Hkap la ai. Chyum Laika buk ting gaw “Karai Kasang e shung ya” da ai laika re ai majaw akyu nga ai hpe Yehowa Sakse ni kamsham ai. (2 Timohti 3:​17) Dai hta, Ga Shaka Dingsa hte Ga Shaka Ningnan ngu shaga ai lahkawng yan lawm ai. Yehowa Sakse ni gaw dai Chyum Laika ni hpe, Hebre Chyum Laika Ni hte Hkristan Greek Chyum Laika Ni ngu nna shaga ai. Dai hku shaga ai a madung lam gaw, Chyum Laika a daw nkau mi gaw prat n dep mat sai, shing nrai, anhte hte n seng sai nga nna n byin mayu ai majaw re.

 Karai Kasang lam matsun ya ai hte kasa Pawlu ndai hku ka da ai: “Shawng e ka da ai lam shagu gaw, anhte hpe sharin achyin ya na matu, ka da nga sai.” (Roma 15:4) Dai majaw, Hebre Chyum ngu ai Ga Shaka Dingsa hta, anhte a matu akyu nga ai shiga ni lawm ai. Dai kaw ahkyak ai labau hte akyu nga ai hpaji jaw ga ni lawm ai.

•   Ahkyak Ai Labau. Ga Shaka Dingsa hta hpan da ai lam hte shinggyim masha ni yubak nga ai de gara hku du mat ai lam ahkri ahkrai ka da ai. Dai lam ni n nga yang, masha gara hku byin wa ai kun? anhte hpa majaw si ra ai kun? zawn re ai ga san ni a matu myit dik ai mahtai hpe lu la na n re. (Ningpawt 2:7, 17) Dai sha n-ga, ngwi pyaw lam hte manghkang ni hpe anhte zawn hkrum wa ai ni hpe Yehowa gara hku matut mahkai wa ai hpe mung Ga Shaka Dingsa hta madun da ai.​—Yaku 5:​17.

•   Akyu nga ai hpaji jaw ga. Ga Shaka Dingsa hta lawm ai Ga Shagawp hte Hpaji Ningli hta, galoi mung akyu jaw ai hpaji ga ni lawm ai. Ngwi pyaw ai dinghku lu la na lam (Ga Shagawp 15:17), kan bau bungli hte seng nna rap ra ai ningmu (Ga Shagawp 10:4; Hpaji 4:6) hte ramma prat hpe ngwi pyaw let gara hku hkawm sa na lam (Hpaji 11:9–​12:1) ni hpe dai Chyum Laika ni hta mu lu ai.

 Dai sha n-ga, Chyum Laika a shawng nnan laika buk manga (Torah) hta madun da ai Mawshe A Tara ni hpe hkaja ai kaw nna mung anhte akyu lu mai ai. Hkristan ni gaw Mawshe A Tara hpe hkan sa na matu n ra tim, ngwi pyaw ai aprat lu na matu manu dan ai hpaji jaw ga ni hpe dai Tara ni hta mu lu ai.​—Jaw Jau 19:18; Tara Jahprang 6:​5-7.