TIMEƔRI 8
Acuɣer i gɛemmed Ṛebbi i cceṛ d lemḥayen?
1. Amek i d-yebda cceṛ?
Ṛebbi yeǧǧa lɛibad ad ḥekmen lweqt iwulmen iwakken a d-iban belli ur zmiren ara ad kksen iɣeblan n ddunit.
Yebda-d cceṛ ɣef lqaɛa asmi i geskaddeb Cciṭan i tikkelt tamezwarut. Di tazwara, Cciṭan yella d lmelk ikemlen, lameɛna “ur iṭṭif ara di tideţ.” (Yuḥenna 8:44) Yeḍmeɛ ad yeţwaɛbed neţţa; meɛna, ḥaca Ṛebbi i glaqen ad yeţwaɛbed. Yeskaddeb i Ḥewwa, tameṭṭut tamezwarut, yerna yessaweḍ iqenneɛ-iţ a s-taɣ awal i neţţa wala i Ṛebbi. Adam yexdem am Ḥewwa: iɛuṣa Ṛebbi. Ayen akken i gexdem yegla-d s lemḥayen akk-d lmut.—Ɣer Laṣel n ddunit 3:1-6, 19.
Asmi i gdemmer Cciṭan Ḥewwa aţ-ţɛaṣi Ṛebbi, ibeggen-ed belli ur yeqbil ara lḥeqq i gesɛa Ṛebbi ad yeḥkem ɣef txelqit-is. Amur ameqran n lɛibad ttabaɛen Cciṭan: am neţţa, ur bɣin ara ad yili Ṛebbi d Sselṭan fell-asen. Akka i guɣal Cciṭan d “sselṭan n ddunit agi.”—Ɣer Yuḥenna 14:30; 1 Yuḥenna 5:19.
2. Eɛni tesɛa lɛib txelqit n Ṛebbi?
Ayen akk i gxeddem Yahwa yekmel. Lɛibad akk-d lmalayekkat i d-yexleq kemlen, llan zemren a s-aɣen awal akken ilaq. (Asmekti 32:4, 5) Yefka-yaɣ tilelli akken a nextiṛ a nexdem ayen yelhan neɣ ayen n diri. Tilelli- yagi teţɛawan-aɣ a s-d-nbeggen belli nḥemmel-it.—Ɣer Yeɛqub 1:13-15; 1 Yuḥenna 5:3.
3. Ayɣer i gɛemmed Ṛebbi i lemḥayen ad ilint ar ass-a?
Yahwa iɛemmed aţ-ţili ar ass-a lmeɛṣeyya-nni yeɛnan lḥeqq i gesɛa ad yeḥkem. Iwacu? Yahwa yexdem ayagi bac a d-ibeggen belli, m’ara ɛerḍen lɛibad ad ḥekmen iman-nsen, yeɛni mebla Yahwa, ur xeddmen ara yakk ayen yelhan. (Amusnaw 7:29; 8:9) Ihi d ayen ibanen: lɛibad ḥekmen seţţ alaf n iseggasen aya; lḥekkam-agi ur ssawḍen ara ad kksen lgirrat, timenɣiwt, lbaṭel akk-d lmuţ.—Ɣer Irmiya 10:23; Tuffɣa 9:16.
Leḥkem n Ṛebbi yeţţawi-d lfaydat i wid iţeddun si lǧiha-s, mačči am leḥkem n lɛibad. (Icɛaya 48:17, 18) Qrib ad ikkes Yahwa lḥukumat meṛṛa n yemdanen. Ḥaca lɛibad yextaṛen ad ilin ddaw n leḥkem n Ṛebbi ara iɛicen ɣef lqaɛa.—Icɛaya 11:9; Ɣer Danyil 2:44.
Wali bidyu Acuɣer i gɛemmed Ṛebbi ad ilint lemḥayen?
4. D acu i ɣ-yeǧǧa a t-nexdem ṣṣber n Ṛebbi?
Cciṭan yenna-d belli lɛibad mačči d leḥmala i ḥemmlen Yahwa imi i qeddcen fell-as; d ṭṭmeɛ i ḍemɛen a ten-id-iṣaḥ kra sɣur-es. Tebɣiḍ a d-tbeggneḍ belli ayagi d lekdeb? Tzemreḍ! Ṣṣber n Ṛebbi a ɣ-yeǧǧ a d-nessken ma d neţţa i nebɣa a ɣ-yeḥkem neɣ d lɛibad. A d-nbeggen lxetyaṛ-nneɣ di temsalt-agi s temɛict-nneɣ.—Ɣer Yub 1:8-12; Lemtul 27:11.
5. Amek ara nextiṛ Ṛebbi d Sselṭan fell-aneɣ?
Leqrarat i neţţaṭṭaf sskanayen-d ma nebɣa ad yili Ṛebbi d Sselṭan fell-aneɣ.
Amek ara nextiṛ Ṛebbi d Sselṭan fell-aneɣ? M’ara neţnadi a t-neɛbed akken ilaq yerna nettabaɛ ddin n ṣṣeḥ, ireṣṣan ɣef Wawal-is, Adlis Iqedsen. (Yuḥenna 4:23) A d-nbeggen belli mačči d Cciṭan i nextaṛ d sselṭan fell-aneɣ s uɛaned ara nɛaned Ɛisa. Am neţţa, ur nţekki la di tsertit (lbulitik) wala di lgirrat.—Ɣer Yuḥenna 17:14.
Cciṭan yessexdam tazmert-is akken ad idemmer lɛibad ɣer ddnubat n lɛaṛ akk-d yir lexdayem nniḍen. Ma nexḍa i yir lexdayem-agi, ahat imdukkal- nneɣ d yeqriben-nneɣ ad uɣalen ad ţmesxiṛen fell-aneɣ w’a ɣ-ţxaṣamen. (1 Buṭrus 4:3, 4) Ilaq ihi a nextiṛ: D wid i gḥemmlen Ṛebbi i neţnadi ad uɣalen d iḥbiben-nneɣ? Nettabaɛ leqwanen n Ṛebbi yeččuṛen d lekyasa akk-d leḥmala? Ma nexdem akka, a d-nesbeggen belli yeskaddeb Cciṭan mi d-yenna belli lɛibad ur ţţaɣen ara awal i Ṛebbi ma mmugren-d tiswiɛin n ccedda.—Ɣer 1 Ikurintiyen 6:9, 10; 15:33.
Ṛebbi iḥemmel lɛibad, yerna leḥmala-yagi-ines teţţak-aɣ-d ṭṭmana belli cceṛ akk-d lemḥayen ad ţwikksen. Wid yesɛan liman di Ṛebbi yerna qeblen ad ilin si lǧiha n leḥkem-ines, ad ɛicen i dima ɣef lqaɛa.—Ɣer Yuḥenna 3:16.
