Jesus me ya otjOmbara
EHUNGI 97
Jesus me ya otjOmbara
ORUVEZE orusupi kombunda yaindu Jesus tja za nokuverukisa ovapoṱu vevari, eye we ya kokarongo popezu na Jerusalem. Eye wa raera kovahongewa ve vevari na tja: ‘Twendeye kotjirongo hina nu mamu kavaza okasinona. Ke kutureye nu mu ke ete ku ami.’
Indu okasino tji ka etwa ku ye, Jesus wa ronda ku ko. Okuzambo eye wa kavira okuyenda ku Jerusalem omukato omusupi okuza mbo. Indu eye tja vaza popezu notjihuro, otjimbumba otjinene tjovandu tje ya okumutjakanena. Ovengi vawo va hukura ozombanda zawo zokombanda nave ze yara mondjira. Varwe va teya otutavi twomavare. Owo wina ve tu yara mondjira ave ravaere nave tja: ‘Mukuru nga sere ondaya ombara ndji mai ya mena re!’
Oruveze orukuru mu Israel ozombara ozombe aaze kavire kokasinona okuhita mu Jerusalem okuriraisa oveni kovandu. Jesus otja tjita mba. Novandu mba aave raisa kutja mave vanga kutja Jesus ma rire ombara yawo. Nungwari kavandu avehe mbaave mu vanga. Ihi matu tji munine ku imbi mbya tjitwa indu Jesus tja ya kondembeli.
Pondembeli Jesus wa verukisa ovandu mba ri ovapoṱu novirema. Indu ovanatje ouṱiṱi tji va muna otjiṋa hi, owo va tanga Jesus. Nungwari otjiṋa hi tja pindikisa ovapristeri, nowo va raera Jesus nave tja: ‘Ove mo zuu imbi ovanatje mbi mave hungire?’
Jesus we ve zira na tja: ‘Ii, me ve zuu. Kamu na pu mwa lesere nai are: “Ove wa honga ovanatje novanyame kutja ve ku imburire ondangero?”’ Okutja ovanatje va kayenda komurungu okutanga ombara yaMukuru.
Eṱe ngatu kare tjimuna ovanatje mbo. Ovandu tjiva mape ya ave kondjisa okututjaera kutja atu ha hungire ohunga nOuhona waMukuru. Nungwari eṱe matu sokukayenda komurungu okuraera varwe ohunga noviṋa oviwa Jesus mbi ma katjitira ovandu.
Orwo karwa ri oruveze ku Jesus okuuta okuhonapara otjombara indu tja ri kombanda yehi. Oruveze rwe rwokuhonapara maru ya ruṋe? Ovahongewa vaJesus aave vanga okutjiwa. Matu kalesa ohunga na imbi mehongwa ndi mari kongorereko.
