Ti Panangmatmat ti Biblia

Ania ti Materialismo?

NAIPASNGAY dagiti tattao nga agduyos kadagiti naespirituan a banag ken agannayasda nga agdayaw iti Dios. Nupay kasta, naparsua ti tao manipud kadagiti material nga elemento ken addaan kadagiti material a kasapulan ken panagduyos a mangtagiragsak iti material a bambanag. Nabaknang ti dadduma a Kristiano. Umdas kadin daytoy tapno maibaga a materialistiko ken nakapuy ti espiritualidadda? Iti kasumbangirna, nabilbileg aya ti espiritualidad dagidiay napanglaw ket ad-adda a dida agannayas nga agbalin a materialistiko?

Sigurado nga umanamongkayo a saan laeng a ti kinaadu ti kinabaknang wenno sanikua ti nailagum iti materialismo. Usigenyo dagiti sumaganad a pagarigan ti Biblia maipapan iti pudno a kaipapanan ti materialismo ken no kasano a liklikan dagiti peggad a pataudenna iti espiritualidad.

Nabaknang ken Natan-okda Idi

Adda sumagmamano a nabaknang ken natan-ok kadagiti matalek nga adipen ti Dios idi panawen ti Biblia. Kas pagarigan, ni Abraham ket “aduan unay idi kadagiti pangen ken pirak ken balitok.” (Genesis 13:2) Nagdinamag ni Job kas “ti kadakkelan kadagiti amin a taga Daya” gapu kadagiti naurnongna a pangen ken nagadu nga adipenna. (Job 1:3) Naaddaan dagiti ari ti Israel, a kas kada David ken Solomon, iti nawadwad a kinabaknang.​—1 Cronicas 29:1-5; 2 Cronicas 1:11, 12; Eclesiastes 2:4-9.

Dagiti nabaknang a Kristiano ket miembro ti kongregasion idi umuna a siglo. (1 Timoteo 6:17) Ni Lidia ket naawagan nga “aglaklako iti purpura, manipud iti siudad ti Tiatira ken managdaydayaw iti Dios.” (Aramid 16:14) Nangina ti tina a lila ken dagiti kawes a nakoloran iti dayta isu a masansan a babaknang wenno natan-ok laeng a tattao ti makabael iti dayta. Mabalin ngarud a nabaknang met ni Lidia.

Maigidiat iti dayta, addada nakapangpanglaw a matalek a managdaydayaw ken Jehova idi panawen ti Biblia. Dagiti natural a didigra, aksidente, ken ipapatay ti nangisagmak iti dadduma iti kinapanglaw. (Eclesiastes 9:11, 12) Nagrigat la ketdin kadagidi a nakurapay ti pannakakitada iti dadduma a mangtagtagiragsak iti kinabaknang wenno material a sanikua! Nupay kasta, di rumbeng nga ipatoda a materialistiko dagidiay nabaknang wenno ipapanda a dagidiay saan a nabaknang ket ad-adda a naan-anay nga agserserbida iti Dios. Apay? Usigenyo no ania ti ramut ti materialismo.

Ti Panagayat iti Kuarta

Sigun iti maysa a diksionario, ti materialismo kaipapananna ti “pannakakumikom wenno panangipangpangruna iti material imbes a kadagiti intelektual wenno naespirituan a banag.” No kasta, ti materialismo ket nairamut kadagiti tarigagay, ipangpangruna, ken ipampamaysatayo iti biag. Silalawag  a mapasingkedan daytoy kadagiti sumaganad a dua a pagarigan iti Biblia.

Ni Jehova binagbagaanna a naimbag ni Baruc, nga agserserbi idi a sekretario ni mammadto Jeremias. Mabalin a napanglaw ni Baruc gapu kadagiti kasasaad idiay Jerusalem ken ti nasinged a pannakikaduana iti saan a nalatak a ni Jeremias. Nupay kasta, napaliiw ni Jehova: “No maipapan kenka, agtultuloy nga isapsapulam ta bagim iti naindaklan a bambanag. Dika itultuloy ti agsapul.” Mabalin nga agbalbalin idin a materialistiko ni Baruc ta nangrugin a makumikom iti kinabaknang wenno material a kinatalged ti dadduma. Impalagip ni Jehova ken ni Baruc nga isut’ ispalenna iti sumungsungad idi a pannakadadael ti Jerusalem ngem dina ispalen dagiti sanikuana.​—Jeremias 45:4, 5.

Nangted ni Jesus iti ilustrasion maipapan iti lalaki a nakumikom met kadagiti material a banag. Impangpangruna daytoy a lalaki ti kinabaknangna imbes nga usarenna dayta a mangparang-ay iti panagserbina iti Dios. Kinuna ti nabaknang a lalaki: “Rakrakekto dagiti kamaligko ket mangbangonak iti daddadakkel, . . . ket kunaekto iti kararuak: ‘Kararua, addaanka iti adu a naimbag a banag a naidulin maipaay iti adu a tawen; agnam-ayka, manganka, uminumka, agragragsakka.’” Kalpasanna, kinuna ni Jesus: “Ngem kinuna kenkuana ti Dios, ‘Maysa a di nainkalintegan, iti daytoy a rabii kalikagumanda kenka ti kararuam. Asino, ngarud, ti agtagikua iti bambanag nga impempenmo?’ Kasta ti mapasamak iti tao nga agurnong iti gameng maipaay iti bagina ngem saan a nabaknang iti Dios.”​—Lucas 12:16-21.

Ania ti leksion kadagitoy dua a salaysay? Ipaawatda kadatayo a materialistiko ti maysa a tao, saan a gapu iti kaadu ti sanikuana, no di ket gapu iti panangipangpangrunana kadagiti material a banag. Kinuna ni apostol Pablo: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba. Ta ti ayat iti kuarta isu ti ramut dagiti amin a kita ti makadangran a bambanag, ket babaen ti panangragpat iti daytoy nga ayat nayaw-awan ti sumagmamano manipud iti pammati ket sinalputda ti intero a bagbagida iti adu nga ut-ot.” (1 Timoteo 6:9, 10) Mangpataud kadagiti problema ti determinasion a bumaknang ken ti panagayat kadagiti material a banag.

Kasapulan ti Panangsukimat iti Bagi

Siaannad a liklikan dagiti Kristiano ti silo ti materialismo aniaman ti kasasaadda iti biag. Ti pannakabalin ti kinabaknang ket makaallilaw ken mabalin a makalapped iti espiritualidad. (Mateo 13:22) Mabalin a ditay mapupuotan ti panangipangpangrunatayo kadagiti material a banag imbes a kadagiti naespirituan a banag, ket nakalkaldaang dagiti pagbanaganna.​—Proverbio 28:20; Eclesiastes 5:10.

Gapuna, rumbeng a sukimaten dagiti Kristiano no ania ti ipangpangruna ken ipampamaysada iti biag. Bassit man wenno adu ti sanikua dagiti naespirituan ti panagpampanunotda a tattao, ikagumaanda nga iyaplikar ti imbalakad ni Pablo nga isadagda ti namnamada “saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo.”​—1 Timoteo 6:17-19.