Aku dibesaika ba Jyväskylä, Finland. Semak rumah aku mayuh danau ti manah sereta utan. Kenyau ari mit, aku rindu meda rampa menua. Aku mega rinduka jelu. Lebuh aku meda mayau enggau ukui, aku deka merap sida. Lebuh aku nyau besai, aku amat pedis ati lebuh meda orang merinsaka jelu. Nya alai, aku enggau siti gerempung ke ngelindung hak jelu. Dia aku betemu enggau mayuh orang ke sama rinduka jelu baka aku.

Kami ngetanka hak jelu. Kami mega nyadung penerang enggau ngereja pengawa mantah ngagai kedai ke nyual barang ke digaga ari bulu jelu sereta makmal ke ngaga eksperimen ba jelu. Kami mega numbuhka gerempung kediri empu kena ngelindung hak jelu. Tang chara ke dikena kami amat kelalu. Nya alai, aku kala ditangkap sereta dibai ngagai kot beberapa kali.

Aku ukai aja ngetanka hak jelu, tang aku mega irau pasal utai ke enda lurus ti nyadi ba dunya tu. Ketegal nya, aku berengkah nyukung beberapa iti gerempung nyengkaum Amnesty Entarabansa enggau Greenpeace. Aku bebendar deka nulung orang ke bisi penusah ba pengidup baka orang ke seranta sereta orang ke nadai pemakai.

Nyau kelama, aku sedar, pengawa ke digaga aku enda ulih ngubah dunya. Taja pan, gerempung ke dititihka aku semina ulih nulung sekeda orang tang bisi mayuh penusah ba dunya tu ke agi enda ulih diputarka. Aku ngasaika dunya tu di baruh kuasa ti jai, lalu aku nadai daya deka ngubah nya. Tu ngasuh aku amat asa ati.

Ketegal aku berasai puang, aku berengkah berunding pasal Petara enggau Bup Kudus. Suba, aku kala belajarka Bup Kudus enggau Saksi-Saksi Jehovah. Sida amat manah sereta ibuhka aku. Tang maya nya, aku bedau sedia deka ngubah pengidup aku. Taja pia, pengidup aku diatu udah berubah.

Aku berengkah macha Bup Kudus, lalu jaku dalam Bup Kudus ngelantangka ati aku. Aku nemu bisi mayuh jaku lalau pasal chara ngintu jelu. Ambika chunto, Jaku Dalam 12:10 madahka “orang ke menyana nemu ngintu jelu tupi sida.” Aku mega nemu, ukai Petara ke ngasuh penusah kitai nyadi, tang mensia merinsa ketegal enda ngasika jaku Iya. Aku mega belajar pasal pengerindu sereta pengeliat ati Jehovah lalu tu udah negu ati aku.—Masmur 103:8-14.

Ba urung maya nya, aku tetemuka kupon ke bup Nama Utai ti Bendar Diajar Bup Kudus? Aku ngisi lalu ngirumka kupon nya. Enda lama udah nya, sepasang laki bini Saksi datai ngagai rumah aku. Sida nanya sekalika aku deka belajarka Bup Kudus, lalu aku pan nerima. Aku mega berengkah datai begempuru. Belubah-lubah pemendar tumbuh ba ati aku.

Pemendar Bup Kudus meransang aku ngaga ubah. Chunto iya, suba aku enda bemoral, lalu enda ulih nagang pengingin seks. Tang diatu, aku enda agi ngereja pengawa ke dipegedika Petara. Aku badu nginsap sereta enda agi balat ngirup. Aku ngubah chara aku begari lalu badu agi ngena jaku ti kasar. Kelimpah ari nya, aku mega belajar bebasaka piak ti bekuasa.—Rome 13:1.

Tang utai ti pemadu tusah ba aku, iya nya, ngemansangka runding ti betul ngagai gerempung ke kala dititihka aku. Utai tu begunaka awak ti panjai laban aku ngasaika diri empu jai enti enda enggau tauka nyukung sida. Aku nyau sedar, semina Perintah Petara aja ke ulih mutarka pemerinsa mensia. Nya alai, aku enggau bebendar deka nyukung Perintah tu lalu ngajar orang bukai pasal nya.—Matthew 6:33.

Suba, aku selalu ngakim orang bukai. Enti aku ngumbai orang nya jai, aku deka begedika iya sereta deka ngereja utai ti jai ngagai iya. Tang pengudah belajarka Bup Kudus, aku nadai runding nya agi. Aku bebendar deka ngayanka pengerindu ngagai semua orang. (Matthew 5:44) Siti chara nya, nengah pengawa nginjil. Pengawa tu mai pengaga ati, pemaik sereta pengadang ngagai orang bukai.

Diatu pengidup aku bisi reti, lalu aku berasai puas laban aku nemu Petara enda nejuka jelu enggau mensia merinsa belama iya. Iya mega enda ngemendarka mensia ngerusak dunya tu, tang iya deka ngena Perintah Iya ngaga dunya tu nyadi Paradais. (Isaiah 11:1-9) Aku berasai gaga ati laban bisi pengadang tu sereta ulih nulung orang belajar pasal pengadang nya. Kepenudi iya, aku enda agi ngasaika diri patut ngubah dunya tu.