ADLIS aneggaru n Wedlis Iqedsen yeţţusemma Aweḥḥi. D amceggeɛ Yuḥenna i t-​yuran. Neţţaf deg-​s lexbaṛ i d-​yeţţaken asirem i yemdanen meṛṛa. Adlis-​agi iheddeṛ-​ed ɣef iweḥḥiyen i d-​isskanayen ayen ara iṣaren ɣer zdat. Leḥwayeǧ-​a ad ssiwḍent ɣer wass ideg ara yeḍru lmeqsud n Yahwa.

Deg uweḥḥi amezwaru, Ɛisa i d-​yeḥyan si ger lmeggtin, icekkeṛ yerna yennuɣ tijemmuyaɛ. Aweḥḥi wis sin issken-​ed akersi n lḥekma n Ṛebbi, iwumi ţţakent lɛaḍima lexliqat yellan deg igenni.

Simma simma lmeqsud n Ṛebbi iḍerru. Skud iḍerru lmeqsud-​agi, iţţunefk-​ed yiwen wedlis (uţafţar), ilesqen s sebɛa n ṭṭwabeɛ, i Izimer i geţmettilen Ɛisa Lmasiḥ. M’akken i d-​iţţalday ṛebɛa n ṭṭwabeɛ imezwura, ḍehren-​d yemnayen i d-​ileḥḥun s tazzla. Amnay amezwaru d Ɛisa i geqqimen ɣef uɛawdiw amellal yerna i gelsan taɛeṣṣabt. Ma d wiyaḍ, yeqqimen ɣef iɛawdiwen yesɛan lenwal (sbiɣat) yemxalafen, ţmettilen-​d licaṛat yeɛnan lgirrat, laẓ akk-​d ţţerkat (lehlakat iţţenṭaḍen) ara yeḍrun deg wussan ineggura n ddunit n wass-​a. Mi d-​yeldi ṭṭabeɛ wis sebɛa, nedhen-​d sebɛa n lbuqat. Tiyitwin-​agi n lbuqat ţmettilent-​ed ţţebcirat n lḥisab ara d-​yesseɣli Ṛebbi. Mkul ţţebcira teɛna yiwet lmuṣiba, yeɛni yiwen ubeggen n zzɛaf n Ṛebbi.

Yuḥenna iwala talalit n yiwen weqcic i d-​iţmettilen talalit n Tgelda n Ṛebbi deg igenni. Ayagi yewwi-​d lgirra, dɣa Cciṭan d lmalayekkat-​is timcumin ţţuḍeggren-​d ɣer lqaɛa. Imiren tenṭeq-​ed yiwet n taɣect, tenna: “A nnger-​im a lqaɛa!” Iblis yezɛef ayendin axaṭer yeẓra belli drus n lweqt i s-​d-​yeqqimen.—Aweḥḥi 12:12.

Yuḥenna iwala Izimer-​nni, i d-​iţmettilen Ɛisa, akk-​d 144 000 n yemdanen yeţwaxtaṛen si lqaɛa akken ad ḥekmen yid-​es. Akka, adlis n Uweḥḥi issken-​ed belli aḥric wis sin n Zzerriɛa-​nni d 144 000 n yemdanen-​agi.—Aweḥḥi 14:1; 20:6.

Ineḥkamen n ddunit nnejmaɛen i “umenɣi n wass ameqqran n Sidi Ṛebbi Bab n tezmert,” yeţţusemman Harmagidun. Nnuɣen nutni d win akken irekben aɛawdiw amellal, Ɛisa, yellan d aqerru n lɛeskeṛ n igenwan. Ɣer taggara, ineḥkamen meṛṛa n ddunit ţwanegren. Cciṭan yeţwarez, ma d Ɛisa d 144 000 n yemdanen-​nni ḥekmen ɣef lqaɛa “alef iseggasen.” Mi ɛeddan walef-​agi n iseggasen, Cciṭan yeţwanger.—Aweḥḥi 16:14; 20:4.

Acu ara d-​tawi Tgeldit-​agi n walef iseggasen i yemdanen yeţţaɣen awal? Acu ara yexdem Yahwa? Yuḥenna yerra-​d lǧawab: “A sen-​yesfeḍ imeṭṭawen, ur teţţili lmut, ur yeţţili leḥzen, ur yeţţili umeǧǧed ur yeţţili lqeṛḥ axaṭer leḥwayeǧ timezwura ɛeddant ur ţɛawadent ara a d-​uɣalent.” (Aweḥḥi 21:4) Lqaɛa aţ-​ţuɣal d lǧennet!

Akka i gfukk ameslay wedlis n Uweḥḥi ɣef lexbaṛ n Wedlis Iqedsen. S Tgelda n Lmasiḥ, isem n Yahwa iţwaqeddes yerna iban-​ed s lekmal belli Yahwa yeţţalas leḥkem i dima!

—Ayagi yers ɣef wedlis n Uweḥḥi.