ṚEBBI iɛeggen i iqeddacen-​is belli ad iţţujeṛṛeb liman-​nsen. Awal-​is yenna-​d: “Ɛasset iman-​nwen axaṭer aɛdaw-​nwen d Cciṭan, iţezzi iṛeɛɛed am yizem, iţqellib anwa ara issebleɛ.” (1 Buṭrus 5:8) Amek ara yeɛreḍ ahat Cciṭan a k-​isṛuḥ liman-​ik?

Cciṭan izmer ad issexdem wid i tḥemmleḍ neɣ lɛibad nniḍen akken ur teqqareḍ ara Tira Iqedsen. Daɣneţţa, Ɛisa icar-​ed: “A d-​kkren yeɛdawen seg at wexxam.” (Matta 10:36) Ɣas akken d ayen yelhan i k-​bɣan iɛeggalen n twacult-​ik akk-​d yeḥbiben-​ik, izmer lḥal ur ẓrin ara tideţ ifazen i yellan deg Wawal n Ṛebbi neɣ ţţagaden ɣef wayen i ţxemmimen medden. Acu kan, Tira Iqedsen nnant-​ed: “Argigi zdat n yemdanen, ţ-​ţiceṛkeţ yundin meɛna win yeţkalen ɣef Yahwa yeţţili di ṭṭmana.” (Lemtul 29:25) Lukan aţ-​ţḥebseḍ leqraya n Tira Iqedsen akken aţ-​ţɛeǧbeḍ i yemdanen, ayagi ad yeɛǧeb i Ṛebbi? Mebla ccekk xaṭi! Lameɛna, ma tessekneḍ-​d belli tesɛiḍ liman n ṣṣeḥ, Ṛebbi a k-​iɛiwen. “Ur nelli ara seg wid yeţţuɣalen ɣer deffir, yeţḍiɛen, lameɛna nukni seg wid yesɛan liman, neţţeddu deg ubrid n leslak.”​—Iɛebṛaniyen 10:39.

Tecfiḍ ɣef Dumas, win akken iɣef i d-​nehdeṛ deg weḥric wis tlata? Di tazwara, tameṭṭut-​is twet di liman-​is. Meɛna ɣer zdat, tuɣal teqqar Tira Iqedsen am neţţa. Ula d keččini, ma tkemmleḍ txeddmeḍ ayen yellan d lḥeqq, amar aţ-​ţawiḍ yiwen si twacult-​ik neɣ si leḥbab-​ik ad ixdem am kečč. Mačči tikkelt mačči snat i nesla belli yella lmumen n ṣṣeḥ i gewwin, s tikli-​ines yeṣfan akk-​d leqder-​ines ameqran, albeɛḍ si twacult-​is ad yamen “mebla imeslayen.”​—1 Buṭrus 3:1, 2.

Cciṭan yebɣa ad yawi lɣaci ad ɛudden (ɣilen) belli ur sɛin ara lweqt akken ad ɣren Tira Iqedsen. Lukan yufi, uguren n ddunit-​a, gar-​asen iɣeblan i teţmagareḍ d uḥebbeṛ ɣef iṣurdiyen, ad “skuffuren awal-​nni” iwumi i tesliḍ akken “ur d-​yeţţawi ara lfayda” liman-​ik. (Marqus 4:19) Ur ɣelli ara di tceṛkeţ-​agi! Xemmem ɣer wayen i k-​yeţṛaǧun ɣer zdat. Neqqar di Tira Iqedsen: “Tudert n dayem: d asm’ara issinen yemdanen belli d kečč i d Ṛebbi awḥid, Illu n tideţ, ad issinen daɣen Ɛisa Lmasiḥ, win akken i d-​tceggɛeḍ.” (Yuḥenna 17:3) D ṣṣeḥ, ilaq a nissin akteṛ Ṛebbi akk-​d Ɛisa, yellan d Lmasiḥ,  iwakken a nekseb tudert n dayem di Lǧennet.

