Yesu A Mauhpa Amu Ni Kaw Na Gara Lam Hpe Sharin La Mai Ai Kun?

YESU a mungkan ga asak aprat hte seng ai Chyum Laika labau hta, madung Grik ga hku nna “mauhpa amu” ngu ai ga si hpe kalang mung n jai lang wa ai hpe nang chye yang mau mat na re. “Mauhpa amu” ngu na kalang lang ga gale da ai Grik ga si (dyʹna·mis) gaw, shi a ga hku nga yang “atsam” ngu na lachyum nga ai. (Luka 8:​46) Dai ga si hpe “atsam” (sh) “mauhpa amu” ngu na mung gale mai ai. (Mahte 11:20, NWT; 25:15) Hpaji du langai tsun ai hku nga yang, ndai Grik ga si gaw “ngut kre wa ai bungli kaba hte dai hpe ngut kre awng dang lu shangun ai atsam hpe laksan hku nna madun dan ai. Mabyin hpe Karai Kasang a dagu atsam dan leng ai hku nna madun da ai.”

Kaga Grik ga si (teʹras) hpe gaw “lamik kumla” (sh) “mauhpa amu” ngu na ga gale ma ai. (Yawhan 4:​48; Kasa 2:​19) Ndai ga si gaw mu ai ni hpe akyu shabyin ya lu ai lam laksak hku nna madun da ai. Masha hpawng hte sape ni gaw, Yesu a atsam lawm ai amu ni hpe mu ai shaloi mau ma ai.​—Marku 2:​12; 4:​41; 6:​51; Luka 9:​43.

Yesu a mauhpa amu ni hpe madun dan ai masum ngu na Grik ga si (se·meiʹon) gaw, “namik” ngu na lachyum nga ai. Hpaji du Rawbat Dehpinbak gaw, dai gaw “mauhpa amu a grai sung ai lachyum hpe myit maju jung shangun ai” ngu na tsun ai. “Namik kumla ngu ai gaw mauhpa amu rai nna, anhte a Madu Yesu Hkristu a lam hte seng nna chye ging ai teng man lam hpe chye shangun ai” ngu na shi kahtap tsun ai.

Hkalem Ai Lam Kun? Karai Kasang Jaw Ai Dagu Atsam Kun?

Yesu a mauhpa amu ni gaw masha ni hpe shangwi shapyaw na matu, masu ai (sh) hkalem ai lam ni re ngu nna Chyum Laika hta n tsun da ai. Dai lam ni gaw ramma la kasha langai kaw na nat hpe Yesu shapraw ya wa ai mabyin zawn, “Karai Kasang a daru magam” atsam dan leng ai lam hpe madun ai re. (Luka 9:​37-​43) Ndai atsam lawm ai amu ni gaw, “daru magam chyalai hte n-gun atsam rawng ai” Madu, Chyahtum Chyalai n-gun rawng ai Karai Kasang a matu n mai byin ai lam rai na kun? (Esaia 40:26) N re!

Yesu galaw wa ai mauhpa amu 35 hpe Kabu Gara Shiga laika ni hta ka da ai. Raitim, Yesu galaw wa ai mauhpa amu yawng hpe gaw n ka da ai. Ga shadawn hku na Mahte 14:14 hta, “pru wa yang, masha wunawng wuwa kaba hpe shi mu hkrup nna, shanhte hpe matsan dum ai hte shanhte a machyi makaw hkrum ai ni hpe shamai shatsai ya mu ai” ngu tsun da ai. Dai aten hta, machyi masha kade daram hpe tsi tsi ya wa ai lam anhte n chye lu ai.

Dagu atsam lawm ai dai amu ni gaw, Yesu gaw Karai Kasang a Kasha, ga sadi tawn da ai Meshia re ngu Yesu tsun wa ai lam ni jaw ai hpe madi madun nga ai. Yesu gaw Karai Kasang jaw ai atsam a majaw, mauhpa amu ni galaw lu wa ai lam hpe Chyum Laika gaw shagrin ya ai. Kasa Petru gaw, “nanhte chye nga myit dai hte maren, Karai Kasang gaw . . . Yesu a lata hte magam ningsam, mauhpa amu, lamik kumla re ai ni nanhte a man e madun dan let, Karai Kasang e nanhte kaw awlaw shadan ya ai hkrum wu ai” ngu na tsun wa ai (Kasa 2:​22) Hpang kalang hta Petru gaw ndai hku bai tsun wa ai: “Karai Kasang shi [Yesu] hte rau rai nga ai majaw, mai kaja ai amu shi galaw nna, nat gumlau e zingri zingrat hkrum ai ni yawng mayawng hpe shamai ya let, kawan katsan hkawm nga ai.”​—Kasa 10:37, 38.

