YESU gaw akyu hpyi ai hte seng nna, sharin achyin ya ya re ai. Shi a prat hta, Yuda nawku htung ningbaw ni gaw, “mare lam nshe ni hta tsap nga nna akyu hpyi” wa ma ai. Hpa majaw kun? “Masha ni shanhte hpe mu lu” na matu re. Yuda nawku htung hpe shanhte nawku kamsham ai lam a matu, shakawn hkrum mayu ai lam dan dawng nga ai. Law malawng gaw shanhte a akyu hpyi ga madat hkrum na matu “ga galu galang” tsun ra ai ngu nna, aten na na akyu hpyi ga ni hpe kahtap htap hpyi ma ai. (Mahte 6:5-8) Dai zawn galaw ai gaw kaman lila sha re ai lam, Yesu madun dan wa ai hku nna, myit dingman ai ni akyu hpyi ai shaloi, hpa hpe koi ra ai lam chye na matu karum ya wa ai. Raitim, gara hku akyu n mai hpyi ai hpe sha sharin ya wa ai gaw n re.

Karai a mying ningsang san seng chyoi pra na matu, Shi a Mungdan du wa na matu hte Shi a yaw shada lam hpring tsup wa na matu anhte ra sharawng ai lam, akyu hpyi ga ni hta shalawm ging ai hpe Yesu sharin ya wa ai. Tinang hte seng ai lam ni a matu mung karum hpyi mai ai lam Yesu sharin ya wa ai. (Mahte 6:​9-​13; Luka 11:​2-4) Akyu hpyi ga ni madat hkrum na matu, anhte hta shakut shaja ai lam, makam masham hte shagrit shanem ai lam ni ra ai lam, ga shadawn ni hpe akyu jashawn nna Yesu tsun dan wa ai. (Luka 11:5-13; 18:1-14) Kasi ningli ni madun ai hku nna, shi a sharin achyin ai lam hpe n-gun shajat ya wa ai.​—Mahte 14:23; Marku 1:​35.

Dai lam matsun gaw Yesu a sape ni a akyu hpyi ga hpe rawt jat hkra karum ya wa na re. Dai sha n-ga, Yesu gaw ginding aga prat na hpang jahtum shana she, akyu hpyi ai hte seng ai ahkyak ai lam hpe sharin ya wa ai.

Yesu gaw shi a ginding aga prat hpang jahtum shana a aten law malawng hpe sadi dung ai shi a sape ni hpe n-gun jaw ai hta lang wa ai. Dai shana gaw galai shai lam nnan ni hpe tsun dan na matu htap htuk ai aten re. “Lam gaw ngai rai nga nngai, tengman ai hte asak mung, ngai rai nga nngai: ngai hta nna n rai yang gaw, kadai mung nye Wa kaw n du wa lu ai” ngu na Yesu tsun wa ai. Dai hpang ndai n-gun lu hpa ga sadi hpe jaw wa ai: “Wa gaw Kasha a marang e hpung shingkang lu la hkra, nye a amying gang nna, nanhte hpyi mahpyi, ngai madat ya na nngai. Nanhte nye a amying gang nna, ngai kaw lama ma hpyi myit yang, hpyi ai hte maren ngai madat ya na nngai.” Shi tsun ai ga jahtum hta ndai hku tsun wa ai: “Ya du hkra nye a amying hta gang nna, nanhte hpa mung n hpyi yu myit dai: nanhte a kabu gara ai hpring tup wa hkra, lu la na matu, hpyi nga mu.”​—Yawhan 14:​6, 13, 14; 16:24.

Dai ga ni gaw grai ahkyak ai. Laika buk langai gaw dai hpe “akyu hpyi ai hte seng ai galai shai wa ai labau” ngu na tsun da ai. Karai Kasang hpe n re ai sha, shi hpe akyu hpyi ra ai ngu nna Yesu tsun mayu ai n re. De a malai, Yehowa Karai Kasang hte hkuhkau mai ai lam langai hpe tsun dan wa ai she re.

Karai Kasang gaw sadi dung ai shi a mayam ni a akyu hpyi ga hpe galoi mung madat ya ai. (1 Samuela 1:​9-​19; Shakawn 65:2) Raitim, Karai Kasang a ga shaka tawn da ai amyu masha byin wa ai aten kaw na Israela ni gaw, shanhte a akyu hpyi ga madat hkrum na matu nga yang, Karai lata da ai amyu masha ni re ai lam hpe hkam la ra wa ai. Dai hpang, Shawlumon prat kawn hpang nna nawku sum gaw, Karai Kasang lata da ai hkungga nawng ai shara hku nna masat wa ra ai. (Tara Jahprang 9:​29; 2 Hkawhkam Labau 6:​32, 33) Raitim, dai zawn nawku ai gaw jahkring jahkra a matu sha re. Kasa Pawlu ka wa ai hte maren, Israela ni hpe jaw wa ai jep ai Tara hte nawku htingnu hta nawng ai hkungga ni gaw “ngamu ngamai lam ni a hkrang sumla majing n rawng ai sha, de a shingna sha rai nga ai”. (Hebre 10:1, 2) Shingna shara hta hkumhkrang hpe malai bang ra na re. (Kolose 2:17) A.D. 33 kawn hpang nna, masha langai hte Yehowa a matut mahkai lam gaw, Mawshe tara hpe madat mara ai ntsa n madung mat sai. De a malai, Jep ai Tara madun wa ai Hkristu Yesu hpe madat mara ai hta madung ai.​—Yawhan 15:14-​16; Galati 3:​24, 25.