A nmeyyez ɣef lemtel n Musa, yellan zik di twacult n ugellid n Maṣer. Lukan yebɣi, yezmer ad inadi ɣef ttrika, lɛaḍima d leḥkem. Lameɛna, yextaṛ “ad yeɛteb d wegdud n Ṛebbi wala ad iqqim di zzhu n ddunit-​agi yeţţawin ɣer ddnub.” Acuɣer? Axaṭer “yeṭṭef di liman am win iwalan win akken ur yeţwali yiwen.” (Iɛebṛaniyen 11:24, 25, 27) Ihi akken i d-​iban lḥal, liman-​is yeǧhed. Ur ireṣṣa ara tamuɣli-​ines ɣef wamek ara yaweḍ ɣer lebɣi-​s, lameɛna ireṣṣa-​ţ ɣef nnfeɛ n Ṛebbi i t-​iburken aṭas mačči d cwiṭ. Ma tɛundeḍ Musa, a k-​ibarek Ṛebbi ula d keččini.

Cciṭan izmer ad yessexdem aṭas n ţţawilat akken a d-​iẓdem fell-​ak. Meɛna ulac win i k-​iḥeţţmen a s-​tmuddeḍ aɛrur-​ik. Atan ɣer wacu i ɣ-​yenha Wawal n Ṛebbi: “Ur ţaǧǧat ara Cciṭan a kkun-​yeɣleb dɣa ad yerwel fell-​awen.” (Yeɛqub 4:7) Amek i tzemreḍ aţ-​ţɣelbeḍ Cciṭan?

Ur ţţaǧǧa ara taɣuri n Tira Iqedsen. Qqar yal ass Awal n Ṛebbi. Ssenqad aselmed yellan deg-​s. Ssexdam lewṣayat-​is. Swakka, aţ-​ţrefdeḍ “leslaḥ meṛṛa” n Ṛebbi swayes i tzemreḍ aţ-​ţqableḍ tiyitwin n Cciṭan.​—At Ifasus 6:13.

Ţɛacaṛ wid yesɛan liman n ṣṣeḥ. Nadi aţ-​ţeddukkleḍ d wid yeqqaren, yessenqaden yerna yessexdamen ayen yellan di Tira Iqedsen. Lmumnin am wigi ‘ţţemḥadaren wway gar-​asen akken ad ţţemweṣṣin ɣef leḥmala d lecɣal yelhan yerna ţţemyenhun wway gar-​asen.’ A k-ɛiwnen akken ad yennerni liman-​ik.​—Iɛebṛaniyen 10:24, 25.

Qerreb ɣer Ṛebbi. Dɛu ɣer Ṛebbi akken a k-​iɛiwen yerna ţkel fell-​as. Ur ilaq ara yakk aţ-​ţeţţuḍ belli yebɣa a k-​iɛiwen. “Rret akk iɣeblan-​nwen ger ifassen-​is, axaṭer iţḥebbiṛ fell-​awen.” (1 Buṭrus 5:6, 7) “Ṛebbi d bab n lḥeqq, ur yeţɛemmid ara aţ-​ţenɛeţţabem sennig n tezmert-​nwen; lameɛna m’ara teţwajeṛbem, a wen-​d-​yefk tazmert s wayes ara tṣebṛem d wamek ara teffɣem si tegniţ n leɛtab.”​—1 At Kurintus 10:13.

Cciṭan inejjeɛ (yeţţaweḍ) Ṛebbi: yeqqar-​ed belli ulac win ara yeqqimen di leqdic n Ṛebbi ma yella yeţţujeṛṛeb. Meɛna, tzemreḍ a d-​tefkeḍ ţţbut belli Cciṭan d akeddab i gella! Ṛebbi yenna-​d: “Ili-​k d ukyis [...] yerna ssefṛeḥ ul-​iw, akken ad izmireɣ ad rreɣ i win i yi-​inejjɛen.” (Lemtul 27:11) Qsed ihi deg wul-​ik a d-​tessekneḍ belli tesɛiḍ liman n ṣṣeḥ!