Yesu galaw wa ai mauhpa amu ni gaw shi hkaw tsun wa ai shiga hte matut manoi ai. Yesu a sharin achyin ai lam hte shi a mauhpa amu langai hpe masha ni bai htang ai lam hte seng na Marku 1:​21-​27 hta madun da ai. Marku 1:22 hta shawa masha ni gaw ‘shi sharin shaga ai lam hpe mau mat ma ai’ ngu tsun nna, nat ni hpe Yesu shapraw kau ya ai shaloi masha ni “mau mahka” mat wa ai lam hpe daw kaji 27 hta tsun da ai. Yesu a dagu atsam lawm ai amu ni mung, shi a shiga mung Yesu gaw ga sadi tawn da ai Meshia re ai hpe chye shangun ai.

Yesu gaw, shi gaw Meshia re ngu tsun ai daram sha n galaw wa ai. Shi tsun wa ai ga ni, lailen ni hte rau mauhpa amu ni galaw ai shaloi dan leng ai Karai Kasang a hpung dagu gaw, Yesu gaw Meshia re ai hpe sakse madun wa ai. Yesu a daw, ahkang aya hte seng nna san wa ai shaloi mung, nden marai hte shi ndai hku bai htai wa ai: “Ngai lu ai sakse gaw Yawhan [hkalup sara] hkam ya ai sakse hta grau kaba li ai: kaning rai nme nga yang, Wa gaw, ngai gun hpai shangut na matu ngai hpe ap ya nna, ya ngai gun hpai nga ai amu ni e pyi, ngai hpe Wa e shangun dat ai lam sakse hkam ya nga ai.”—Yawhan 5:​36.

Ngangkang Ai Madi Madun Lam Ni

Yesu a mauhpa amu ni gaw, masu ai lam n re, gaja wa byin wa ai mabyin re ngu hpa majaw kam mai ai kun? Ngangkang ai madi madun lam nkau hpe dinglik yu ga.

Yesu gaw, dagu atsam lawm ai amu ni hpe galaw wa ai shaloi, shi hpe myit maju jung na matu kalang mung n galaw wa ai. Gara mauhpa amu raitim, Karai Kasang hpe shakawn shagrau na matu shi ra sharawng wa ai. Ga shadawn, myi n mu ai masha hpe garai n tsi ya shi yang Yesu gaw, “Karai Kasang a magam amu danhkung na matu” tsi tsi ya wa ai re hpe ahkyak shatai na tsun wa ai.​—Yawhan 9:​1-3; 11:​1-4.

Yesu gaw mandan sara, lawng sara, makam masham hte tsi tsi ya ai masha ni hte n bung ai. Myit atsam, masu hkalem ai, grai hkik hkam ai hku na madun ai lam ni, ntsin lapri ya ai (sh) myit kahpra hpa nawku htung lailen ni hpe kalang mung n galaw wa ai. Yesu gaw, ladu lai kam ai lam hpe mung akyu n jashawn wa ai. Myi n mu ai marai lahkawng hpe tsi tsi ya wa ai lam hpe sadi yu u. “Yesu shan hpe matsan dum nna, shan a myi hpe ahtawk ya mu ai” ngu na ka da ai. (Mahte 20:29-​34) Makam masham htung lai, poi shingra (sh) atsam madun poi ni hta n shang lawm wa ai. Yesu gaw, mauhpa amu ni hpe sakse law law a man hta galaw chye ai. Laksan lajang da ai wan, pyinra (sh) arung arai ni hpe akyu n jashawn wa ai. Ya aten na mauhpa amu ni gaw dai hte n bung ai sha law malawng hku na sakse madi madun lam n nga ai.​—Marku 5:​24-​29; Luka 7:​11-​15.

Mauhpa amu hpe akyu hkamsha wa ai ni a makam masham hpe Yesu kalang lang yin la wa ai. Raitim, masha langai hta makam masham n nga ai majaw Yesu mauhpa amu n galaw ai sha n nga wa ai. Yesu gaw Galile mung Kaperanaum mare hta nga nga ai shaloi, “shanhte gaw nat kap ai masha law law hpe shi hpang de woi sa wa mu ai rai nna, ga hte sha dai nat ni hpe shi shaden kau mu ai; machyi makaw hkrum ai ni nlang hte hpe mung, shamai ya mu ai.”​—Mahte 8:​16.

Yesu gaw, chye mayu ai ni myit dik mat na matu n re ai sha, ra kadawn nga ai ni hpe karum ya mayu ai majaw mauhpa amu galaw wa ai re. (Marku 10:46-​52; Luka 23:8) Dai sha n-ga, Yesu gaw tinang akyu lu na matu mauhpa amu hpe kalang mung n galaw wa ai.​—Mahte 4:​2-4; 10:8.

Kabu Gara Shiga Laika 4 Hta Lawm Ai Labau Ni Gaw Gara Hku Kun?

Yesu a mauhpa amu ni hte seng ai mabyin ni a lam hpe Kabu Gara Shiga laika 4 kaw na anhte chye wa sai. Yesu galaw wa ai ngu tsun da ai mauhpa amu ni a tengman ai lam hpe san jep yu ai shaloi, ndai Kabu Gara Shiga laika 4 gaw kam mai ai lam nga ai kun? Nga ai.