Yehowa hte nihtep lu na matu reng grau ai lam langai hpe Yesu nnan hpang ya wa ai. Shi gaw anhte a akyu hpyi ga ni hpe Karai Kasang madat ya nna, mahtai jaw na matu lam hpaw ya na wa, hpung atsam kaba ai jinghku langai hku nna shi hkum shi madun wa ai. Anhte a matu dai zawn Yesu galaw ya na matu, hpa gaw shi hpe shadut ya ai kun?

Anhte yawng gaw mara kap ai ni hku nna shangai wa ai majaw, anhte a galaw sa lam ni (sh) anhte nawng ai hkugga ni gaw mara hpe n shamat ya lu ai (sh) chyoi pra ai Karai Kasang Yehowa hte nihtep ai hkuhkau lam lu ging ai wa n byin shangun ai. (Roma 3:​20, 24; Hebre 1:​3, 4) Raitim, Yesu gaw shi a hkum tsup ai masha hkum hpe hkungga nawng wa nna, gawng malai hkam la ging ai shinggyim masha ni a mara hpe shaprai ya wa ai. (Roma 5:​12, 18, 19) Ya, tinang a mara hpe raw dat kau hkrum mayu ai kadai rai timung, Yehowa a shawng hta san seng ai nsam hte “nden ja ai myit hte n hkrit n kang let shang wa” lu ai ahkang lu da ai. Raitim, Yesu a hkungga hpe kamsham nna shi a amying hpe gang nna akyu hpyi yang she lu la na re.​—Ehpesu 3:​11, 12.

Yesu a mying hpe gang nna akyu hpyi ai shaloi, Karai a yaw shada lam hpring tsup hkra galaw ai hta, Yesu a daw ni kaw na yawm htum lam masum hpe kamsham ai lam madun ai hte bung ai: (1) Shi gaw mara raw dat hkrum na matu npawt re ai shagu hkungga re ai “Karai Kasang a Sagu Kasha” re. (2) Shi gaw Yehowa jahkrung sharawt ya ai wa rai nna, gawng malai hkungga a akyu ni hpe lajang ya ai hta “hkinjawng agyi” hku na ya amu gun nga ai. (3) Shi langai chyu sha Yehowa hpang akyu hpyi nihtep lu na matu “Lam” re ai.​—Yawhan 1:​29; 14:6; Hebre 4:​14, 15.

Yesu a mying hpe gang nna akyu hpyi ai gaw, shi hpe shagrau ai mung re. Dai zawn shagrau ai gaw htap htuk ai. Hpa majaw nga yang, “Sumsing lamu lahta tang na dinghta tsang na hte katsan ga na lahput yawng mayawng hte gaw, Yesu a mying nsang hte hput di nna, Yesu Hkristu gaw Madu rai nga ai, nga nna shinglet yawng mayawng hte gaw, Kawa Karai Kasang a hpung shingkang a matu mara kajai gumhkawng nga mu ga” ngu ai Yehowa a myit ra ai lam majaw re. (Hpilipi 2:​9, 10) Grau ahkyak ai gaw, Yesu a mying hpe gang nna akyu hpyi ai gaw, anhte a akyu a matu Kasha Shingtai hpe hkungga nawng ya wa ai Yehowa hpe shagrau ai hte bung ai.​—Yawhan 3:​16.

Yesu a reng grau ai lam hpe chye na na matu, Chyum Laika hta arawng sadang amyu myu hte madun da ai. Yesu gaw “amying shingteng yawng hta grau kaba ai mying ningsang” jaw hkrum ai. * Sumsing lamu hta mung, ginding aga hta mung jeyang lu ai ahkang aya nga manga yawng ap hkrum ai.​—Hpilipi 2:9; Mahte 28:18.

Teng ai. Anhte a akyu hpyi ga ni hpe Yehowa madat na matu nga yang, Yesu a mying hpe gang nna akyu hpyi ra ai. (Yawhan 14:13, 14) Raitim, anhte gaw “Yesu mying gang nna” ngu ai ga yan hpe akyang langai hku nna sha, kahtap htap n tsun mayu ga ai. Hpa majaw kun?

Ga shadawn langai hpe dinglik yu ga. Hpaga galaw ai masha langai kaw na laika langai hkap la lu ai shaloi, laika hpe htung zawn sha “hkungga let” ngu nna hpung dim dat da na re. Dai ga si gaw, dai hpaga galaw ai wa a hkamsha lam ajet re ngu nna nang hkam la ai kun? Shing nrai ga hpung dim dat ai lachyum ngu nna hkam la ai kun? Anhte a akyu hpyi ga ni hta Yesu a mying hpe akyu jashawn ai gaw, hpaga galaw ai hte seng ai laika a ga hpung dim hta, grau nna lachyum nga ra ai gaw teng sha re. Anhte mung “n sim n sa akyu hpyi” ra tim, kahtap htap tsun ai baw n re ai sha “myit mahkra” hte akyu hpyi ga ai.​—1 Htesaloni 5:​17; Shakawn 119:145.

“Yesu mying gang let” ngu ai ga yan hpe kahtap htap hpyi ai baw n byin hkra, gara hku koi lu na kun? Yesu a sharawng awng hpa atsam ningja ni hpe sawn sumru ai hku na re. Na a matu shi hpa galaw ya wa ai, hpa ni hpe naw galaw ya na matu sharawng ai ngu ai lam ni hpe sumru yu u. Kasha hpe akyu jashawn nna Yehowa galaw ya ai grai kaja ai shaman chyeju ni a matu chyeju dum ai lam, akyu hpyi ga ni hta shalawm nna chyeju dum shakawn u. Dai hku galaw na nga yang Yesu a ndai ga sadi hpe grau nna kamsham wa na re: “Wa kaw na lama ma hpyi myit yang, nye amying a marang e shi nanhte hpe jaw na ra ai.”​—Yawhan 16:23.