ƐLĀ Ō NWU ƆMƐ 48

Fu Ācɛ Nōo Géē Wɛ Ɔkpa Ku Uwɔ Mla Ijeeyi

GBƆƆ

Aɔkpa ku alɔ gē ya ku alɔ gweeye, uwa klla gē tu alɔ ɔtu kwu ɔtu eko duuma nɛ āhɔ̄ le lɔnɔ. Amáŋ, Ubáyíbu pi alɔ ahɔ̄ kóō wɛ ɛjɛɛji ācɛ wɛ ɔkpa olɔhi a ŋ. Ɛgɛnyá nɛ alɔ gáā fu aɔkpa olɔhi a? Leyi yɛ aɔka nōo ba nyā.

1. Ɛgɛnyá nɛ aɔkpa ku uwɔ lɔfu lɛ abɔ kwu uwɔ iyē lɛ a?

Alɔ gē ya uce lɛbɛɛka ācɛ nɛ alɔ gē piyatɔha mla uwa eko doodu a. Ó kē lɔfu wɛ ɔwɛ olɔhi amāŋ ɔwɛ obɔbi gla. Ɛnyā kē wɛ ɔkwɛyi, ɔdaŋ ku alɔ kóō gē piyatɔha mla uwa eyī caa amāŋ ipu ɔdā ō le gwo uwaya. Ubáyíbu da alɔ kahinii: “Ɔ̄cɛ nōo gē yɛ mla ācɛ ojéeyī ā, géē jééyī, amáŋ aóklóbīya kú aólíla [ācɛ nōó yihɔtu ku Ujehofa ŋ] géē je gbilífi.” (Aíita 13:20) Aɔkpa ku uwɔ nōo yihɔtu ku Ujehofa a géē ta uwɔ abɔ ku a yɔ kwu Ujehofa ajaajɛ klla ya ōmiya olɔhi. Amáŋ, aɔkpa ku uwɔ nōó yihɔtu ku Ujehofa ŋ ma géē ya ku a nyɛɛ ŋma ɛ̄gbā ō gba ku Ujehofa. Ɔɔma ya ɛɛ nɛ Ubáyíbu ka alɔ fu aɔkpa alɔ mla ijeeyi a! Ɔdaŋ ka aɔkpa ku alɔ wɛ ācɛ nōo yihɔtu ku Ɔwɔico, alɔ géē le itene, uwa kē i le itene duu. Ɛnyā kē i ‘ta alɔ abɔ ta iyi alɔ ɔtu kwu ɔtu klla ta iyi alɔ abɔ.’—1 Ācɛ Utesaloníka 5:11.

2. Ɛgɛnyá nɛ ɔtu gáā ya Ujehofa lɛ lɛyikwu ācɛ nɛ a fu kéē wɛ aɔkpa ku uwɔ a?

Ujehofa gē bi ijeeyi le fu aɔya ku nu. “Óndú ā wɛ oklóbīya kú ācɛ dúúmā nēe gē yúufi nū ā.” (Aíjē Kú Ɛ̄gbā 25:14) Ɛgɛnyá nɛ ɔtu gē ya Ujehofa lɛ ō jé ka alɔ lɛ aɔkpa nōó yihɔtu nu ŋ ma? Ó géē kwu ɔ iyē nɛhi! (Jé Ujɛ́mīsi 4:4.) Amáŋ, ó géē gweeye klla géē fu alɔ ō wɛ ɔya ku nu, ɔdaŋ ku alɔ ta ō piyatɔha mla ācɛ nōó yihɔtu nu ŋ ma, nɛ alɔ kē tubla ɔ ajaajɛ mla ācɛ nōo yihɔtu nu.—Aíjē Kú Ɛ̄gbā 15:1-4.

JÉ GƆBU

Leyi yɛ ɔdā nōo ya ɛɛ nōó cɛgbá ku alɔ fu aɔkpa olɔhi a, klla má ɛgɛ nɛ a géē lɛ aɔkpa nōó géē ta oyeeyi ku uwɔ abɔ a.

3. Leyi kwɛɛcɛ ku a hii fu aɔkpa obɔbi lɛ iyi uwɔ ŋ

Ācɛ nōó yihɔtu ku Ɔwɔico mla aukɔ́ ku nu ŋ ma i wɛ aɔkpa olɔhi lɛ alɔ ŋ. Lɛ UVIDIO nyā mafu, cɛɛ ku aa kɔka lɛyikwu ɔka nyā.

UVIDIO: Nwu Ɛgɛ Nɛ A Géē Ta Aoklobiya mla Ancɛnya Obɔbi A (6:17)

Ɛgɛnyá nɛ alɔ lɔfu gbɔɔ ō piyatɔha mla ācɛ obɔbiipu nɛ alɔ i kóō gáā jé ŋ ma?

Jé 1 Ācɛ Ukɔ́rīnti 15:33, cɛɛ ku aa kɔka lɛyikwu aɔka nōo ba nyā:

Ɛdɔ ɔcɛ nyá nɛ a lɔfu piyatɔha mla ɔ nōo géē lɛ abɔ kwu uwɔ iyē ɔwɛ obɔbi a? Ɔdiya nɛ a ka lɛ a?

Aíjē Kú Ɛ̄gbā 119:63, cɛɛ ku aa kɔka lɛyikwu ɔka nyā:

Ɔdi géē ta uwɔ abɔ ō jé ɔdaŋ ku ɔ̄cɛ wɛ oklobiya amāŋ ɔncɛnya olɔhi gā uwɔ a?

Ɔdaŋ ka ikpo ɔcí éyi le biya, ohile a géē lɔfu biya duu. Ɛgɛnyá nɛ opiyatɔha mla ɔcɛ éyi nōo bɔbi géē lɛ abɔ kwu uwɔ iyē a?

4. Ācɛ nōó wɛ ɛgɔ ku alɔ ŋ ma lɔfu wɛ ɔkpa ku alɔ gla

Ubáyíbu da alɔ lɛyikwu ocabɔ mafu ku Udefidi mla Ujonatan nōo wɛ oklobiya ipu éwo ku Isrɛlu ikee. Ujonatan lé ɔnyakwɔcɛ lɛ Udefidi nɛɛnɛhi, ó klla wɛ ɔyi ku ɔlɛ ɔcɛ́ amáŋ anu mla Udefidi wɛ oklobiya lɔɔlɔhi. Jé 1 Usámuwɛ̄lu 18:1, cɛɛ ku aa kɔka lɛyikwu ɔka nyā:

Ɔdiya ɛɛ nɛ ācɛ nōo wɛ ɔkpa ku alɔ i cika ō wɛ ɛgɔ ekponu mla alɔ eko doodu ŋ ma a?

Jé Ācɛ Uróm 1:11, 12, cɛɛ ku aa kɔka lɛyikwu ɔka nyā:

Ɛgɛnyá nɛ aɔkpa nōo yihɔtu ku Ujehofa gáā ta iyi uwa ɔtu kwu ɔtu gla a?

Ipu uvidio nɛ alɔ gáā má nyā, má ɛgɛ nɛ ɔyinɛ alɔ nɔnyilɔ éyi má ɔkpa ɛga nōó leyice ŋ ma. Lɛ UVIDIO nyā mafu, cɛɛ ku aa kɔka lɛyikwu aɔka nōo ba nyā.

UVIDIO: A Lɔfu Má Aɔkpa Ɛga Nɛ Á Kóō Leyice Ŋ (5:06)

Ipu uvidio nyā, ɔdiya nɛ adā mla ɛ́nɛ́ ku Akil kɛla lɛ Akil lɛyikwu ɛdɔ ku ācɛ nōo wɛ ɔkpa ku nu ipu inɔkpa a?
Ɔdiya nɛ aɔkpa ku nu ɔɔma he ɔ ɔtu eko aflɛyi a?
Ɛgɛnyá nɛ ó bi le ya unwalu ku ō yɔ foofunu ɔɔma lé a?