Jesus udah madahka jaku sempama pasal anak ke lenyau ngagai bala pengumpul chukai, bala penulis Adat enggau orang Parisi. Jaku sempama tu patut ngasuh sida nemu Petara sanggup ngampunka orang ke udah nesal ati. (Luke 15:1-7, 11) Diatu Jesus deka ngajar bala murid iya ngena siti jaku sempama, pasal siku lelaki ti kaya ke nemu ulun iya enda lurus ngereja pengawa.

Jesus madahka ulun nya dituduh masau reta tuan iya. Nya alai, tuan nya deka muai iya kereja. Ulun nya bejaku dalam ati: “Nama utai ke patut digaga aku? Tuan aku deka muai aku kereja. Aku enda kering nyangkul lalu aku malu minta sedekah.” Nya alai iya madah: “Aku nemu nama utai ke patut digaga aku, ngambika orang bukai nyambut aku ngagai rumah sida pengudah aku dibuai kereja.” Lalu iya ngangauka orang ke berutang ba tuan iya, lalu nanya sida: “Berapa utang nuan ba tuan aku?”—Luke 16:3-5.

Orang keterubah nyaut: “Aku berutang 2,200 liter minyak kana.” Orang nya engka bisi kebun kana ti besai tauka iya siku orang dagang ke nyual minyak. Nya alai ulun nya madah ngagai iya: “Ambi surat utang nuan. Duduk lalu jampat tulis 1,100 liter.”—Luke 16:6.

Ulun nya nanya siku da agi orang: “Berapa utang nuan?” Ku orang nya nyaut: “Aku berutang 100 guni gandum.” Ulun nya madah ngagai iya: “Ambi surat utang nuan lalu tulis 80 guni.” Nyadi utang orang nya dikurangka 20 peratus.—Luke 16:7.

Ketegal ulun nya agi gawa enggau tuan iya, nya alai iya bisi hak ngurangka utang orang enggau tuan iya. Enggau ngereja nya, ulun nya bulih kaban ke deka nulung iya pengudah iya dibuai kereja.

Nyau kelama, tuan nya nemu utai ke digaga ulun iya. Taja pan utai ke digaga ulun nya ngasuh tuan nya rugi, tang iya kagum enggau ulun nya, lalu muji iya. “Ulun nya enda lurus,” tang “iya pintar ngereja utai.” Nya alai Jesus madah: “Orang ba dunya tu pintar agi ari orang ke idup dalam penampak lebuh ngatur utai enggau orang ba rebak sida.”—Luke 16:8.

Tang iya ke amat, Jesus ukai besetuju enggau utai ke digaga ulun nya. Lalu iya mega enda meransang orang ngereja pengawa ti enda lurus lebuh bedagang. Nyadi nama utai ke deka diajar iya? Jesus meransang bala murid iya: “Kena meh pengaya ba dunya ti jai tu ngambika kita bulih kaban. Enggau nya, enti pengaya kita udah abis, sida deka nerima kita ngagai endur diau ti meruan belama iya.” (Luke 16:9) Nya alai, Jesus deka ngajar sida ngambika sida pintar ngaga pelan ke jemah ila. Reti iya bala nembiak Petara, iya nya “orang ke idup dalam penampak,” mesti ngena reta  tengkira sida enggau chara ti manah, ngambika sida bulih pengidup ti meruan belama iya ba jemah ila.

Semina Petara Jehovah enggau Anak Iya aja ulih mai orang tama ngagai Perintah Petara ba serega tauka idup ba dunya Paradais. Kitai patut bebendar ngemansangka kaul ti rapat enggau seduai iya, lalu ngena reta tengkira kitai nyukung pengawa Perintah Petara. Ba jemah ila, emas, pirak, enggau reta tengkira ke bukai enda berega agi. Tang, kitai deka bulih pengidup ti meruan belama iya.

Jesus madah orang ke tetap ati lebuh ngena reta tengkira sida, mega deka tetap ati lebuh sida diberi pengawa ti besai agi. Ku Jesus madahka: “Nya alai, enti kita enda tetap ati lebuh ngena pengaya ba dunya ti jai tu, sapa ke deka ngasuh kita ngemataka pengaya ti bendar [baka pengawa Perintah Petara]?”—Luke 16:11.

Jesus madahka bala murid iya mesti betanggungjawap enggau pengawa ke diberi, enti sida deka diterima “ngagai endur diau ti meruan belama iya.” Kepenudi iya, Jesus madah: “Nadai orang ulih nyadi ulun dua iku tuan, laban iya deka begedika siku lalu rinduka siku, tauka taluk ngagai siku lalu enda bebasaka siku. Kita enda ulih nyadi ulun Petara, lalu ba maya ti sama nyadi ulun Pengaya.”—Luke 16:9, 13.