ADDADA tattao nga agkuna a dagiti laeng makitada ti patienda. Ngem minamaag dayta. Nakaad-adu ti agpaypayso a banag a ditay pay pulos nakita. Makaibagaka kadi iti maysa kadagita?—

Ti ngay angin nga ang-angsentayo? Mariknatayo aya dayta?— Ingatom ta imam, sa puyotam. Adda kadi mariknam?— Adda, ngem makitam kadi ti angin?—

Napagsaritaantan ti maipapan kadagiti espiritu a persona, a ditay makita. Naammuanta a dadduma kadagita ti naimbag ngem dakes dagiti dadduma. Mangibagaka man iti sumagmamano a naimbag nga espiritu a persona a ditay makita.— Wen, ni Jehova a Dios, ni Jesus, ken dagiti naimbag nga anghel. Addada met kadi dakes nga anghel?— Kuna ti Biblia nga adda. Ibagam man kaniak no ania ti nasursurom maipapan kadakuada.—

Ti maysa a naammuanta ket agpadpada a napigpigsa ngem kadatayo dagiti naimbag ken dakes nga anghel. Adu ti ammo ti Naindaklan a Mannursuro maipapan kadagiti anghel. Dati ngamin nga anghel sakbay a nayanak kas maladaga ditoy daga. Agnanaed idi idiay langit a kaduana dagiti dadduma pay nga anghel. Minilion kadakuada ti am-ammona. Adda kadi nagan amin dagitoy nga anghel?—

Naammuanta a pinanaganan ti Dios dagiti bituen. Isu a masiguradotayo nga adda met nagan dagiti amin nga anghel. Ken ammotayo a makapagsasaritada gapu ta kuna ti Biblia nga adda ‘pagsasao dagiti anghel.’ (1 Corinto 13:1) Ania ti ammom a pagsasaritaan dagiti anghel? Pagsasaritaanda ngata ti maipapan kadatayo ditoy daga?—

 Ammotayo a dagiti anghel ni Satanas, dagiti demonio, ikagkagumaandatayo nga allilawen a sumukir ken Jehova. Gapuna, sigurado a pagsasaritaanda no kasanoda nga aramiden daytoy. Kayatda a tuladentay ida tapno kaguranatayo met ni Jehova. Ngem dagidiay ngay matalek nga anghel ti Dios? Panagkunam pagsasaritaandatayo met ngata?— Wen, agpayso dayta. Kayatdatayo a tulongan. Ilawlawagko kenka no kasano a tinulongan ti sumagmamano nga anghel ti Dios dagiti tattao a nagayat ken Jehova ken nagserbi kenkuana.

Kas pagarigan, adda maysa a lalaki nga agnagan Daniel nga agnanaed idi idiay Babilonia. Awan panagayatda ken Jehova dagiti adu a tattao sadiay. Nangaramidda pay ketdi iti linteg a mangdusa iti asinoman nga agkararag ken Jehova a Dios. Ngem saan a namingga ni Daniel a nagkarkararag ken Jehova. Ammom kadi no ania ti inaramidda ken Daniel?—

Wen, dagiti dakes a tattao impaipisokda ni Daniel iti rukib dagiti leon. Dagiti laeng mabisbisin a leon ti kadua ni Daniel sadiay. Ammom kadi  ti napasamak kalpasanna?— Ti “Dios imbaonna ti anghelna ket kinaemna ti ngiwat dagiti leon,” kinuna ni Daniel. Saan a pulos a nadangran! Makaaramid dagiti anghel iti nakaskasdaaw a bambanag para kadagidiay agserserbi ken Jehova.​​—Daniel 6:​18-​22.

Kasta met, adda tiempo a naibalud idi ni Pedro. No malagipmo, aggayyem idi da Pedro ken ti Naindaklan a Mannursuro, ni Jesu-Kristo. Nakapungtot ti dadduma a tattao idi imbaga ni Pedro a ni Jesus ket Anak ti Dios. Gapuna, imbaludda ni Pedro. Binantayan dagiti soldado ni Pedro tapno sigurado a saan a makalibas. Adda kadi makatulong kenkuana?—

Matmaturog ni Pedro iti nagbaetan ti dua a guardia, ken nakakawar dagiti imana. Ngem kuna ti Biblia: ‘Adtoy! Immay ti anghel ni Jehova,  ket adda lawag a nagsilnag iti selda ti pagbaludan. Idi sinagidna ti bakrang ni Pedro, riniing ti anghel, a kunkunana: “Darasem ti tumakder!”’

