Neanĩie Alicante, Spain, taoni yĩ ũtee wa ũkanga ngalĩko ya wumĩlonĩ wa syũa. Andũ ma mũsyĩ witũ mayekalanasya nesa na kwoou natũmĩaa ĩvinda yingĩ ndyanganga sokonĩ. Vakuvĩ na vala nekalaa vaĩ nduka ya kũlia taili. Ndukanĩ ĩsu nĩvo namanyanĩie na José María, ũmwe wa ala mathũkũmaa vau. Aĩ mũnyanyawa mũseo, ũla watumaa nĩw’a nĩ mwĩanĩe kĩvathũkany’o na ũndũ neew’aa nĩ kwitũ. Nũndũ aĩ mũnyanyawa vyũ, eethĩawa ailyĩ ta mwana-a-inyia wakwa mavinda ala neethĩawa nĩkw’ĩte ngoo, o na kau aĩ mũkũũ mbee wakwa na myaka 20.

José María aĩ anambĩĩa kwĩmanyĩsya Mbivilia na Ngũsĩ sya Yeova. Nĩnoonaa endete Maandĩko na mavinda maingĩ nĩwandavasya ũw’o wa Mbivilia. Nĩnamwĩthukĩĩasya nesa vyũ, ĩndĩ ndyendeeaw’a nĩ maũndũ ala wandavasya. O na kau naĩ o wa mũika, neethĩawa nĩkwatene mũno. Ĩndĩ maũndũ nĩmaalyũkile o mĩtũkĩ.

Ndyendaa kũea ngewa mbingĩ ĩũlũ wa mũisyo ũsu wangwatĩie lelũnĩ. Ĩndĩ ndonya kwasya kana naĩ mũtumanu na ndyatwaĩte kamota kwa nzĩa ĩla yaĩlĩte. Thayũ wakwa waalyũkile vyũ na mũthenya ũmwe. Naĩ kĩmwana kĩ na vinya, ĩndĩ ĩveny’a na ĩsalukya naĩ mwonzu vyũ, nĩkomete sivitalĩ ndekũna ngi itho. Waĩ ũndũ wĩ vinya mũno kwĩtĩkĩlana na ũalyũku ũsu mũnene thayũnĩ wakwa. Ĩvinda yonthe nekalaa ndyĩkũlya-ĩ, ‘Yo ve vata wa kwĩthĩwa nĩ thayũ?’

José María nĩwookie kũnzisya, na o kwa mĩtũkĩ avanga Ngũsĩ sya Yeova kuma kĩkundinĩ kĩla kyaĩ vakuvĩ syũke kũmbona sivitalĩ. Kũnthokea kwoo nĩkwangiitie ngoo mũno. Naumw’a vala vasũvĩĩawa ala awau mũno (intensive care unit) nĩnambĩĩie kwĩmanyĩsya Mbivilia. Nĩnamanyie nĩkĩ andũ mathĩnaa na maikw’a, na nĩkĩ Ngai ũekaa maũndũ mathũku mekĩke. O na nĩneemanyĩisye ĩũlũ wa mawatho ma Ngai ma ĩvinda yũkĩte nthĩnĩ wa nthĩ ĩla ĩkausũwa nĩ andũ mate na naĩ vate ũmwe ũkwasya, “Nyie nĩ mũwau.” (Isaia 33:24) Nĩnambĩĩie kwĩthĩwa na wĩkwatyo mũseo thayũnĩ wakwa.

Naumw’a sivitalĩ, nĩnaendeeie kwĩmanyĩsya Mbivilia na kĩthito. O na nĩnaendaa maũmbanonĩ amwe ma Ngũsĩ sya Yeova na kũtavany’a vamwe namo ndũmĩĩte kĩvĩla kya ndĩa. Mwei wa 11, Matukũ 5, 1988, nĩ na myaka 20, nĩnavatisĩiwe kalaĩnĩ kanene ka kũthambĩa (bathtub). Yeova Ngai nũndetheesye kwĩthĩwa na woni mũseo ĩũlũ wa thayũ wakwa. Ĩndĩ naĩ ndonya kũtũnga mũvea ata?

