Ipakita ti padto ti Biblia ken ti historia a talaga a nangrugi ti panagturay ni Jesus idiay langit kas Ari idi 1914, a mangtanda iti panangrugi ti maudi nga al-aldaw ti sistema ni Satanas ditoy daga. Ania ti inaramid ni Jesus apaman a nadutokan kas Ari? Winayawayaanna kadi a dagus dagiti adipenna ditoy daga iti pannakaadipenda iti Babilonia a Dakkel? Dinutokanna kadi ti ‘matalek ken masirib nga adipenna’ idi 1914 ken rinugianna ti nasaknap a trabaho a panagani?—Mat. 24:45.

Nalawag a saan. Laglagipenyo nga impaisurat ti Dios ken apostol Pedro a ti panangukom ket ‘mangrugi iti balay ti Dios.’ (1 Ped. 4:17) Umasping iti dayta, impadto ni propeta Malakias ti tiempo nga umay ni Jehova iti balay a pagdaydayawan kenkuana a kaduana “ti mensahero ti tulag,” ti Anak ti Dios. (Mal. 3:1-5) Dayta ket tiempo ti pannakapasudi ken pannakasubok. Maitunos kadi dayta a padto iti historia?

 Wen! Ti 1914 agingga iti rugrugi ti 1919 ket narigat a tiempo ti pannakasubok ken pannakapasudi para kadagiti Estudiante ti Biblia, kas awag idi kadagiti Saksi ni Jehova. Idi 1914, naupay ti adu a kameng ti ili ti Dios ditoy daga idi saan a dimteng ti panungpalan ti sistema kas iti ninamnamada. Idi 1916, kimmaro ti pannakaupayda ta natay ni Charles T. Russell, a sipapasnek a nangidaulo iti ili ti Dios. Dadduma a nakasingsinged ken Brother Russell ti bimmusor unay kadagiti panagregget ni Joseph F. Rutherford, a simmaruno ken Brother Russell a nangidaulo. Timmaud dagiti panagsisina a dandani nangdadael iti organisasion idi 1917. Kalpasanna, idi 1918, ni Brother Rutherford ken ti pito a kakaduana ket nabista, nasentensiaan iti di umiso nga akusasion, ken naibalud a nalawag a gapu iti panangsugsog dagiti lider ti relihion. Naiserra ti hedkuarter idiay Brooklyn. Nalawag a saan pay idi a nawayawayaan ti ili ti Dios iti Babilonia a Dakkel!

Ngem ania ti napasamak idi 1919? Nagbiit a nagbalbaliw ti situasion! Iti rugrugi ti tawen, naparuaren iti pagbaludan ni Brother Rutherford ken dagiti kakaduana. Nagsublida a dagus iti trabahoda! Insigida nga implanoda a maangay ti nakallalagip a kombension, ken nangrugin a naipablaak ti baro a magasin a The Golden Age (Agriingkayo! itan). Nadisenio dayta a baro a magasin a mausar iti panangasaba. Iti tunggal kongregasion, adda met manangaywan a nadutokan a mangorganisar ken mangidaulo iti ministerio. Iti dayta met la a tawen, naipablaak ti Bulletin (Panagbiag ken Ministeriotayo kas Kristiano—Workbook iti Gimong itan) a tumulong iti pannakaorganisar ti trabaho a panangasaba.

Ania ti napasamak? Nalawag a winayawayaan ni Kristo ti ilina iti panangadipen ti Babilonia a Dakkel. Dinutokanna ti matalek ken masirib nga adipenna. Madama idin ti trabaho a panagani. Manipud iti dayta a napateg a tawen ti 1919, kasta unayen ti irarang-ay ti trabaho.