NEW YORK—Ti immuna iti tallo nga aldaw nga “Itultuloyyo a Sapulen nga Umuna ti Pagarian ti Dios!” nga internasional a kombension dagiti Saksi ni Jehova ket mangrugi iti agsapa ti Biernes, Hunio 6, 2014, idiay Ford Field iti Detroit, Michigan, USA. Dagiti paset ti programa ket maibrodkas iti dadduma pay a lugar iti Arizona, California, Florida, Illinois, Missouri, New Jersey, ken North Carolina, ken maipatarus iti Albanian, Korean, Polish, ken Portuguese.

Kuna ni J. R. Brown a pannakangiwat dagiti Saksi ni Jehova iti sangalubongan a hedkuarterda iti Brooklyn, New York: “Iti napalabas a tallo a lawas, dagiti Saksi iti Detroit ken kadagiti siudad a maikonektar babaen iti video streaming ket personal a mangaw-awis kadagiti kaarrubada a tumabuno iti daytoy espesial nga okasion. Iti Detroit, namnamaenmi ti idadar-ay ti nadumaduma a kita ti tattao nga agarup 45,000, agraman ti nasurok 2,000 a delegado manipud Australia, Canada, Germany, ken Taiwan.”

Iti intero a kalgaw, mangangay dagiti Saksi iti United States iti 16 nga internasional a kombension kadagiti dadakkel nga istadium iti 10 a nadumaduma nga estado. Iti dadduma a lugar, maiparang ti intero wenno dadduma a paset ti programa iti Albanian, American Sign Language, Arabic, Armenian, Cantonese, Chuukese, French, Greek, Haitian Creole, Hindi, Iloko, Indonesian, Italian, Japanese, Korean, Mandarin, Marshallese, Persian, Polish, Romanian, Russian, Samoan, Spanish, Tagalog, Twi, ken Vietnamese. Manipud Hunio 2014 agingga iti 2015, mangangay dagiti Saksi kadagiti internasional a kombension idiay Australia, Ecuador, England, Germany, Greece, Mexico, South Korea, ken Zimbabwe.

Media Contact(s):

International: J. R. Brown, Office of Public Information, tel. +1 718 560 5000