1, 2. (a) Dirava ese Adamu dekenai dahaka hahenamo ia henia? (b) Dahaka dainai Dirava ese Adamu dekenai adavana ta ia henia? (Laulau ginigunana itaia.)

 IEHOVA ese tanobada ia karaia kava lasi. To, ia karaia “taunimanima [ese] idia noholaia” totona. (Isa. 45:18) Ia ese ia karaia tau ginigunana, Adamu be ia goevadae, bona Dirava ese ia dekenai Eden umana ia henia ia noholaia totona. Adamu be unai uma hairaina lalonai idia noho au bona animal idauidau ia moalelaia! To, gau ta dekenai ia dabu. Iehova be unai ia diba, bona ia gwau: “Unai tau sibona ia noho be ia namo lasi, lau ese durua tauna ia bamona do lau karaia.” Bena Dirava ese Adamu ia hamahutaia, bena “ruduna turia dekena amo hahine ta ia karaia.” Vadaeni, Adamu be mahuta amo ia noga neganai, ia moale bada herea! Ia gwau: “Ia be lauegu turia ena turia, bona lauegu hidio ena hidio. Iena ladana do idia atoa, Hahine, badina be tau dekena amo be ia kokia.”—Gen. 2:18-23.

² Unai hahine be Dirava ena harihari gauna ta Adamu dekenai, bona ia be Adamu ena durua tauna. Dirava ese unai hahine dekenai natuna havaraia maduna ia henia danu. Unai dainai, “[Adamu] ese iena adavana ena ladana ia atoa Heva, badina ia be mauri taudia ibounai edia sinana.” (Gen. 3:20) Oibe, Dirava ese unai hahenamo  namona be unai tau bona hahine ginigunadia dekenai ia henia! Anina be idia ese taunimanima goevadaedia ma haida idia havaraia diba. Unai dala amo, tanobada be paradaiso ai do ia lao, goevadae taudia amo do ia honu, bona idia ese animal do idia biagua.—Gen. 1:27, 28.

3. (a) Dirava ena lalonamo idia abia totona Adamu bona Heva ese dahaka idia karaia be namo, to dahaka ia vara? (b) Edena henanadai edia haere do ita tahua?

³ Adamu bona Heva ese Dirava ena lalonamo idia abia totona, namona be Iehova idia kamonai henia bona iena lohia dalana idia abia dae. (Gen. 2:15-17) Bema unai bamona idia karaia, Dirava ia ura do idia karaia gaudia idia hagugurua diba. To madi, “idaunegai gaigaina,” Satani ese idia ia koia bena Dirava idia gwau-edeede henia. (Apok. 12:9; Gen. 3:1-6) Unai gwau-edeede karana dainai hahine edia mauri be edena bamona? Idaunegai Dirava idia badinaia hahine haida ese dahaka idia karaia? Dahaka dainai Baibel ia gwau hari inai negai Keristani hahinedia be “tuari orea badana ta bamona”?—Sal. 68:11, NW.

4. Eden umana lalonai ia vara gwau-edeede be daika ena kerere?

⁴ Adamu ena gwau-edeede karana dainai, Dirava ese ia nanadaia neganai, Adamu be inai ekskius herevana ia gwauraia: “Oi ese oi karaia lau dekenai hahine ese unai au huahua lau dekenai ia henia, bona lau ania.”(Gen. 3:12.) Adamu ia abia dae lasi unai be iena kerere, to ia gwau unai be Dirava ese ia henia hahinena Heva ena kerere, anina be ia ese Dirava, Hariharibada Tauna dekenai bleim ia atoa danu! Adamu bona Heva idia kara dika, to unai kerere ena metau be Adamu ese ia huaia. Unai dainai aposetolo Paulo ia gwau: “Tau tamona [Adamu] dekena amo kara dika be tanobada dekenai ia vareai, bona kara dika ese mase ia mailaia.”—Roma 5:12.

5. Taunimanima be sibodia idia lohiaia karana ese dahaka ia hamomokania?

⁵ Satani ese Adamu bona Heva ia koidia dainai, idia laloa Iehova ese idia ia lohiaia be anina lasi. Unai ese henanadai ta ia havaraia: Daika be mai ena maoro taunimanima ibounai ia lohiaia totona? Unai henanadai haerelaia totona, Dirava be nega ia henia taunimanima ese sibona idia lohia totona. Ia diba idia vara gaudia ese do idia hamomokania, taunimanima be sibona idia lohiaia neganai, do idia kwalimu lasi. Idia hanaia laganidia lalonai, taunimanima edia lohia daladia ese dika momo ia havaraia. Idia hanaia lagani 100 lalodiai, taunimanima 100,000,000 be tuari lalonai idia mase—idia milioni momo be kerere lasi tatau, hahine bona natudia. Oibe, idia vara gaudia ese idia hamomokania, “taunimanima ta lasi ese iena mauri ia biagua” diba. (Ier. 10:23) Unai dainai, Keristani momokanidia idia abia dae Iehova be idia edia Lohia Tauna.—Aonega Herevadia 3:5, 6 duahia.

6. Tano momo ai hahine be edena bamona idia kara henidia?

⁶ Satani ena tanobada dikana lalonai, tatau bona hahine ese hisihisi idia davaria. (Had. 8:9; 1 Ioa. 5:19) To, hahine be hisihisi badadia momo idia davaria. Hegeregere, hahine toi toi amo ta ta be edia adavana o boifren ese idia hahisidia bada. Tano haida edia kastom lalonai tatau idia lalodia bada, badina idia laloa tatau ese edia bese ena ladana do idia habadaia, bona edia tama sina burukadia bona tubudia do idia naria. Ma tano haida dekenai, kekeni idia laloa bada lasi bona beibi kekenidia momo be sina ese edia bogana lalonai idia hamasedia.

7. Matamanai, Dirava ese tatau bona hahine dekenai edena bamona mauri ia henia?

⁷ Hahine ese idia davaria dagedage karadia be Dirava ese ia moalelaia lasi. Ia be idia dekenai kara maoromaoro bona hemataurai ia hahedinaraia. Iehova ese Heva ia karaia neganai, ia be Adamu ena igui hesiai hahinena lasi. To, ia  be goevadae bona mai ena kara namodia, unai amo ia be Adamu ena durua tauna namona ai ia lao. Unai dainai, dina namba 6 dokonai, “Dirava ese ia karaia vadaeni gaudia ibounai ia itaia, bona momokani idia be namo herea.” (Gen. 1:31) Oibe, Iehova ese ia karaia “gaudia ibounai” be “namo herea.” Matamanai, