Ẹnụtụrụ iwo nyọlẹ ká iJisọsị rụ tịrẹkpẹ ka epwoohe kpá, angịjụgbẹyị nyamwụ ye āhị nya olegu ịgọgọ. Ahyẹẹnụ ọọwa ri ẹnụ nya ọhụhụ nya ịPẹntịkọsị la ẹka nya 33 C.E., angịnyị lụmẹ-lụmẹ tị wẹ bwu ẹga ịdatị-datị nyọka họ ọhụhụ ọọwa i-iJerusalẹm. Angịjụgbẹyị nya iJisọsị lala angị 120 tụ́guru ẹ-ẹpwụ oluhye nya ube ọhẹ. Lụka ọ-mwaa lẹ, ang ọlẹbyẹbyị ọhẹ à họ lẹlẹ. Ịngịhyẹ lala ẹlẹlẹ nya ila hu u-uhye nya egbeju nya ọngọjụgbẹyị ọnyọnyọọnyị, ọọwa ị dọmwụ nyọka ya ẹla la ìja ịkịla lẹlẹ. Ọmọnyọ ọhẹ lala igbachịwụ ọtụka-ọtụka myị̀ ẹpwang ọọwa wuu.

Angga i-bwu epwoja ịkịla ịlẹ kị ka iJerusalẹm wo ọmọnyọ ọọwa, du kị rụnyẹ ka ẹpwa ọọwa nyọka yẹ ang ọlẹ kọ juwa họ. Ọ laa ahịbwuu ụka kị wo ká angịjụgbẹyị nya iJisọsị juwa ya ìja ịdatị-datị. Ị yẹkẹẹ: ‘ỊGalili angịwẹ à tị́ bwu. Ányị ị tị́ họ kị wẹẹ ya òja nyahị?’

Ọọwa lẹ, iPita bala alẹrụ ịkịla à wuleji godayị kọkọ ị-ịlahị nya iru nya angịnyị ịwẹ lẹlẹ. IPita ya jwaa jaabwọ kị nwụ iJisọsị bala abwọlẹ ká iJihova wuloo eji bwula igu. IPita yẹkẹẹ: ‘IJisọsị juwa e-epwoohe  ụ-ụpwụriri nya Ohe Oluhye lẹẹlẹẹ lẹ, ọwa à tị ya olegu ịgọgọ hahị lẹẹ jaabwọ kọ myị ọnụ ene lẹ. Ịnyị à dudu kanụ yẹ akụrwọ ẹbyẹbyị bala o-wo ala ịlẹbẹyẹbyị ịwẹ lẹ.’

Ẹla nya iPita ọọwa gu angịwẹ ọ-ọkịlẹtụ yẹẹyẹẹ, lẹ ị tọọ wo yẹkẹẹ: “Ee lẹ, anyanyị, ahị tị́ ka họ lẹẹ mẹ?” O byaa yẹkẹẹ: ‘Anụ yẹ irya da bwu ẹpwụ nya ịhọbịrị ọhọhọ nyanụ wuu, ká ọng myị́ ọng nyanụ a kele kaka hu enyi Ohe la ẹnyị nya iJisọsị ịKịrayịsị mẹ. Ọọwa lẹ, anụ ka ye āhị nya Olegu Ịgọgọ lẹlẹ.’ Ahyẹẹnụ ọwe, angịnyị lala angị 3,000 hu enyi Ohe. Bwu ụka ọwẹ kịlahị, angịjụgbẹyị nya iJisọsị nwà kịlahị mịla-mịla i-iJerusalẹm. Bwula ụbwọ ọdada nya olegu ịgọgọ, alẹrụ nya iJisọsị ya ọjịra-jịra lụmẹ-lụmẹ yeji chajị kị ka jẹ́-ẹ mẹ ang ịlẹ wuu ká iJisọsị daa ehile jẹ angịjụgbẹyị ịwẹ.