IMosisi bala Ẹrọn bajẹ kaka ya ẹrụ nya Ohe je iFero. Ị byoo yẹkẹẹ: ‘Kori ká pẹhi angịnyị nyam kị ka rụ ka, m̀ ka du ịjị wẹ ọpyị nyang.’ Iru nya ịjị mwụ́ bwọọọ ju ka ẹpwa nya ala Ijipiti, ẹpwa nya alụdụ tụ́ ịnya alẹbyahị nyaa. Ijipiti wuu ri ịjị-ịjị. Ma ọjị ọlẹlẹhẹ á juwa ọ-ọpyị nya iGochin, ẹga ọlẹ ká ala Isirẹlụ kụ ka. Akama ohene ọwẹ bala ịkịla ịlẹ kị wẹ ẹ-ẹkpẹ nyamwụ ba ẹ-ẹga nya ala Ijipiti kem ịnyị. IFero bịlẹ yẹkẹẹ: ‘Chuchuu bịlẹ iJihova kọ ku ịjị ịwẹ rụ hiihi mẹ. Angịnyị nyanụ ka rụ myị́ lẹ.’ Ma ụka ká iJihova họ ká ịjị ịwẹ rụ hi ọpyị nya Ijipiti kpá, iFero yẹ irya da. Ẹnịyẹ iFero à tị́ ka jẹ́ ẹla mẹ?

IJihova yẹkẹẹ: ‘Kori ká iFero á pẹhi angịnyị nyam ka aalẹ, iyo ileji nya ala Ijipiti ka jụ ẹdụrụ kpụ ị ka gbu.’ Ahyẹẹnụ ọ-ba ọọwa ba lẹ, iyo ileji nyaa à dọmwụ nyọka gbu lẹlẹ. Ma iyo ileji nya ala Isirẹlụ á tị gbu ka. Kpọkpọọkpọ, iFero kịnyaa la ọ-ka la egbeju ọngịrị. Ọ́ họ jaabwọ ká iJihova byoo nyị họ ka.

Ọọwa lẹ, iJihova à byi iMosisi nyị tịrẹkpẹ ka ẹga nya iFero kaka ya agbụ chị ka uhye pwururu ị-ịlahị nyamwụ mẹ lẹlẹ. Agbụ ịịwa yẹ la ekuruwa, ọọwa ọhụ à kpaa pwụ́ uhye nya ala Ijipiti wuu lẹlẹ. Ekuruwa ọọwa du ká iyi i-ju abẹ kụ ala Ijipiti wuu bala iyo ileji nyaa. Ọ lịnyị odu lẹ, iFero á myị pẹhi ala Isirẹlụ ị ka rụ ka.

IJihova du iMosisi tịrẹkpẹ ka ẹga nya iFero la omyi ẹla ọlẹ: ‘Ọọwa ri, á tịtọ ká ka pẹhi angịnyị  nyam lẹka ịnyị? Ekpawẹ ka do ijuju ọ-ọpyị nyang.’ Ẹnụtụrụ ọ-bọọ ba, iJihova du ekpawẹ, ịkpala, bala ila ẹrụ ka ọpyị nya Ijipiti. Ijipiti á yẹ ayịreji ọlịịwẹ ẹnẹnẹhẹ lẹka. Ekeji bala ang-ẹrụ nyaa wuu tayịreji, ma ọ́ tị lịnyị i-iGochin ka. IFero byi iMosisi yẹkẹẹ: ‘Bịlẹ iJihova kọ myị́ akama ọwẹ hiihi mẹ! Aalẹ, anụ ka rụ myị́ lẹ.’ Ma, nyọlẹ ká ekpawẹ bala enyi ba la ododo bwaa lẹ, iFero à yẹ irya nyamwụ da ịnyịnyị lẹlẹ.

IMosisi byoo yẹkẹẹ: ‘Ugbẹnyị lẹ, ịyịrị à ka ri ekeji ịlẹ kị bé ayịreji nya ekpawẹ bala enyi lẹlẹ.’ Uku-uku nya ịyịrị bé ala Ijipiti ẹpwa, kpụ ị ri ang-ẹrụ bala ekeji nyaa ihihi wuu. IFero bịlẹ yẹkẹẹ: ‘Chuchuu bịlẹ iJihova kọ ku ịyịrị ịwẹ rụ hiihi mẹ.’ Ma nyọlẹ ká iJihova dọmwụ ku ịyịrị ịwẹ rụ kpá, iFero kịnyaa la ọ-ka la egbeju ọngịrị tọọ.

IJihova byi iMosisi nyị ‘nịra ụbwọ kpaa ka uhye-ọgba.’ Nyọlẹ kọ họ ịnyị bwaa lẹ, egbamwụ à chowu kpịlẹẹ lẹlẹ. Ẹ-ẹpwụ nya ahyẹẹnụ ịta gbẹgbịlẹ, ala Ijipiti á jẹ́ yẹ ịngịngịhyẹ lee ọngọngọhẹ ka. Ẹpwa nya ala Isirẹlụ kem ahịgboo à ji lẹ.

IFero byi iMosisi yẹkẹẹ: ‘Ahụ bala angịnyị nyang ka rụ myị́ lẹ. Iyo ileji nyanụ kem anụ ka pẹhi ẹ-ẹgẹlẹ lẹlẹ.’ IMosisi wọọ yẹkẹẹ: ‘Ahị ka kpa iyo ileji nyahị ba ịlọhị pyii chajị kahị ka jẹ́-ẹ gyaa kiliya ha Ohe nyahị.’ Ẹlẹwẹ dudu ká agbama nya iFero wuru pwuu. Ọọwa lẹ, ọ chaa aga byaa yẹkẹẹ: ‘Anụ rụ bwu ẹga nyam mẹ! Kori kam yẹnụ gụ ọwẹ, m̀ ka nwụnụ.’