Ọ la ẹka 70 ká ụmụmẹ nya ala Isirẹlụ tịrẹkpẹ rụ ka iJerusalẹm lẹ, ma angịhyẹ nyaa hi juwa ẹ-ẹga ịdatị-datị nya ịpyị-adịrahụ nya iPechiya wẹẹ. Ọngọhẹ nyaa ri Ẹsịra ọngọkiliya kọ kaa mẹ Ehile nya iJihova jẹ. Ẹsịra wo nyori aanamwụ ịla iJerusalẹm nyị́ kaa ba Ehile nya Ohe jẹ ka, lẹ ọ tịtọ kọ ka kele kaka daa ụbwọ. Atasẹkịsisi adịrahụ nya iPechiya byoo yẹkẹẹ: ‘Ohe ya ẹla ọjẹ́jẹ hang chajị ká ka jẹ́-ẹ mẹ ehile nyamwụ jẹ. Lẹ, kele mẹ. À ka kpa ọng myị́ ọng ọlẹ kọ háng bịlọng myị́.’ Ẹsịra bala angịlẹ wuu kị tịtọ nyọka tịrẹkpẹ ka iJerusalẹm tọ awụlẹ. Ị raabwọ ká iJihova ka kpaa pwụ́ ẹpwa la okpunyi, ọọwa lẹ, ị hu ang ẹdịyẹ lẹlẹ.

Ị họ ọya ine ụ-ụgbẹyị ene kịị pwụ́ iJerusalẹm. Alegbeju ịlụwa byi Ẹsịra nyori ala Isirẹlụ nyị́ kaa ju ihi nya iJihova kaka, nyị kaa ye anyang ịlẹ kị kaa gbịgba ha ihye nya ịnịịkịla. Ányị Ẹsịra à tị họ mẹ? I-ijata nya ọng myị́ ọng wuu, Ẹsịra ya arụụ kụ eji lẹ, ọ raabwọ yẹkẹẹ: ‘IJihova ee, à họ ang lụmẹ-lụmẹ hahị lẹ, ma ahị tị họ ọhọbịrị bang lẹ.’ Ala Isirẹlụ yẹ irya da, ma ị tị baba nya ụbwọ ọdada nyọka họ ang ọlẹ kọ pwoku. Ẹsịra chụ angịgbahị bala angịleje nyọka kpẹhị rịrị ala ịwẹ. Ẹ-ẹpwụ nya ịya ịta ị-ba ọwẹ ba, ị ku angịlẹ kị kaa gbịgba ha iJihova ka rụ bwu ọpyị nyaa.

Ẹka iwo kụrụ imiiye chịpwụrụ. Ụka ọwẹ wuu, ị juwa ma ugulọ nya iJerusalẹm nwụ́. Lẹ Ẹsịra tụ́ ala Isirẹlụ guru kọ ka wa Ehile nya Ohe jwaa. Ụka ká Ẹsịra pyẹ ụpwụ nya Ehile maa, ọng myị́ ọng wuu wuleji godayị kọkọ. Ụka kọ gwogbo ha iJihova, ịwa wuu kpa abwọ ka uhye nyọka mẹjẹ nyori ị myị jwoo. Ọọwa, ịwa wuu à ke ụrụ kpẹnẹẹ lẹ, Ẹsịra à wa Ehile jwaa bala ọ-dọọ wụlẹ lẹlẹ. Ị myị nyori ịwa nyị myịmyị hwahị hi iJihova lẹ, ọọwa lẹ, ị juwa jida lẹlẹ. Ẹnụtụrụ ọ-bọọ ba, Ẹsịra myịmyị wa Ehile jwaa. Nyọlẹ kị jẹ́ nyori ịwa nyị chịla nyọka họ Ọhụhụ nya Adáa lụka o-kpii, ị dọmwụ nyọka nwụlanọ gboo ahyaahị.

Ẹ-ẹpwụ nya ahyẹẹnụ irwiye ịlẹ kị họ ọhụhụ ọwẹ, angịnyị chị ọkẹkẹnị bala o-ji iJihova obe chajị nyọlẹ ká ang-ẹrụ nyaa há. Ị́ họ Ọhụhụ nya Adáa ụma ọlịịwẹ ẹ-ẹkpẹ nya ọlẹ  kị họ lụka nya iJochuwa kaka. Ụka kị họ ọhụhụ kpá, ị tụ́ guru lẹ, ị raabwọ yẹkẹẹ: ‘IJihova ee, à chịhị da bwu ọnyọhị oriri, ya ang oriri hahị ri u-ugbileji, bala ọ-ya ọpyị ọnyịịla-ọnyịịla hahị kụ. Ma, ahị bịrị ehile nyang mwụba-mwụba. À du alọmwụ kaka dahị ọna, ma áhị ke ụrụ laa ka. Tị kpọkpọọkpọ, à ju ugbodu balahị. À họ jịra jaabwọ ká myị ọnụ ha Ebiraham. Ahị jam chịng ehe lẹẹlẹẹ nyori ahị ka jung ihi lẹ.’ Ị da ọnụ ọmyịmyị nyaa ọwẹ ju ụ-ụpwụ, ọọwa lẹ, alegbeju, ala iLivayị, bala angịkiliya à yụbwọ jwoo ẹ-ẹpwụ lẹlẹ.