1-2. Otjikwaye tjimwe tji tji ri otjinanḓengu ku Jehova, nu eye u vanga kutja tu tjite vi?

 OMUANO mbu tu tjinda varwe omunanḓengu tjinene ku Jehova. Jesus we tu honga kutja matu sokusuvera ovakwetu otja tji twe risuvera oveni. (Mat. 22:​37-39) Ihi matji kamburire mo okuraisa ouwa ku imba mbe ha karere Jehova. Indu tji twa tjiti nao, matu horere ku Jehova Mukuru ngu “pitisa eyuva ri yere kombanda yovavi novawa, nu tjinga e rokisira ovasemba novarunde ombura.”—Mat. 5:45.

² Nandarire kutja Jehova wa suvera ovandu avehe, eye tjinene wa suvera imba mbe nonḓuviro ku ye. (Joh. 14:21) Eye u vanga kutja tu horere ku ye, nu u tu tunduuza kutja tu suvere ovakambure ovakwetu “nomasa tjinene.” (1 Petr. 4:8; Rom. 12:10) Orusuvero otja indwo ru ri tjimuna ndu tu raisa komuzamumwe wetu poo kepanga retu ropopezu.

3. Matu sokuzemburuka ye ohunga norusuvero?

³ Orusuvero ru ri tjimuna otjimbloma tjomondjuwo tji tji hepwa okutjeverwa nawa kutja tji hape. Omuapostele Paulus wa rakiza Ovakriste kutja: “Panḓereye pokusuverasana otja Ovakriste ovazamumwe!” (Hebr. 13:1) Jehova u vanga kutja tu kayende komurungu okukurisa orusuvero rwetu ku varwe. Morupa ndwi, matu kahungirira kokutja omena raye tji matu sokutumbuka popezu novakambure ovakwetu, nokutja omomuano uṋe mu matu yenene okutjita nao.

 OMENA RAYE TJI MATU SOKUKARA POPEZU NOVAKAMBURE OVAKWETU?

4. Otja kEpsalme 133:​1, omomuano uṋe mu matu kayenda komurungu okuraisa kutja tu nondangi kombwaneno ndji tu na yo pokati kovakambure ovakwetu? (Wina tara koviperendero.)

⁴ Lesa Epsalme 133:1. Eṱe matu i kumwe nomutjange wEpsalme ngwa tjanga kutja okukara noupanga ku na imba mba suvera Jehova “okokuwa” nu ku eta ‘onyuṋe.’ Posi ya tjimuna omundu tje ha yandja ombango komuti omuwa mbwe muna eyuva arihe, eṱe mape ya atu ha yandja ombango kombwaneno ombwa ndji tu na yo mokati kovakambure ovakwetu. Eṱe mape ya tu muna ovakambure ovakwetu ovikando ovingi motjivike. Omomuano uṋe mu matu kayenda komurungu okuraisa kutja tu ve vara? Orusuvero rwetu kovakambure ovakwetu maru kurire ko indu tji twe ripura nomuano omundu auhe me ri omunanḓengu kweṱe na mombongo.

5. Varwe ve ṱunwa vi indu tji mave munu ovakarere va Jehova amave raisasana orusuvero?

⁵ Tjiva mbe ya kozombongarero zetu zombongo otjikando otjitenga ve ṱunwa tjinene i yorusuvero ndu tu raisasana. Mena repu ndo ariyerike, owo mape ya ave munu kutja va munu ouatjiri. Jesus wa tja: “Tji mwa suverasana, indino avehe otji mave tjiwa kutja oweṋe ovahongewa vandje.” (Joh. 13:35) Tara kotjihorera tja Chaithra ngwa ri omuhongwa po-university nu ngwee rihongo Ombeibela pu nOvahongonone va Jehova. Eye wa yakura omaṋangero komaworonganeno wotukondwa. Kombunda yaindu tja za nokukara pomaworonganeno ngo otjikando otjitenga, eye wa raera omundu ngwaave rihongo pamwe kutja: “Ami hi ya rora okupukatwa  i yovanene vandje. Posi ya pomaworonganeno nga ami mba pukatwa povikando 52 meyuva rimwe uriri. Ami mba munu kutja Jehova wa ungurisa ovakarere ve okundjiraisira orusuvero rwe. Ami me vanga kutja ve rire eṱunḓu randje.” Chaithra wa kayenda komurungu okutjita omarundurukiro mehupo re, nu wa papitisiwa mombura ndji 2024. Otjiperi kutja, indu ovandu tji mave munu oviungura vyetu oviwa mbi mavi kamburire mo orusuvero ndu tu na ro pokati kovakambure ovakwetu, owo potuingi ve vanga okuuta okukarera Jehova.—Mat. 5:16.

