Surat Manipud Madagascar

Kasla Napintas a Musika

AGTURTURONGKAMI ken lakayko iti baro a teritoriami kas misionero​—iti isla ti Madagascar. Nupay maldaangankami, pinatibkermi ti pakinakemmi a nagpakada kadagiti gagayyem ken kapamiliami. Nagtalekkami nga agbalin a nabunga ti trabahomi iti lugar a pangipanan ni Jehova kadakami.

Diminto pulos malipatan ti damo a gimong ti kongregasion iti baro a teritoriami. Ti kabsat a nangidaulo iti Panagadal iti Pagwanawanan ket kasla konduktor ti orkestra. Limitado ti ammomi iti lenguaheda isu a kasla napintas a musika dayta iti lapayagmi. Narigatankami a nagsursuro iti lenguaheda.

Idi damo a natarusak ti maysa a saludsod, dagus nga impukkawko ti sungbat. Nangngeg dayta dagiti kaabayko, ket nakakatawaak ngem inapputko ti ngiwatko. Nabainanak ngem naragsakak ta adda met la naawatakon!

Imbes koma a siak ti ulidan kadagiti kakabsat iti ministerio, siak metten ti tultulonganda. Siaanus nga insuroda ti sawek ken dagiti teksto nga aramatek tapno maawatan dagiti tattao ti ikaskasabak.

Malagipko nga iti maysa nga aldaw iti ministerio, adda ubing a nangipukkaw iti, “Vazaha! Vazaha!” Dayta ti gagangay nga awag dagiti Malagasy kadagiti “ganggannaet.” Pinartakanmi ti nagna tapno saan met nga agpukkaw ti dadduma nga ubbing. Ngem adda ubing a nakaunget iti agpukpukkaw, ket kinunana: “Saan a ganggannaet dayta, ammona ti lenguahetayo!” Impatarus ti kaduak a kabsat a babai ti imbagada ta diak maaw-awatan ti nagpartak a panagsaoda. Ngem naragsakak ta adda met la rinang-ayakon. Komportableak met laengen ditoy Madagascar.

No malidlidayak, maparparegtaak iti panangiparikna dagiti ubbing a magusgustuandak uray no saanko unay nga ammo ti makisarita kadakuada. Ipariknada dayta babaen ti panangiggemda iti imak. Talaga a bendision manipud ken Jehova dagiti agtutubo iti kongregasion.  Maysa a balasitang nga agnagan Hasina ti nagbalin a paraipatarusko. Kasla isu laeng ti kanayon a makatarus kaniak. Masansan a tulongannak no makisarsaritaak kadagiti kakabsat iti kongregasion babaen ti panangilawlawagna kadakuada no ania ti kayatko a sawen.

Naikamengkami ken lakayko iti kongregasion a dandani idin mabingay. Kaipapananna nga adda dagiti mayad-adalan iti Biblia a kasapulan a mayallatiw iti sabali a kakabsat gapu ta agnanaedda iti teritoria ti baro a kongregasion. Pinaregtanak ti maysa a kabsat a siak ti mangyadal iti maysa kadagiti iyad-adalanna. Nagamakak ken impapilitko a diak pay nakasagana, ngem naallukoynak. Impasiguradona kaniak a kabaelak dayta babaen iti tulong ni Jehova. Babaen iti naamo a matana ken simple laeng a sasao, imbagana kaniak a kabaelakto met laeng ti mangisuro iti pamay-an a kayatko. Naparegtaak unay iti kinunana.

Sipud idin, adun ti nagrang-ayan dayta a mayad-adalan iti Biblia. Iti maysa nga aldaw a rimmuarak, nakitak ida nga agassawa ket imbagana a mapanda agkasar tapno agbalin a legal ti panagasawada. Agad-adal metten ni lakayna, ket kayatda a ragpaten ti sumagmamano a naespirituan a kalat, pakairamanan ti panagpabautisar. Naragsakanak iti dayta, nupay ammok a saan a datayo no di ket ni Jehova ti makinggapuanan iti pannakayadani Kenkuana ti maysa a tao.

Adu ti nasursuromi iti daytoy baro a teritoriami. Nupay mailiwkami kadagiti gagayyem ken kapamiliami, mariknami a kasla kaduami ditoy ti sumagmamano kadakuada. Masansan nga iyestoriami ida kadagiti kakabsat ditoy, ket adda pay ketdin dagiti mangkomusta kadakuada. Il-iliwenmi ti tiempo inton agkaykaysa ken agaam-ammon dagiti kameng ti “pamiliami.”

Kasla musika pay laeng ti dengdenggek no agsao dagiti tattao ditoy. Ngem maawatak itan ti ibagbagada. Mangnamnamaak a madanggayakton ida iti kasla musika a lenguaheda inton nasayuden ti panagsaok. Kinuna ni Jesus: “Dikay pulos maringgoran maipapan iti sumaganad nga aldaw, ta ti sumaganad nga aldaw addaanto kadagiti bukodna a pakaringgoran.” (Mateo 6:34) Isu a saggaysa laeng a “nota,” wenno sao ti in-inut a sursuruenmi. Ket pagregreggetak a sansanayen ti lapayag, panunot, ken pusok tapno madanggayak dagiti naanus ken naayat a kakabsattayo ditoy Madagascar.

[Ladawan iti panid 25]

Mangaskasabakami ken Hasina