Dimmakkelak idiay Warialda, maysa a bassit nga ili ti New South Wales. Kaaduan nga agnanaed iti Warialda ket agmulmula ken agtartaraken kadagiti karnero ken baka. Nadalus ti ili ken manmano ti krimen.

Gapu ta siak ti inauna iti sangapulo nga annak, nagtrabahoakon idi agtawenak iti 13 tapno matulongak ti pamiliak. Yantangay nababa ti adalko, nagtrabahoak iti pagtaraknan iti animal. Iti edad a 15, agay-aywanakon kadagiti napaamo a kabalio.

Adda pagimbagan ken pagdaksan ti panagtrabaho iti rantso. Magustuak ti trabahok, kasta met ti aglawlaw. Iti rabii, agtugawak iti paginuduan ken buyaek ti bulan ken ti namituen a langit bayat a maipulpul-oy ti ayamuom dagiti mula iti aglawlaw. Malagipko nga inut-utobko nga adda la ketdi Namarsua kadagitoy nagpintas a bambanag. Iti sabali a bangir, naipasangoak kadagiti dakes nga impluensia iti rantso. Masansan a mangngegko ti panagsao ti dakes ken nalaka laeng ti maaddaan iti sigarilio. Idi agangay, ugalikon ti agsao ti dakes ken agsigarilio.

Immakarak idiay Sydney idi agtawenak iti 18. Nagaplayak a soldado ngem saanak a naawat gapu ta nababa ti adalko. Simrekak iti sabali a trabaho ket nagnaedak idiay Sydney iti makatawen. Ditoy a damo a nakasaritak dagiti Saksi ni Jehova. Pinatgak ti awisda a tumabuno iti maysa kadagiti gimongda, ket dagus a nabigbigko a pudno dagiti pannursuroda.

Di nagbayag, nagsubliak iti rantso ngem iti daytoy a gundaway idiay Goondiwindi, Queensland. Nakastrekak iti trabaho, nagasawa, ngem nakalkaldaang ta nangrugiak metten nga aginum .

Naaddaankami ken baketko iti dua nga annak. Idin, inut-utobko no ania ti pagtungpalan ti biagko. Nalagipko ti nangngegko iti gimong dagiti Saksi idiay Sydney, isu nga inkeddengko ti agsukimat.

Nakasarakak iti daan a kopia Ti Pagwanawanan a naglaon iti adres ti sanga nga opisina dagiti Saksi ni Jehova iti Australia. Nagsuratak tapno agkiddaw ti tulong. Kas resultana, simmarungkar ti naasi ken naayat a Saksi. Idi agangay, inyadalannak iti Biblia.

Bayat ti panagadalko iti Biblia, naamirisko a masapul nga agbalbaliwak. Ti maysa a teksto a nakatignayak ket ti 2 Corinto 7:1. Iparparegta dayta a masapul a ‘dalusantayo ti bagbagitayo iti tunggal pakatulawan iti lasag.’

Inkeddengko nga isardeng ti agsigarilio ken aginum. Narigat ti agbalbaliw gapu ta nayugalikon dagitoy. Ngem determinadoak nga agbiag iti wagas a makaay-ayo iti Dios. Dakkel ti naitulong kaniak ti panangyaplikarko iti prinsipio a masarakan iti Roma 12:2: “Ket dikay agpaisukogen iti daytoy a sistema ti bambanag, no di ket agbalbaliwkayo babaen ti panangpabaroyo iti panunotyo.” Nabigbigko a masapul a baliwak ti panagpampanunotko tapno maisardengko ti bisiok ken ibilangko a makadangran dagita kas iti panangmatmat ti Dios. Babaen ti tulongna, naisardengko ti agsigarilio ken aginum.

Ngem narigatanak a mangisardeng iti panagsaok iti dakes. Naammuakon ti balakad ti Biblia a mabasa iti Efeso 4:29: “Saan koma a rummuar iti ngiwatyo ti rinuker a sasao.” Nupay kasta, saanko a naisardeng a dagus ti naalas a panagsasaok. Nakatulong kaniak ti panangutobko iti sasao ti Isaias 40:26. Kunaen dayta a bersikulo maipapan iti namituen a langit: “Itangadyo dagiti matayo sadi ngato ket kitaenyo. Siasino ti namarsua kadagitoy a banag? Isu Daydiay mangiruruar iti buyotda sigun a mismo iti bilang, isuda amin awaganna sigun a mismo iti nagan. Gapu iti kinaruay iti dinamiko nga enerhia, kasta met a yantangay isu nakired iti pannakabalin, awan uray maysa kadakuada ti mapukpukaw.” Naamirisko a no adda pannakabalin ti Dios a nangparsua iti naglawa nga uniberso—a kaay-ayok unay a buyaen—sigurado nga ikkannak iti bileg nga agbalbaliw tapno maay-ayok ti Dios. Babaen ti kararag ken panangikagumaak, in-inut a naisardengko ti naalas a panagsasaok.

Kas agay-aywan kadagiti animal, awan unay ti gundawayko a makisarita kadagiti tattao ta manmano idi ti tao iti rantso a pagtrabtrabahuak. Ngem babaen iti pannakasanay iti gimong dagiti Saksi ni Jehova, nasursurok nga iyebkas ti opinionko. Gapu iti dayta, kabaelakon nga iranud kadagiti sabsabali ti naimbag a damag maipapan iti Pagarian ti Dios.—Mateo 6:9, 10; 24:14.

Sumagmamanon a tawen nga agserserbiak kas panglakayen iti kongregasion. Ibilangko a pribilehio ti mangaramid iti amin a kabaelak a tumulong kadagiti kapammatiak. Ngem ti kasayaatan a bendision a sinagrapko ket kaduak nga agserserbi ken Jehova ti matalek ken nadungngo a baketko ken naguapo nga annakko.

Agyamanak ta uray nababa ti adalko insuronak ni Jehova. (Isaias 54:13) Umanamongak iti mabasa iti Proverbio 10:22: “Ti bendision ni Jehova—isu dayta ti mangpabaknang.” Segseggaanmi a sangapamiliaan ti makasursuro iti ad-adu pay maipapan ken Jehova ken agserbi kenkuana iti agnanayon.