Kalpasanna, naikkat dagiti kawar iti ima ni Pedro! Ket kinuna kenkuana ti anghel: ‘Agaruatka, isuotmo dagita pallokam, ket surotennak.’ Saan a maatipa ida dagiti guardia gapu ta ti anghel ti tumultulong ken Pedro. Idi nakagtengdan iti landok a ruangan, adda karkarna a napasamak. Naglukat lattan ti ruangan! Dayta nga anghel ti nangluk-at ken Pedro tapno makapagtultuloy a mangasaba.​​—Aramid 12:​3-​11.

Matulongandatayo met kadi dagiti anghel ti Dios?— Wen, matulongandatayo. Kayatna kadi a sawen a dida pulos itulok a madangrantayo?— Saan. Saandatayo a salakniban dagiti anghel no ditay agan-annad. Ngem uray naannadtayo, mabalin a madangrantayo latta. Saan a trabaho dagiti anghel ti mangsalaknib kadatayo. Imbes ketdi, adda naisangsangayan nga impatrabaho ti Dios kadakuada.

Dakamaten ti Biblia ti maipapan iti maysa nga anghel a mangibagbaga kadagiti tattao iti isuamin a lugar a dayawenda ti Dios. (Apocalipsis 14:​6, 7) Kasano ti panangibaga dagiti anghel iti dayta kadakuada? Agpukkaw aya manipud langit tapno mangngeg ti isuamin?— Saan. Imbes ketdi, dagiti pasurot ni Jesus ditoy daga ti makisao kadagiti sabsabali maipapan iti Dios, ket dagiti anghel ti mangiwanwan kadakuada iti trabahoda. Siguraduen dagiti anghel a maikkan iti gundaway a dumngeg dagidiay talaga nga agtarigagay a mangammo iti Dios. Mabalintayo ti makiraman iti dayta a trabaho a panangasaba, ket dagiti anghel ti tumulong kadatayo.

Ngem ania ngay no riribukendatayo dagiti tattao a di agayat iti Dios? Ania ngay no ibaluddatayo? Luk-atandatayo aya dagiti anghel?— Kabaelanda. Ngem saan a kankanayon a kasta ti aramidenda.

Adda idi tiempo a naibalud ti pasurot ni Jesus a ni Pablo. Nakalugan idi iti barangay kabayatan ti nadawel a bagyo. Ngem saan a winayawayaan a dagus dagiti anghel. Adda pay ngamin dadduma a tattao a nasken  a makangngeg maipapan iti Dios. Kinuna ti anghel: “Dika agbuteng, Pablo. Masapul nga agtakderka iti saklang ni Cesar.” Wen, masapul a maipan ni Pablo iti agturay iti lubong a ni Cesar tapno makasabaanna. Kanayon nga ammo dagiti anghel ti ayan ni Pablo, ket tinulonganda. Tulongandatayo met no talaga nga agserbitayo iti Dios.​​—Aramid 27:23-​25.

Adda pay sabali a napateg a trabaho nga aramiden dagiti anghel, ket dandanidan aramiden dayta. Nakaas-asidegen ti panangdadael ti Dios kadagiti nadangkes a tattao. Madadaelto amin dagiti di agdaydayaw iti pudno a Dios. Maammuandanto a nagbiddutda dagidiay agkunkuna a dida mamati kadagiti anghel gapu ta dida makita ida.​​—2 Tesalonica 1:​6-8.

Anianto ti kaipapanan dayta kadatayo?— No kakaduatayo dagiti anghel ti Dios, tulongandatayo. Ngem kakaduatayo aya ida?— Kakaduatayo ida no agserserbitayo ken Jehova. Ket no agserserbitayo ken Jehova, ibagatayo kadagiti sabsabali nga agserbida met kenkuana.