Kaibagbaga ni Jesus kadagiti dimngeg kenkuana idiay Perea nga “adunto ti umuna a maudi ken adu ti maudi nga umuna.” (Mateo 19:30) Impaganetgetna dayta babaen ti ilustrasion maipapan kadagiti trabahador iti kaubasan.

Kinunana: “Ti Pagarian ti langit ket mayarig iti maysa a tao nga addaan iti kaubasan, a nasapa a rimmuar iti bigat tapno agbirok kadagiti trabahador a tangdananna. Kalpasan ti pannakitulagna a tangdananna ida iti maysa a denario iti maysa nga aldaw, imbaonna ida iti kaubasanna. Rimmuar met iti agarup alas nuebe ti bigat ket nakitana dagiti agtaktakder iti pagtagilakuan nga awan ti ar-aramidenda. Kinunana kadakuada, ‘Mapankayo met iti kaubasak, ket itedkonto ti rumbeng a tangdanyo.’ Iti kasta, napanda. Rimmuar manen iti agarup alas dose ti aldaw ken alas tres ti malem ket nagbirok iti dadduma pay a trabahador. Rimmuar pay iti agarup alas singko ti malem ket adda dagiti nasarakanna nga agtaktakder, ket kinunana kadakuada, ‘Apay nga agtaktakderkayo ditoy nga agmalmalem nga awan ti ar-aramidenyo?’ Insungbatda, ‘Awan met ngamin ti nangayab kadakami nga agtrabaho.’ Kinunana kadakuada, ‘Inkayo met iti kaubasak.’”​—Mateo 20:​1-7.

Idi dinakamat ni Jesus “ti Pagarian ti langit” ken ti “addaan iti kaubasan,” mabalin a ni Jehova a Dios ti pampanunoten dagiti dumdumngeg kenkuana. Ibaga ti Kasuratan a ni Jehova ti makinkukua iti kaubasan, ti nasion ti Israel. (Salmo 80:​8, 9; Isaias 5:​3, 4) Dagiti adda iti sidong ti Linteg ti tulag ket nayarigda kadagiti trabahador iti kaubasan. Ngem saan nga iladladawan ni Jesus ti napalabas. Iladladawanna ti kasasaad idi panawenna.

Dagiti lider ti relihion, kas kadagiti Fariseo a nabiit pay a nangsubok kenkuana maipapan iti diborsio, ket agtultuloy koma nga agserbida iti Dios. Mayarigda kadagiti agtrabtrabaho iti agmalmalem ket namnamaenda a matangdananda iti maysa a denario para iti agmalem a panagtrabahoda.

Dagiti padi ken dadduma iti daytoy a grupo ibilangda dagiti gagangay a Judio kas bassit laeng ti panagserbida iti Dios, kas iti trabahador nga agtrabaho iti sumagmamano nga oras wenno maysa laeng nga oras iti kaubasan ti Dios. Iti ilustrasion ni Jesus, dagitoy dagiti nagtrabaho “iti agarup alas nuebe ti bigat” wenno naladladaw pay iti dayta nga aldaw​—iti alas dose, alas tres, ken kalpasanna iti alas singko ti malem.

Dagiti lallaki ken babbai a sumursurot ken Jesus ket maibilangda a “nailunod a tattao.” (Juan 7:49) Ngamin, mangngalap wenno trabahador ti kaaduan kadakuada. Kalpasanna, idi otonio ti 29 C.E., ti “addaan iti kaubasan” imbaonna ni Jesus a mangawis kadagitoy nanumo a tattao nga agtrabaho para iti Dios kas adalan ni Kristo. Dagitoy dagiti “maudi” a dinakamat ni Jesus a nagtrabaho iti kaubasan iti alas singko ti malem.

Iti maudi a paset ti ilustrasion ni Jesus, imbagana ti napasamak idi nalpasen ti panagtrabaho: “Idi rumabiin, kinuna ti makinkukua iti kaubasan iti katalekna, ‘Ayabam dagiti trabahador ket itedmo ti tangdanda. Iyun-unam dagiti naud-udi a naayaban sa iyud-udim dagiti immun-una.’ Idi immay dagiti naayaban iti alas singko ti malem, naikkanda iti saggaysa a denario. Isu nga idi immay dagiti immuna a naayaban, impagarupda a dakdakkel ti tangdanda, ngem naikkanda iti saggaysa laeng a denario. Idi maawatda dayta, nagreklamoda iti makinkukua iti kaubasan ket kinunada, ‘Maysa nga oras laeng a nagtrabaho dagiti naudi nga immay, ngem impadam kadakami ti tangdanda nupay nagrigrigatkami a nagtrabaho nga agmalmalem iti kapudotan!’ Ngem insungbatna iti maysa kadakuada, ‘Gayyem, awan ti dakes nga inaramidko kenka. Saan kadi a nagtulagta a maysa a denario ti tangdanmo? Alaem ti tangdanmo ket inkan. Kayatko nga ited iti naud-udi nga immay ti kas iti tangdanmo. Awan aya ti kalintegak a mangaramid iti kayatko iti sanikuak? Wenno umapalka  kadi, gapu ta naimbagak?’ Kalpasanna, kinuna ni Jesus: “Dagiti naudi umunadanto ket dagiti immuna maudidanto.”​—Mateo 20:​8-16.

Mabalin a pampanunoten dagiti adalan ti maudi a paset ti ilustrasion ni Jesus. Kasano a dagiti Judio a lider ti relihion, a mangibilang iti bagida nga ‘umuna,’ agbalindanto a ‘maudi’? Ket kasano nga agbalinto dagiti adalan ni Jesus nga ‘umuna’?

Dagiti adalan ni Jesus, nga ibilang dagiti Fariseo ken ti dadduma kas ‘maudi,’ naayabanda nga ‘umuna’ nga umawat iti naan-anay a tangdan. Idi natay ni Jesus, nabaybay-an ti Jerusalem ditoy daga, ngem nangpili ti Dios iti baro a nasion, ti “Israel ti Dios.” (Galacia 6:16; Mateo 23:38) Tinukoy ni Juan a Mammautisar dayta idi imbagana ti maipapan iti pannakabautisar iti nasantuan nga espiritu. Dagiti “naudi” ti immuna nga immawat iti dayta a pannakabautisar ken naikkan iti pribilehio nga agbalin a saksi ni Jesus “iti kaadaywan a paset ti daga.” (Aramid 1:​5, 8; Mateo 3:11) No naawatan dagiti adalan ti dakkel a panagbalbaliw nga imbaga ni Jesus, mabalin a ninamnamada a nakaro ti pananggura kadakuada dagiti lider ti relihion, a nagbalin a ‘maudi.’