Nĩnatw’ĩte vyũ kũlea kwĩtĩkĩlya wonzu wakwa ũnziĩĩe kũmũthũkũma Yeova ũndũ ndonya. Nĩnendaa kwĩka maendeeo. (1 Timotheo 4:15) Mbeenĩ, ũsu ndwaĩ ũndũ wĩ laisi kwakwa nũndũ andũ ma mũsyĩ mayaaendeew’a nĩ mũĩkĩĩo wakwa. Ĩndĩ naĩ na eĩtu-a-asa na ana-a-asa Aklĩsto. Nĩmandetheeasya mũno kũtavany’a na kĩthito na kũthi maũmbanonĩ onthe.

Ĩndĩ ĩtina wa ĩvinda, yaĩ no nginya nĩkale nĩ ungu wa ũsũvĩo wa mwanya kĩla ĩvinda. Ĩtina wa kũmantha kwa ĩvinda ĩasa, nĩnakwatie vandũ vaseo vasũvĩĩawa ala matetonya, taoninĩ ya Valencia, ĩla yĩ maili 100 (kĩlomita 160), ngalĩko ya ĩũlũ ya Alicante. Ũsu nĩw’o ũtũo wakwa.

O na kau ndyaĩ numa kĩtandanĩ, nĩnatw’ĩte kũendeea kũmũthũkũma Yeova. Nĩnathooie kombiũta na mbesa ila inengawe andũ ala matetonya. Kombiũta ĩsu yaiiwe vakuvĩ na kĩtanda kyakwa. O na nĩnathooie simũ wa kw’oko. Na kĩla kwakya, mũsũvĩi wakwa nĩwe wangwatĩasya kombiũta na simũ yakwa. Nĩ kana nĩtũmĩe kombiũta ĩsu, ndũmĩaa kamasinĩ (joystick) nĩtinaa na ngolu. O na ĩngĩ, nĩnĩthĩawa na kamũtĩ ka mwanya kala nĩkwataa na mũnuka. Kamũtĩ kau nĩkandetheeasya kũtina namba nthĩnĩ wa keyboard na simũnĩ.

Tekinolongyi ĩsu ĩndethetye ata? Ũndũ wa mbee, nĩndetheeasya kũlika Kĩsesenĩ kya jw.org na nthĩnĩ wa LIBRARY INDANETINĨ. Ũsu nĩ ũtethyo mũnene mũno! Mavinda maingĩ nĩnĩtũmĩaa ĩvinda ĩasa ndyĩmanyĩsya Mbivilia na ndyĩka ũkunĩkĩli ndũmĩĩte mavuku me na ũvoo kuma Mbivilianĩ, nĩ kana nĩendeee kwĩmanyĩsya maũndũ maingĩ ĩũlũ wa Ngai na nguma syake sya ũsengy’o. Na kĩla ĩvinda neew’a nĩkw’ĩte ngoo kana ndyenda kwĩthĩwa na mũndũ vakuvĩ, nĩngwataa ũndũ wa kũmbĩkĩa vinya nthĩnĩ wa Kĩsese kya jw.org.

Ũndũ wa kelĩ, nĩndũmĩaa kombiũta yakwa kwĩthukĩĩsya na kumya maelesyo maũmbanonĩ. Nĩnumasya maũvoo, ngavoya, na ngasoma ĩkaseti ya Mũsyaĩĩsya ĩla nanengwa kĩanda kĩu. O na kau nditonya kũvika maũmbanonĩ asu, nĩw’aa nĩ vamwe na kĩkundi kitũ.

Ũndũ wa katatũ nĩ kana nĩndũmĩaa simũ na kombiũta kũtavany’a. Kwa w’o nditonya kũtavany’a nyũmba na nyũmba, o tondũ Ngũsĩ sya Yeova mbingĩ syĩkaa, ĩndĩ ũu ndũnziĩaa kũtavany’a. Nĩndũmĩaa syĩndũ isu kũelesya andũ angĩ ĩũlũ wa mũĩkĩĩo wakwa. O na nĩndanĩaa mũno kũtavany’a ndũmĩĩte simũ, na kĩu nĩkyo kĩtumi atumĩa ma kĩkundi mangũlilye nĩvangĩthasye kambeini sya kũtavany’a na simũ. Mũno mũno kambeini isu nitetheesye atavany’a ma kĩkundi ala matatonya kuma mũsyĩ makatavany’e.

