DISIEMBRE 7, 2020
UNITED STATES
Dagiti Agtutubo—Ad-adda a Gimmaget iti Ministerio iti Laksid ti Pandemia
Nangngeg ni Mike Iwuchukwu nga agdardaras a bimmaba iti agdan ti anakna a ni Melody bayat ti lunch break ti online schooling-na. Siniripna no apay nga agdardaras ti innem ti tawenna nga anakna. Impagarupna a mangmangan iti sandwich wenno agay-ayam. Ngem nasdaaw iti nakitana.
Imbaga ni Mike: “Nakatugaw ti anakko iti sango ti laptop-na ken iggemna ti libro a Dagiti Leksion a Masursurom iti Biblia, ken adda tallo a kaklasena a dumdumngeg kenkuana. Kuna ni Melody nga iyad-adalanna ida iti Biblia.”
Idi pay Septiembre 2020 a kayat ni Melody ti maaddaan iti iyad-adalan iti Biblia idi nagbalin nga online ti klaseda iti eskuelaanda iti Houston, Texas, gapu iti pandemia. Nagkarkararag ken Jehova ken nangbirok kadagiti oportunidad a makairugi kadagiti panangyadal iti Biblia.
Pirmi ti ragsak ni Mike ken ti asawana a ni Octavia. Imbaga ni Mike: “Kanayon nga iyes-estoria ni Melody kadagiti kaklasena ti maipapan ken Jehova. Ngem ad-adda manen ti ragsakmi idi nakitami a mangyad-adal iti Biblia ti anakmi.”
Regular nga iyad-adalan ni Melody dagiti kaklasena. Imbagana: “Naisurok kadakuadan ti maipapan iti Paraiso ken ti maipapan ken Jesus. Kayatko nga agbalinda a Saksi ni Jehova!”
Nagaget met a mangasaba ti siam ti tawenna a ni Samuel Molnar a taga-Ingleside, Illinois.
Idi nadamagna a nakasabaan ti maysa a kabsat ti kaarrubana uray iti alad laeng, kayat met ni Samuel a tuladen dayta. Idi nakitana nga agay-ayam ti apoko ti kaarrubada iti bangir ti alad, sinaludsodna no kayatna a maammuan ti maipapan iti Paraiso. Idi immanamong ti ubing, nagtaray ni Samuel a napan nangala iti kopia Ti Librok dagiti Estoria ti Biblia.
Ni Samuel Molnar, nga agtawen iti siam, a nakaiggem iti kopia Ti Librok dagiti Estoria ti Biblia
Kuna ni Samuel: “Imbagak kenkuana nga iti masanguanan, mabalinnanton ti makiay-ayam kadagiti animal a saan a maan-ano. Kalpasanna, imbasak kenkuana ti salaysay maipapan ken Daniel iti rukib dagiti leon.”
Saan la a dayta ti inaramid ni Samuel. Nangipatulod pay kadagiti surat maipapan kadagiti aktibidad ken video nga adda iti jw.org. Nagtulagda a dua a mangbasada iti sabali pay nga estoria ti Biblia inton agkitada manen.
Maragragsakan ni Samuel iti kapadasanna ken adda manen sabali a kayatna nga aramiden. Kunana: “Kayatko nga adalen ti amin a tract nga adda iti Toolbox iti Panangisuro tapno maisurok dagita iti sabsabali.”
Adda tallo nga ubbing iti Houston a nangragpat iti naespirituan a kalat: ti panag-auxiliary pioneer bayat ti bakasionda.
Idi Agosto, ni Joselyn Horta, agtawen iti 13; ni Melanie Alvarez, agtawen iti 12; ken ni Chloe Rodriguez, agtawen iti 10, ket nag-videoconference tapno agaramidda kadagiti surat. Maminlima iti makalawas nga ar-aramidenda dayta ken mangrugrugida iti 7:00 ti bigat.
Ni Sister Chloe Rodriguez (makimbaba a kannigid), ni Sister Melanie Alvarez (makinngato a kannigid), ken ni Sister Joselyn Horta (kannawan)
Imbaga ni Joselyn: “Agsasarita ken aggigiddankami a mangan sa no 7:30 ti bigat, mangrugikamin nga agaramid kadagiti surat.” No naladaw a makariing ti maysa kadakuada, teksan ti dua ket ibagada: “Good morning! Agriingkan! Mangasabatayon!”
Saanda laeng a naparegta ti maysa ken maysa, naparegtada pay dagiti gagayyem ken kapamiliada. Imbaga ni Alicia, a nanang ni Joselyn: “No dadduma, masadutak a mangasaba. Ngem no makitak ni Joselyn a mangaskasaba, ibagbagak iti bagik, ‘Kayatko met ti mangasaba!’”
Sigurado a maragragsakan ti puso ni Jehova a makakitkita kadagiti agtutubo a mangar-aramid iti amin a kabaelanda a makiraman iti ministerio bayat ti pandemia.—Proverbio 27:11.