6. Okutumbuka popezu novakambure ovakwetu ku tu tjevera vi?

⁶ Okutumbuka popezu novakambure ovakwetu maku yenene okututjevera. Paulus wa raera Ovakriste ovakwao kutja: “Mamu sokuvaterasana pevapa reyuva, kokutja ape ha ningi umwe weṋu ngu ma kukutisiwa omutima i ovineya vyouvi.” (Hebr. 3:13) Indu tji twa u momuinyo ngandu tja rire ouzeu kweṱe okutjita imbi mbi ri ovisemba, Jehova mape ya a ungurisa omukambure omukwetu ngwe tu munu okutupa ombatero ndji matu hepa. (Eps. 73:​2, 17, 23) Eṱe tjiri tu hepa ombatero otja indjo.

7. Hapo orusuvero nombwaneno vi hitasana vi? (Ovakolose 3:​13, 14)

⁷ Eṱe oweṱe orupa rwotjimbumba tjovandu mbe ungura oukukutu okuraisasana orusuvero, ku nao eṱe tu muna ozondaya ozengi. (1 Joh. 4:11) Otjotjihorera, orusuvero ru tjita kutja tu ‘tjindasane,’ nu iho tji tu vatera okukara nombwaneno novakambure ovakwetu. (Lesa Ovakolose 3:​13, 14; Ef. 4:​2-6) Ku nao, pozombongarero zetu zombongo eṱe tu kara nondjoroka okukara pu novakambure ovakwetu okukapita otuveze tware kombanda yehi.

YOZIKASANEYE

8. Omomuano uṋe Jehova me tu vatera okukara nombwaneno ku novakambure ovakwetu?

⁸ Jehova ongu tjita kutja tu yenene okukara nombwaneno ku novakambure ovakwetu mouye auhe. Jehova u tu vatera okutjita nao nandarire kutja tu nouvi. (1 Kor. 12:25) Ombeibela i tja tu “hongwa i Ndjambi okusuverasana.” (1 Tes. 4:9) Ihi matji hee kutja Jehova u ungurisa Ombeibela okuturaera imbi mbi matu hepa okutjita kutja tu tumbuke popezu novakambure ovakwetu. Eṱe matu yenene ‘okuhongwa i Ndjambi’ indu tji matu konḓonona imbi mbi me tu hongo nokuviṱakamisa. (Hebr. 4:12; Jak. 1:25) Nu imbi ooviṋa Ovahongonone va Jehova mbi ve kondja nomasa okutjita.

9. Matu rihongo ye okuza kOvaroma 12:​9-13 ohunga nokuraisasana ondjozikiro?

⁹ Omomuano uṋe Embo ra Mukuru mu ri tu honga okutumbuka popezu novakambure ovakwetu? Tara ku imbi Paulus mbya hungira ohunga nepu ndi ri mOvaroma 12:​9-13. (Lesa.) Eye wa tja ngatu “ramange okuyozikasana.” Omambo ngo maye hee tjike? Eṱe twa sokutenga po okuraisa ‘orusuvero’ ku varwe momiano pekepeke tjimuna indu tji matu ve isire, tji matu ve sekirisa, nokuraisa ouharupu. (Ef. 4:32) O undju kutja omukambure omukweṋu ma tenge po okutumbuka popezu na ove. Ove mo yenene ‘okuramanga’ poo okutenga po okutjita nao. Jesus opa zokutja: “Mokuyandja mu nenyando tjinene pokupewa.”—Oviung. 20:35.

