtye kana ĩsyĩtwa ya Ngai nĩyĩvathũkanasya ala mamũthũkũmaa Ngai na ala matamũthũkũmaa. Yaĩtye atĩĩ: “Nũndũ ngo syonthe sya andũ iendaa kĩla ũmwe syĩtwanĩ ya ngai yake: na ithyĩ tũkaendaa syĩtwanĩ ya Yeova Ngai waitũ tene na tene.”​—Mika 4:5; Meko ma Atũmwa 15:14.

Ĩsyĩtwa yĩu yonanasya maũndũ ala Ngai ũtonya kwĩanĩsya. Asomi aingĩ maasya kana ĩsyĩtwa Yeova yonanasya “Nũtwʼĩkĩthasya.” Yĩla Yeova Ngai waneenaa na Mose nĩwamũeleisye kĩla ĩsyĩtwa yake yonanasya yĩla wamwĩie atĩĩ: “Ninyie Ũla Ninyie.” (Kuma 3:14) Kwoou, no twasye kana ĩsyĩtwa ya Ngai yonanasya maũndũ maingĩ eka o kwĩthĩwa e Mũmbi wa syĩndũ syonthe. Ĩsyĩtwa yake yonanasya kana e na ũtonyi wa kwĩthĩwa kĩla ũkwenda kũtwʼĩka, na nũtumaa syũmbe syake syĩthĩwa kĩla kĩkwendeka nĩ kana eanĩsye kĩeleelo kyake. O na kũtwʼĩka masyĩtwa ma ũnene ma Ngai no monanyʼe ũkũmũ wake, kana vinya wake, no ĩsyĩtwa yake mwene, nayo nĩ Yeova, yĩla yonanasya nesa we nũũ na maũndũ onthe ala ũtonya kwĩanĩsya.

Ĩsyĩtwa ya Ngai yonanasya kana nĩwendeeawʼa nithyĩ. Kũmanya ũndũ ĩsyĩtwa ya Ngai yonanasya nĩkũtũtetheeasya kũelewa kana nĩwendeeawʼa nĩ wũmbi wake wʼonthe, o vamwe na andũ. Ũndũ ũngĩ nĩ kana nũndũ Ngai nũtũmanyĩthĩtye ĩsyĩtwa yake nĩwendaa tũmũmanye. Kwoou ti ũndũ wa kũsengyʼa kũmanya kana nĩwe watũmanyĩthisye ĩsyĩtwa yake o na tũtaaĩsa kwenda kũyĩmanya. Ũndũ ũsu wonanasya kana Yeova nĩwendaa tũmanye e kwʼo na nĩtũtonya kũmũthengeea. Na ũũ nĩ kwonanyʼa kana we ti Ngai wĩ vaasa na tũtatonya kwĩthĩwa na ngwatanĩo ya vakuvĩ nake.​—Savuli 73:28.

Kũtũmĩa ĩsyĩtwa ya Ngai kwonanasya kana nĩtũmwendete. Kwa ngelekanyʼo, no ũtavye mũndũ ũkwenda atwʼĩke mũnyanyau akwĩtae ĩsyĩtwa yaku yĩla mũũneena. Ĩndĩ akalea kwĩka ũu, we wĩwʼa ata? Ĩtina wa ĩvinda nĩvatonyeka ũkambĩĩa kũsũanĩa kana mũndũ ũsu ndanendaa mũtwʼĩke anyanya. O ta ũu, Ngai nũtavĩtye andũ ĩsyĩtwa yake na nũtwĩkĩaa vinya tũyĩtũmĩae. Yĩla tweeka ũu twĩthĩawa tũyonyʼa Yeova kana nĩtũkwenda kũmũthengeea. Na vate nzika, Yeova nĩwendeeawʼa nĩ “ala malilikanaa syĩtwa yake.”​—Malaki 3:16.

Kũmanya ĩsyĩtwa ya Ngai nĩwʼo ũndũ wa mbee na wa vata vyũ twaĩle kwĩka nĩ kana tũmũmanye. Ĩndĩ ve maũndũ angĩ maingĩ twaĩle kũmanya. Nĩtwaĩle kwĩmanyĩsya mũnango ĩũlũ wa Ngai. Kwa ngelekanyʼo, nĩtwaĩle kũmanya nesa ũndũ Ngai ũilyĩ.