Ĩndĩ ũu ti kwasya kana tekinolongyi yoka nĩyo ĩndetheeasya. Kĩla mũthenya anyanyawa nĩmokaa kũmbona. Mokanasya na andũ moo ma mũsyĩ, na  andũ angĩ ala mendeeaw’a nĩ kwĩmanyĩsya Mbivilia. Mavinda maingĩ nĩmangũlasya ne inyie nĩneenany’e namo. Mavinda angĩ andũ ma mũsyĩ ũmwe nĩmanthokeaa na tũyĩthĩwa na ũthaithi woo wa mũsyĩ vamwe namo. Nĩw’aa mũyo mũno ĩla syana syekala kĩtandanĩ kyakwa na iindavya kĩla kĩtumaa imwenda Yeova.

Nĩnĩw’aa mũyo mũno nũndũ wa kwĩthĩwa na aeni aingĩ. Mavinda maingĩ lumu wakwa wĩthĩawa wusũĩte anyanyawa, amwe maumĩte kũndũ kũasa na angĩ o vakuvĩ. O tondũ ũtonya kwĩthĩwa ũisũanĩa, ũndũ ũsu nũsaanĩasya asũvĩi ma vala nĩthĩawa. Kĩla mũthenya nĩndũngĩaa Yeova mũvea nũndũ wa kũnenga ana-a-asa na eĩtu-a-asa Aklĩsto aseo.

Kĩla ĩvinda mũndũ angethya ayenda kũmanya ũndũ nĩendeee nĩmwĩaa atĩĩ: “Nĩ o vaa nĩendeee kũkita!” Vate nzika nĩnĩsĩ kana ti inyie nyioka nĩ na thĩna ta ũsu. O na ethĩwa twĩ na mathĩna mailyĩ ata, ũw’o nĩ kana Aklĩsto onthe mokitaa “kaũ ũla mũseo wa ũla mũĩkĩĩo.” (1 Timotheo 6:12) Nĩ kyaũ kĩndetheesye kũkita kaũ ũsu kwa ĩvinda ĩasa? Nĩvoyaa Yeova kĩla mũthenya na ndimũtũngĩa mũvea nũndũ wa kũndetheesya kũelewa vata wa thayũ. Nĩndataa ũndũ ndonya nĩthĩwe na maũndũ maingĩ ma kwĩka ndimũthũkũma Ngai, na nĩnĩsũanĩaa mũno ĩũlũ wa wĩkwatyo wa ĩvinda yũkĩte.

Mavinda maingĩ nĩnĩsũanĩaa ĩũlũ wa nthĩ nzaũ, na ũndũ ngatanĩa ĩngĩ kũsemba na kũtũlĩlanga. Mavinda amwe nĩmbũaa ngũĩ na José María, ũla wĩthĩawa awaĩte volio (polio), ĩũlũ wa ũndũ tũkasemba tũtianĩte. Nĩmũkũlasya-ĩ, “Nũũ ũla ũkasinda?” Nake anzũngĩaa ũũ: “Vai thĩna o na ethĩwa nũũ ũla ũkasinda, ĩndĩ ũndũ ũla wa vata nĩkwĩthĩwa Nthĩ Nzaũ nĩ kana twĩsemba.”

Ndwĩthĩĩtwe wĩ ũndũ wĩ laisi kwakwa kwĩtĩkĩla kana ndyĩtonya. Nĩnĩsĩ kana ĩla naĩ wa mũika, nĩneekie ũndũ wa ũtumanu, na watuma nĩlika thĩnanĩ mũnene. Ĩndĩ nĩndũngaa mũvea mũno nũndũ Yeova ndaandia. Nũnengete ana-a-asa na eĩtu-a-asa aingĩ, nũtumĩte nĩthĩwa na mea ma kwĩkala thayũ, nĩthĩwa na ũtanu nũndũ wa kũtetheesya andũ angĩ, na akanenga wĩkwatyo mũseo vyũ wa ĩvinda yũkĩte. Ngaelya kwĩwa nĩwete o kwa ũkuvĩ ĩũlũ wa ũndũ nĩw’aa, nasya Yeova nũnengete syĩndũ mbingĩ mbee wa ila nĩ na vata nasyo.