PASET 1
“Birokekto ti Napukaw”
Madandanagan ti karnero. Bayat nga agar-arab iti karuotan, nayadayo kadagiti kakaduana agingga a saannan a makita ida ken uray ti pastor. Sumipngeten. Napukaw ti awan gawgawayna a karnero ket nakadanon iti lugar a pagdakdakiwasan dagiti narungsot nga animal. Idi kuan, adda nangngegna a pamiliar a timek. Timek dayta ti pastor nga agtartaray nga umasideg iti karnero. Sinakruy ti pastor ti karnero sana inyawid.
MAULIT-ULIT nga inyarig ni Jehova ti bagina iti kasta a pastor. Kas mabasatayo iti Biblia, impanamnamana kadatayo: “Birokekto a mismo dagiti karnerok, ket aywanak ida.”—Ezekiel 34:11, 12.
“Dagiti Karnero nga Ay-aywanak”
Siasino dagiti karnero ni Jehova? Dagiti tattao a mangay-ayat ken agdaydayaw kenkuana. Kuna ti Biblia: “Agdaydayaw ken agruknoytayo kenkuana; agparintumengtayo ken Jehova a Nangaramid kadatayo. Ta isu ti Diostayo, ket datayo ti tattao nga ipaspastoranna, kaslatayo kadagiti karnero nga adda iti aywanna.” (Salmo 95:6, 7) Kas iti literal a karnero nga agtultulnog iti pastorna, magagaran dagiti adipen ni Jehova nga agtulnog iti Pastorda. Awan kadi ti pagkamalianda? Adda. No dadduma mayarig dagiti adipen ti Dios kadagiti karnero a “naiwarawara,” “napukaw,” ken “nayaw-awan.” (Ezekiel 34:12; Mateo 15:24; 1 Pedro 2:25) Ngem uray no umadayo ti maysa, mangnamnama latta ni Jehova a makasublinto.
Mariknam kadi pay laeng a ni Jehova ti Pastormo? Kasano nga ipakpakita ita ni Jehova nga isu ket maysa a Pastor? Usigem ti tallo a pamay-an:
Ipapaayannatayo iti naespirituan a taraon. “Pakanekto ida iti nasayaat a pagpastoran,” kuna ni Jehova. “Aginanadanto iti nasayaat a disso a pagaraban, ket agarabdanto kadagiti nasayaat a pagpastoran.” (Ezekiel 34:14) Saan pay a pulos naglangan ni Jehova a mangipaay iti makapabileg ken nagduduma a naintiempuan a naespirituan a taraon. Adda kadi malagipmo nga artikulo, palawag, wenno video a sungbat ti kararagmo? Saan kadi a pammaneknek dayta a talaga nga ipatpategnaka ni Jehova?
Salsalakniban ken tultulongannatayo. Inkari ni Jehova: “Isublikto ti nayaw-awan, bedbedakto ti nasugatan, ken papigsaekto ti masakit.” (Ezekiel 34:16) Papigsaen ni Jehova dagidiay kasla saandan a kabaelan nga ibturan ti adu a problema. No nasaktan ti karnerona—nalabit gapu iti maysa a kabsat—bedbedanna, kayatna a sawen tulonganna a mangiliwliwag iti dayta. Isublina met dagidiay nayaw-awan ken mabalin a maparparigatan gapu iti negatibo a rikna.
Ipatpategnatayo. “Ispalekto ida iti amin a lugar a nakaiwarawaraanda,” kuna ni Jehova. “Birokekto ti napukaw.” (Ezekiel 34:12, 16) Para ken Jehova, adda latta namnama ti napukaw a karnero. Ammona no adda mapukpukaw ket birokenna dayta. Maragsakan unay no mabirokanna ti karnero. (Mateo 18:12-14) Kinapudnona, awaganna dagiti pudno nga agdaydayaw kenkuana kas “karnerok, dagiti karnero nga ay-aywanak.” (Ezekiel 34:31) Maysaka kadagita a karnero.
Para ken Jehova, adda latta namnama ti napukaw a karnero. Maragsakan unay no mabirokanna dayta a karnero
“Pabaruem Dagiti Aldawmi a Kas Idi Un-unana”
Apay a birbiroken ken aw-awisennaka ni Jehova nga agsubli kenkuana? Kayatna ngamin nga agbalinka a naragsak. Inkarina nga arigna “agbuyatto dagiti bendision a kas iti tudo” kadagiti karnerona. (Ezekiel 34:26) Sigurado a tungpalenna dayta! Napaneknekamon dayta.
Lagipem dagiti kapadasam idi naam-ammom ni Jehova. Kas pagarigan, ania ti nariknam idi naammuam ti nagan ti Dios ken ti panggepna para kadagiti tattao? Malagipmo kadi no kasano karagsak ti makikadua kadagiti padam a Kristiano iti asamblea ken kombension? Idi adda nakasabaam nga interesado, saan kadi a nakaragragsakka a nagawid?
Mabalin a mariknam manen ti kasta a ragsak. “Isublinakami kenka, O Jehova,” inkararag dagiti nagkauna nga adipen ti Dios, “ket nakasaganakami nga agsubli kenka. Pabaruem dagiti aldawmi a kas idi un-unana.” (Un-unnoy 5:21) Sinungbatan ni Jehova dayta a kararag, ket nagsubli dagiti adipenna tapno agserbida kenkuana nga addaan iti napabaro a ragsak. (Nehemias 8:17) Kasta met laeng ti aramiden ni Jehova kenka.
Nupay kasta, saan a kaskarina ti agsubli ken Jehova. Usigem ti dadduma a karit iti panagsubli ken no kasano a mapagballigiam dagita.