10. Matu yenene vi okuungura oukukutu kutja tu raise ‘ondjozikiro’ kovakambure ovakwetu? (Wina tara kotjiperendero.)

¹⁰ Otjiṋa otjinanambango kutja kombunda yaindu Paulus tje tu raera kutja ngatu ramangere okuyozikasana, eye we tu tunduuza kutja ngatu ‘rire omapatje mokuungura, nu atu  ṱotjirweyo.’ Omundu epatje u ungura oukukutu nu indu tja pewa otjiungura okuungura, u tji yenenisa momuano omusemba. Omiano 3:​27, 28 ri tja: “Tji mo sora, tjita ouwa ku imba mbu mave u hepa.” Ku nao indu tji twa munu kutja pe nomundu ngu ma hepa ombatero, eṱe tu kondja pu matu yenene okumuvatera. Eṱe katu undju komundu warwe okutjita otjiṋa.—1 Joh. 3:​17, 18.

11. Ovikwaye mbi mavi tu vatere okutumbuka popezu novakambure ovakwetu?

¹¹ Omuano warwe mu matu yenene okuraisa ondjozikiro ku varwe omokuveisira tjimanga indu tji ve tu zunḓa. Ovaefese 4:26 ri tja: “Hanganeye eyuva ngunda ari hiya hita.” Omena raye? Indu tji twa tjiti nao, katu nokuyandja oruveze ku Satan ‘kutja e tu kambure.’ Jehova u tu raera povikando ovingi okuisirasana okupitira mEmbo re. Ovakolose 3:13 ri tu tunduuza kutja tu kayende komurungu ‘okuisirasana.’ Okuisira ozondataiziro zavarwe omuano umwe omusemba okutumbuka popezu na wo. Indu tji matu isire varwe tu vatera ‘okuṱakamisa oruwano ndu tu pewa i Ombepo yaNdjambi.’ (Ef. 4:3) Oukahu kutja indu tji matu isire varwe tu vatera otjira tja Jehova okukara mohange na mombwaneno.

12. Omomuano uṋe Jehova me tu vatera kutja tu isire varwe?

¹² Otjingaperi kutja mape ya ai rire ouzeu kweṱe okuisira imba mbe tu zunḓa poo mbe tu hihamisa. Posi ya matu yenene okuveisira nombatero yombepo ondjapuke. Kombunda yokututunduuza kutja ngatu ‘suverasane nomutima watjiri,’ nokutja ‘tu rire omapatje mokuungura,’ Ombeibela i tu raera kutja: “Karereye Ndjambi noupyuke.” Ihi matji hee kutja ombepo ya Mukuru mai yenene okutuvatera okurira ovapyuke. (Rom. 12:11) Ku nao, oyo mai yenene okutuvatera okukara nonḓero poo oupyuke wokuisira varwe nokuveraisira orusuvero. Mena ranao, eṱe opu tu zokuriheka ku Jehova okutuvatera.—Luk. 11:13.

‘ZUVASANEYE MU IMBI MBI MAMU HUNGIRE’

13. Ovikwaye mbi mape ya avi eta ohaṋi mokati ketu?

¹³ Mombongo mu kara “ovandu avehe” mba za kozombazu nomihoko pekepeke.  (1 Tim. 2: 3, 4) Oviṋa tjimuna omuano mbu tu rizara, omapangero ngu tu yakura, nomanyando ngu tu toorora mape ya avi eta ohaṋi indu tji tu hi nokukengeza. (Rom. 14:4; 1 Kor. 1:10) Mena rokutja tu “hongwa i Ndjambi okusuverasana,” matu sokukengeza kutja atu ha tjiti aayo oumune wetu ombu ri ousemba kombanda ya imbwi wovandu varwe.—Fil. 2:3.

