Patien ti minilion iti intero a lubong a ti Krismas ket selebrasion ti pannakayanak ni Jesu-Kristo. Ngem napampanunotmo kadin no nagselebrar iti Krismas dagiti Kristiano idi umuna a siglo—dagidiay nadekket ken Jesus? Ken ammom kadi no ania ti ibagbaga ti Biblia maipapan iti birthday? Ti sungbat kadagitoy a saludsod ti makatulong tapno maammuantayo no ti Krismas ket para kadagiti Kristiano wenno saan.

Umuna, awan ti mabasa iti Biblia a naselebraran ti birthday ni Jesus wenno uray ti birthday dagiti matalek nga agdaydayaw iti Dios. Dua laeng a tao ti mabasa iti Biblia a nagselebrar iti birthday. Awan kadakuada ti agdaydayaw ken Jehova, ti Dios iti Biblia, ken adda dakes a napasamak iti panagselebrarda. (Genesis 40:20; Marcos 6:21) Sigun iti Encyclopædia Britannica, kontra dagiti nagkauna a Kristiano iti “pagano a kaugalian a panagselebrar iti birthday.”

Saan nga ibaga ti Biblia ti eksakto a petsa ti pannakayanak ni Jesus. “Saan a mabasa iti Baro a Tulag wenno uray iti dadduma pay a reperensia ti aldaw ti pannakayanak ni Kristo,” kuna ti McClintock and Strong’s Cyclopedia. No kayat ni Jesus a selebraran dagiti pasurotna ti pannakayanakna, siniguradona koma nga ammoda ti petsa ti pannakayanakna.

Maikadua, awan ti nairekord iti Biblia a sinelebraran ni Jesus wenno dagiti adalanna ti Krismas. Sigun iti New Catholic Encyclopedia, damo a mabasa ti panagselebrar iti Krismas “iti Chronograph nga insurat ni Philocalus. Maysa daytoy nga almanac [wenno, tinawen a libro] dagiti Romano a ti reperensiana ket naaramid idi 336 [C.E.].” Nalawag a naaramid dayta kalpasan a nakompleto ti Biblia ken ginasut a tawen kalpasan a nagbiag ni Jesus ditoy daga. Isu a naibaga ni McClintock ken ni Strong a “saan nga imbilin ti Dios ken saan a naggapu iti Baro a Tulag ti panagselebrar iti Krismas.” *

Kas Naindaklan a Mannursuro, nangted ni Jesus kadagiti nalawag nga instruksion no ania ti kayatna nga aramiden dagiti adalanna, ket nairekord dagita iti Biblia. Ngem saan a karaman kadagita ti panagselebrar iti Krismas. No kasano a saan a kayat ti maysa a titser a lumbes dagiti estudiantena kadagiti instruksionna, saan met a kayat ni Jesus a dagiti pasurotna ket “lumbes iti bambanag a naisurat” iti Biblia.—1 Corinto 4:6.

Ngem adda napateg a selebrasion nga ar-aramiden dagiti nagkauna a Kristiano—ti pananglaglagip iti ipapatay ni Jesus, wenno ti Memorial. Imbaga a mismo ni Jesus kadagiti adalanna no kaano a selebraranda dayta ken impakitana no kasano nga aramiden dayta. Nairekord iti Biblia dagitoy nga espesipiko nga instruksion ken ti petsa ti ipapatayna.—Lucas 22:19; 1 Corinto 11:25.

Kas naammuantayon, ti Krismas ket panangselebrar iti birthday, ken saan a sinelebraran dagiti nagkauna a Kristiano dayta a pagano a kaugalian. Maysa pay, saan nga ibaga ti Biblia a nagselebrar ni Jesus wenno ti dadduma pay iti Krismas. Gapu kadagita a kinapudno, minilion iti intero a lubong ti mamati a saan a para kadagiti Kristiano ti Krismas.