Usamuwɛlu hayi kpaakpa lɛ Ujehofa ipu ɛjɛɛji oyeeyi ku nu. Eko nɛ Usamuwɛlu wɛ ɔyipɛ a, ó cɛ lɛ uce obɔbi ku ayi ku Ɛlayi nōo wɛ Uhofini mla Ufinihasi a kóō je ɔ biya ŋ. (1 Usám. 2:22-26) Abɔ Usamuwɛlu yɔ i jɛ a, Ujehofa yɔ kwu ɔ. (1 Usám. 3:19) Eko nōo kwu piya ɔnyakwɔcɛ a, ó gɔbu gba Ujehofa ɛ̄gbā kpaakpa kpɔ naana nɛ ayipɛ ɔlɛ nu i gba Ujehofa ɛ̄gbā ŋ ma.—1 Usám. 8:1-5.

Ɔdi nɛ ocabɔ ku Usamuwɛlu lɔfu nwu alɔ a? Ɔdaŋ ku a wɛ ɛdrɔ, le jé kpɔcii ku Ujehofa jé unwalu ɛyɛɛyɛyi nɛ a yɔ i má mla ɛgɛ nɛ ɔtu gē ya uwɔ lɛ a. Ó lɔfu ta uwɔ abɔ ku a lɛ ɔtu. (Ayis. 41:10, 13) Ɔdaŋ ku a kē wɛ ɛ́nɛ́ amāŋ adā nɛ ɔyi uwɔ i kē yɔ i gba Ujehofa ɛ̄gbā ŋ, lɛ ɔtu ō tu kwu ɔtu ŋma lɛ ō jé ka Usamuwɛlu i lɔfu kwu ayi ku ɔlɛ nu abɔfu kéē hayi kpaakpa lɛ Ujehofa gla ŋ. Naana nōó kwu ɛlā a i ta abɔ ku Ujehofa a, ó gɔbu yɔ i lɛ ɛma olɔhi mla Ujehofa klla ya ɔdā nōo he ɔ ɔtu a. A jé ŋ, ocabɔ olɔhi ku uwɔ lɔfu ta ayipɛ ɔlɛ uwɔ abɔ kéē cigbihi wa i gba Ujehofa ɛ̄gbā kpɔ.

LƐ UVIDIO NYĀ MAFU NŌO KAHINII: NWU ƐLĀ ŊMA ƐGIYI UWA—USAMUWƐLU, CƐƐ AA LƐ ƆKA NŌO BA NYĀ CILA:

• Ɛgɛnyá nɛ Usamuwɛlu mafu ɔtu ō lɛ eko nōó wɛ ɔyipɛ a?

• Ɛgɛnyá nɛ u Danny mafu ɔtu ō lɛ a?

• Ɛgɛnyá nɛ Usamuwɛlu lɛ ocabɔ olɔhi taajɛ eko nōó wɛ ɔnyakwɔcɛ a?

• Ɛgɛnyá nɛ ɛ́nɛ́ mla adā ku Danny lɛ ocabɔ olɔhi taajɛ a?