Ubi ochu meji k’abo Israẹl kw’ojanẹ Ijipt, ma le wa jọ iba Uwo Sainai. Jihofa dọ Mosis w’ojuwo, i ka ñwu kakini: ‘Omi gb’abo Israẹl tane kwefu ọwọ abo Ijipt. Ichẹñwu ku mẹ leb’ọda mi ku mẹ la agb’omu-mi gbọ, amẹ ach’abo-mi k’u nẹ.’ Taki Mosis mu dabi w’ugbo abo Israẹl, oñ i ka ñwu ma ẹñwu ki Jihofa ka. Abu ma dohi le? Ma dohi kakini: ‘Eñwu du ki Jihofa ka k’a che, oñ ana che.’

Mosis mu dabi t’ojuwo lẹ gẹ. Ọmọ lẹ Jihofa ñwu kakini: ‘Ọjọ mẹta ki awa-i, na k’ọla kp’uwẹ. Lo na d’ufeti ñwu ma ku ma we w’ojuwo Sainai.’ Mosis mu dabi tanẹ ny’ugbo abo Israẹl, i ka ñwu ma ku ma f’ọla mu tanẹ nede Jihofa.

Ọjọ ẹkẹta lẹ, abo Israẹl li ọmamanya kpai akpa ki chubi oj’uwo. Ma ñọ gbọ alu k’akpabana kpai ọkakachi akọla taa. Jihofa la gwọru w’ojuwo lẹ lef una. Abo Israẹl chanẹ ech’okpo nyọnyọ, ọla-ma la chanẹ ega. Uwo lẹ la chanẹ emiejo nyọnyọ, odudu la b’oji-wñ ma. Tak ukọla ọkakachi lẹ chanẹ enana nyọgba. Tak Ọjọ ka ñwu ma kakini: ‘Omi che Jihofa, mẹ ki r’amọjọ omunẹ n.’

Mosis ñọ mu dabi t’ojuwo lẹ, Jihofa la d’amọla ọda-wñ ñwu Mosis ki du ñwu abo Israẹl lugbo ọna ki dukpẹ ku ma r’Ọ kpai alu ki dukpẹ ku ma che le. Mosis f’amọla-ọda lẹ kọ janẹ, i la fu gba ñwu abo Israẹl. Taku ma gbalu kakini: ‘A achẹñwu duu ki Jihofa ka ñwu wa k’a che.’ Ochochi, ma che gbalu ñwu Ọjọ. Ama, ma che chẹñwu ku ma gbalu?