Sadi hkrup wa sai hte maren, Yesu a mauhpa amu ni hpe sakse law law a man hta galaw wa ai. Dingsa dik htum Kabu Gara Shiga laika 4 hpe dai sakse law law asak naw hkrung nga ai shaloi ka wa ai. Kabu Gara Shiga laika 4 hpe ka ai ni a myit dingman ai lam hte seng nna, mauhpa amu ni hte hkrung rawt ai lam ngu ai laika hta ndai hku tsun da ai: “Nawku htung lailen chyam bra na matu yaw shada ai hku na, mauhpa amu ngu ai mabyin law law a lapran hta labau shang tengman ai mabyin hpe dingsang makoi magap da ai ngu na, Kabu Gara Shiga laika 4 ka wa ai ni hpe tsun ai gaw tsep kawp tara n shang ai. . . . Shanhte gaw kam mai ai Chyum Laika ka ai ni byin mayu ai myit nga wa ai.”

Hkristan nawku htung hpe ninghkap ai Ju ni gaw Kabu Gara Shiga laika 4 hta ka da ai dagu atsam lawm ai amu ni hpe kalang mung n ndang wa ai. Dai lam ni hpe galaw lu wa ai dagu atsam hpe sha shanhte mara tam wa ai. (Marku 3:​22-​26) Hpang hta, mara shagun ai ni mung, Yesu a mauhpa amu ni hpe n lu ndang wa ai. De a malai, Yesu galaw wa ai mauhpa amu ni hte seng na, A.D tsaban 1 hte 2 laman labau madi madun lam ni nga wa ai. Dai majaw, Kabu Gara Shiga laika 4 a labau ni hta lawm ai Yesu a mauhpa amu ni gaw, tengman ai mabyin ni re ngu na sawn la lu ai lam law law nga ai.

Mauhpa Amu Ni Galaw Ai Wa

Yesu a mauhpa amu ni hpe san jep yu ai shaloi, dai lam ni gaw tengman ai lam hte seng na tatut re ai lam ni hpe sha san jep yu ai hte n ngut ai. Yesu a mauhpa amu ni hpe tsun ai shaloi, Kabu Gara Shiga laika ni gaw hkamsha lam hpring tup nga nna matsan dum chye ai wa, masha shada da a akyu hpe grai myit lawm ai wa re ai hpe madun dan nga ai.

Yesu kaw sit sa let “nang hkraw n yang gaw, ngai hpe shapra ya lu na rai nga ndai” ngu na, nden marai hte hpyi nem ai manggang kap ai wa a mabyin hpe dinglik yu u. Yesu gaw “matsan dum ai” myit hte lata hpe ladawn let dai wa hpe ahtawk nna, “ngai hkraw nga nngai, san pra wa nu,” ngu na tsun wa ai. Dai chyahkring mi na laman shi a ana mai mat ai. (Marku 1:​40-​42) Dai hku na Yesu gaw mauhpa amu ni galaw na matu, Karai Kasang jaw da ai dagu atsam hpe akyu jashawn ya lu ai myit tau ai myit hpe madun dan wa ai.

Na-in mare kaw na moi mang lamang hte Yesu hkrum ai shaloi hpa lam byin wa ai kun? Si mat wa ai ramma gaw gaida jan a kasha shingtai re. Yesu gaw dai num hpe “matsan yu dum” ai majaw, shi makau de sa na “Hkum hkrap” nu ngu tsun wa ai. Dai hpang shi kasha asak bai hkrung wa ai.​—Luka 7:​11-​15.

Yesu a mauhpa amu ni kaw na anhte lu la mai ai shalan shabran lam jaw ai lam langai gaw, Yesu gaw “matsan yu dum” ai myit nga nna masha ni hpe karum ya wa ai re. Raitim, dai zawn mauhpa lam ni gaw labau hta byin wa ai mabyin daram sha n re. “Yesu Hkristu gaw, mani, dai ni, htawm prat dingsa mung, maren a nga nga ai” ngu na Hebre 13:8 hta tsun da ai. Ya, Yesu gaw sumsing Hkawhkam hku na uphkang nga sai. Shinggyim masha hku na mungkan hta nga ai shaloi, akyu jashawn wa ai Karai Kasang jaw da ai mauhpa dagu atsam ni hpe grau kaja ai hku na akyu jashawn na matu jin jin rai nga sai. Kade n na yang, Yesu gaw dai dagu atsam ni hpe akyu jashawn nna madat mara ai ni a ana zinli yawng hpe shamai ya sana re. Ndai tsawm htap ai htawm hpang hte seng na nang grau chye mayu yang, Yehowa Sakse ni gaw kabu gara let karum ya na re.

[Sumla]

Yesu a mauhpa amu ni gaw “Karai Kasang a daru magam” atsam dan leng ai lam re

[Sumla]

Yesu gaw hkamsha lam hpring tup nga ai wa re