14. Hapo aruhe matu sokukondja okuritjinda momuano uṋe, nu omena raye?

¹⁴ Eṱe wina matu yenene okutjita kutja ape ha kara ohaṋi mombongo indu tji twa kondjo okutunduuza nokutarareka omitima vyavarwe aruhe. (1 Tes. 5:11) Momayuva nga, ovandu ovengi mba yaruka ombunda mongamburiro poo mba isamewa mombongo va kotoka. Eṱe tu ve yakura norusuvero. (2 Kor. 2:8) Tara ku imbi mbya tjitwa komukazendu omukambure umwe ngwa kotoka kombongo kombunda yokuyaruka ombunda mongamburiro oure wozombura omurongo. Eye wa tja: “Ovandu avehe aave ndji korisa nomirungu mbi mavi meṱameṱa, nokundjipa omake.” (Oviung. 3:19) Hapo oviṋa avihe mbi vye mu ṱuna vi? Eye wa tja: “Ami ee munu kutja Jehova ee ndji vatere kutja mbi kare nondjoroka rukwao.” Tji matu kondjo okuyanḓiparisa varwe, Kristus ma yenene okutuungurisa okuporisa omitima vyaimba mba “pungarisiwa i okutjinda omitwaro omizeu.”—Mat. 11:​28, 29.

15. Ovikwaye vyarwe mbi matu yenene okutjita okuvatera ombongo kutja i kare nombwaneno? (Wina tara kotjiperendero.)

 ¹⁵ Omuano warwe mu matu yenene okuvatera ombongo kutja i kare nombwaneno, omomambo ngu matu hungire. Job 12:11 ri tja: “Omatwi woye wina opunga aye tjatisa okuzuva omambo.” Tjimuna omutereke omuwa tje rora ovikurya vye aruhe okutara kutja mavi tjata vi ngunda e hi ya yandja ku varwe, eṱe wina matu sokuripura nawa ngunda atu hi ya hungira. (Eps. 141:3) Eṱe aruhe matu vanga kutja omambo wetu ye rire omatunge, ye tarareke omitima, nu “ye yandje onyuṋe kovapuratene.”—Ef. 4:29.

16. Ooveṋe tjinenenene mbu mave sokuyandja ombongo ku imbi mbi mave hungire?

¹⁶ Tjinenenene ovarumendu mba kupa novanene mave sokuyandja ombango kokuhungira omambo omayanḓiparise. (Kol. 3:​19, 21; Tit. 2:4) Ovanene vombongo wina mave sokuhuhumiṋa nokuyarura pehi omitima vyovakarere va Jehova. (Jes. 32:​1, 2; Gal. 6:1) Ombeibela i tu zemburuka kutja: “Eziriro ndi zirwa moruveze orusemba ri yandja ohange.”—Omiano 15:23.

“NGARU RIRE ORUSUVERO RWOUATJIRI, NU NGARU RIRAISE ORUINI MOVITJITWA”

17. Ovikwaye mbi mavi yenene okutuvatera kutja tu suvere ovakambure ovakwetu okuza komutima?

¹⁷ Omuapostele Johanes we tu tunduuza kutja “orusuvero rwetu aru rire omambo nokuhungira porwakwo; ngaru rire orusuvero rwouatjiri, nu ngaru riraise oruini movitjitwa.” (1 Joh. 3:18) Eṱe tu vanga kutja orusuvero rwetu kovakambure ovakwetu ru ze komutima. Omomuano uṋe mu matu yenene okutjita nao? Otja tji matu kara oruveze oruingi pu novakambure ovakwetu, opu matu tumbuka popezu na wo nu orusuvero rwetu maru kurire ko. Ku nao, twa po oruveze okukara pu novakambure ovakweṋu tjimuna pozombongarero zombongo, na motjiungura tjokuzuvarisa. Nu wina twa po oruveze rwokukeveryangera. Indu tji matu tjiti oviṋa mbi, tu raisa kutja tu “hongwa i Ndjambi okusuverasana.” (1 Tes. 4:9) Nu matu kayenda komurungu okumuna kutja “okokuwa nonyuṋe oovangu nomarumbi tji mave tura pamwe nave twara kumwe omitima.”—Eps. 133:1.