DALAM Bup Kudus, kitai macha pasal orang ti tetap ati ke ngembuan “asai ati baka kitai.” (Jas. 5:17, NW) Ambika chunto, kitai ulih meretika utai ku Paul ba Rome 7:21-24: “Lebuh aku deka ngereja utai ti badas, aku lalu milih penyai. . . . Naka meh penusah aku tu!” Jaku nya nulung kitai nemu, rasul Paul pan ngembuan asai ati baka kitai pasal pengelemi diri.

Taja pia, Paul mega nyebut pasal asai ati iya ke bukai. Ba Galatia 2:20, iya enggau andal madahka pasal Jesus ‘ke udah rinduka [iya] lalu udah nyerahka diri ketegal [iya].’ Baka Paul, kati nuan mega berasai baka nya? Engka enda seruran.

Enti kitai agi ngumbai diri nadai guna ketegal kala ngereja penyalah, kitai engka tusah deka pechaya Jehovah rindu sereta udah ngampunka kitai. Lalu, tu ngasuh kitai tusah deka ngumbai tebus Jesus nya pemeri ngagai kitai seiku-seiku. Kati Jesus amat deka kitai ngumbai tebus nya pemeri ngagai kitai seiku-seiku? Enti pia, nama ulih nulung kitai nemu tebus nya pemeri ke kitai? Aram kitai mansik dua iti tanya tu.

Amat, Jesus deka kitai ngumbai tebus iya nya pemeri ngagai kitai seiku-seiku. Baka ni kitai nemu tu? Uji gambarka utai ke nyadi ba Luke 23:39-43. Seiku lelaki ke dipantang ba tiang sepiak Jesus, ngaku diri udah ngereja dosa. Penyalah ke digaga lelaki nya tentu besai laban ukum ke baka nya semina diletak ngagai penjenayah ke balat jai. Iya balat irau, nya alai iya minta ari Jesus: ‘Kingatka aku lebuh nuan datai ngagai Perintah nuan.’

Nama digaga Jesus? Uji gambarka pemedis ke diasaika Jesus lebuh iya nguji malik ngagai lelaki nya. Taja pan nya balat pedis, Jesus tuchum lalu ngelantangka ati lelaki nya. Ku Jesus madahka: ‘Enggau bendar aku madah ngagai nuan sehari tu, nuan deka sama enggau aku di [“Paradais,” NW].’ Ke amat nya, enti Jesus deka, iya ulih nyebut: ‘Anak Mensia ke datai, . . . nyerahka nyawa diri kena nebus orang mayuh.’ (Mat. 20:28) Tang Jesus deka lelaki nya nemu, tebus nya pan diberi ngagai lelaki nya. Jesus ngena leka jaku baka “nuan” enggau “aku” lebuh berandau enggau iya. Enggau tu Jesus madah ngagai lelaki nya, tebus nya deka diberi ngagai iya lalu iya ulih diau ba dunya paradais.

Jesus tentu deka lelaki nya nemu tebus ke deka diberi nya mai penguntung ngagai lelaki nya. Enti Jesus ulih ngasaika penjenayah tu tau bulih penguntung ari tebus taja pan bedau bisi peluang nyembah Petara, Jesus tentu lebih agi ulih ngasaika nembiak Kristian ke udah dibaptisa tau bulih penguntung ari tebus tu. Nya alai, nama ulih nulung kitai pechayaka diri tau bulih penguntung ari tebus Kristus?

Ari pengawa nginjil, Paul ulih nemu Jesus mati ke iya. Baka ni iya nemu? Ku Paul nerangka: ‘Aku meri terima kasih ngagai Jesus Kristus Tuan kitai, ke udah meri aku pengering, laban iya udah ngira aku tetap ati, lalu udah ngeletak aku bekereja ke iya taja pan aku dulu menya udah bejaku busung ngelaban iya, lalu udah merinsaka iya.’ (1 Tim. 1:12-13) Jesus ngasuh Paul nginjil taja pan iya udah kala ngereja mayuh utai ti jai. Tu ngasuh Paul arap, Jesus nya kasih, rindu, sereta pechayaka iya. Jesus mega meri tiap iku kitai tanggung pengawa nusui berita manah. (Mat. 28:19, 20) Kati pengawa nya ulih nulung kitai nemu Jesus mega mati ke kitai?

Albert, ke udah pulai baru ngagai Jehovah pengudah dibuai ari gerempung nyauka 34 taun, madahka: “Aku endang seruran nemu dosa diri. Tang lebuh aku ba pengawa nginjil, aku ngasaika diri baka rasul Paul. Aku diberi tanggung pengawa nginjil tu ari Jesus. Tu negapka aku lalu nulung aku mengkang ngembuan runding ti positif pasal diri empu, pengidup aku ke diatu sereta ke dudi hari ila.”—Mas. 51:3.

Sebedau Allan belajarka Bup Kudus, iya ngereja mayuh penyai sereta balat mangah. Ku iya madahka: “Aku agi ingatka semua penyai ke kala digaga aku ba orang. Kadang-kadang, tu ngasuh aku balat tusah ati. Tang aku beterima kasih ngagai Jehovah ke ngena orang ti bedosa baka aku nusui berita manah ngagai orang bukai. Lebuh aku meda orang nerima berita manah, tu ngingatka aku, Petara Jehovah nya endang manah sereta bepengerindu. Aku ngasaika Jehovah benung ngena aku nulung orang bukai ke ngereja penyai baka aku suba.”

Pengawa nginjil nulung kitai ngembuan ulah sereta runding ti positif. Tu ngasuh kitai arap, Jesus kasih, rindu, sereta pechayaka kitai.

Seagi-agi dunya Sitan empai dipunaska, kitai engka agi berasai balat tusah ati ke dosa ti kala dikereja kitai suba. Nama ulih nulung kitai ngelaban asai ati ke baka nya?

Jean ke suah ngasaika diri besalah ketegal ngembuan pengidup ti pura-pura lebuh agi biak, madahka: “Aku rindu laban ‘Petara besai agi ari ati kitai.’” (1 Jhn. 3:19, 20) Baka Jean, kitai ulih berasai lantang ati laban nemu Jehovah enggau Jesus meretika kitai tu orang ti bedosa. Kingatka meh, seduai iya enggau bepengerindu nyediaka tebus ke orang ti bedosa ke udah nesal ati.—1 Tim. 1:15.

Kitai pechaya, tebus nya pemeri ke kitai seiku-seiku lebuh kitai belematika chara Jesus ngintu mensia ke enda sempurna sereta lebuh kitai enggau naka ulih bejalaika pengawa nginjil ti diberi iya ngagai kitai. Enggau ngereja nya, nuan ulih madahka utai ti sama baka Paul: Jesus ‘udah rinduka aku lalu udah nyerahka diri ketegal aku.’