ღმერთი ოდითგანვე აცნობს თავს კაცობრიობას. წარსულში ის თავის აზრებს ბიბლიის დამწერთ წმინდა სულით, ანუ თავისი მოქმედი ძალით, გადასცემდა (2 პეტრე 1:20, 21). ასე რომ, ღვთის შესახებ ჭეშმარიტების გაგება ბიბლიის მეშვეობით შეგვიძლია (წაიკითხეთ იოანეს 17:17; 2 ტიმოთეს 3:16).

ბიბლიაში ღმერთი საკუთარ თავზე მრავალ რამეს გვიმჟღავნებს. ის გვაგებინებს, თუ რატომ შექმნა ადამიანი, რას გააკეთებს კაცობრიობისთვის და დღეს რას მოითხოვს ჩვენგან (საქმეები 17:24—27). იეჰოვა ღმერთს სურს, ვიცოდეთ ჭეშმარიტება მის შესახებ (წაიკითხეთ 1 ტიმოთეს 2:3, 4).

იეჰოვა ჭეშმარიტების ღმერთია. მან თავისი ძე, იესო, დედამიწაზე გამოგზავნა, რათა ადამიანებისთვის სიმართლე ეუწყებინა. ამიტომ ყველა, ვისაც ჭეშმარიტება უყვარს, მიჰყვება იესოს სწავლებებს (იოანე 18:37). ღვთის სურვილია, რომ სწორედ ასეთი თაყვანისმცემლები ჰყავდეს (წაიკითხეთ იოანეს 4:23, 24).

სატანა ეშმაკმა ღმერთზე შეთხზული არაერთი ტყუილით მრავალი ადამიანი ჩამოაშორა შემოქმედს (2 კორინთელები 4:3, 4). ამ სიცრუით ცხოვრობენ ისინი, ვისაც არ უყვარს ის, რაც კარგი და ჭეშმარიტია (რომაელები 1:25). თუმცა მილიონობით გულწრფელი ადამიანი ბიბლიის შესწავლით ღვთის შესახებ სიმართლეს გებულობს (წაიკითხეთ საქმეების 17:11).