Ba artikel sebedau tu, kitai udah berandauka tanda ti disebut Jesus. Tanda tu nunjukka enggau terang, Perintah Petara ke diperintah Jesus udah didirika ba serega.

Bup Kudus madahka, pengudah Jesus nyadi Raja iya muru Sitan enggau bala melikat ti jai ari serega. Diatu, sida semina ulih ngaga penyarut ba dunya, lalu nya meh siti kebuah gaya dunya majak jai kenyau ari taun 1914.—Pemandang 12:7, 9.

Taja pan gaya dunya majak jai, Jesus ke nyadi Raja ba Perintah Petara benung nulung orang di serata dunya. Nengah pengawa ngajar Bup Kudus, Jesus nulung mayuh orang di serata dunya, ngambika belajar sereta ngena prinsip Bup Kudus dalam pengidup sida ninting hari. (Isaiah 2:2-4) Bejuta iku orang udah belajar chara nirika ruang bilik ti lantang agi, sereta sida diajar ngambika bisi runding ti pengumbas iya pasal kereja enggau reta tengkira. Asil iya, sida bulih penguntung sereta nyediaka diri nyadi rayat Perintah Petara.

Jesus udah berengkah merintah ba serega, tang perintah mensia agi bekuasa ba dunya. Taja pia, Petara udah ngasuh Jesus, “Perintah bala munsuh nuan.” (Masmur 110:2) Enda lama da agi, Jesus deka datai ngakim enggau ngemunaska semua munsuh iya. Udah nya, iya deka mai pengidup ti manah agi ngagai semua orang ke deka ngasika Petara.

Enda lama da agi, Perintah Petara deka:

• Ngelenyauka pengarap pelesu. Semua pengarap ke enda ngajar pemendar pasal Petara sereta merinsaka orang deka dilenyauka. Dalam Bup Kudus, pengarap pelesu disempamaka baka indu sundal ke deka dipunaska. Maya tu nyadi, mayuh orang deka tekenyit.—Pemandang 17:15, 16.

• Ngujungka perintah mensia. Perintah Petara deka “ngerusak semua perintah bukai, lalu udah nya iya deka meruan belama iya.”—Daniel 2:44.

• Ngemunaska orang jai. Nama deka nyadi ngagai orang ke rindu ngereja penyai sereta enggai ngasika Petara? Bup Kudus madahka, sida deka ‘dibuai.’—Jaku Dalam 2:22.

• Ngapuska Sitan enggau melikat ti jai. Sitan enggau bala melikat ti jai “enda agi nipu mensia.”—Pemandang 20:3, 10.

Baka ni gaya pengidup ti dianti orang ke deka diperintah Perintah Petara?

Laban Jesus udah nyadi Raja ba serega, iya lebih manah agi ari pemerintah mensia ti bukai. Iya deka ditulung 144,000 iku orang ke dipilih ari dunya. (Pemandang 5:9, 10; 14:1, 3) Iya deka ngamatka peneka Petara ngagai dunya sereta mai mayuh berekat ke semua mensia. Nama berekat ke mayuh tu?

• Penyakit enggau pemati deka dilenyauka. “Nadai orang ke diau dalam menua kitai deka mutap madahka diri sakit,” enggau “pemati nadai agi.”—Isaiah 33:24; Pemandang 21:4.

• Pemaik enggau pengelikun. ‘Sida deka bisi pemaik,’ enggau “semua orang deka diau bebaik enggau pangan diri ba sebelah kebun anggur enggau ba madang kayu ara sida, lalu nadai agi orang deka ngemba sida.”—Isaiah 54:13; Mikah 4:4.

• Pengawa ti ngemuaska. ‘Sida deka lantang ati bekenaka utai ti udah ulih sida. Pengawa sida deka mujur.’—Isaiah 65:22, 23.

• Rampa menua deka nyadi manah. “Menua puang deka rami gaga, lalu bungai deka tumbuh di menua ti kusi.”—Isaiah 35:1.

• Mensia deka diajar chara ulih idup belama-lama iya. ‘Tu pengidup ti meruan belama iya, ngambika sida ngelala Nuan Petara ti bendar, enggau Jesus Kristus, ke dikirumka Nuan.’—John 17:3.

Petara deka meri semua berekat tu ngagai nuan. (Isaiah 48:18) Artikel ke nangkanka tu deka berandauka nama patut digaga nuan diatu, ngambika ulih ngasaika berekat tu jemah ila.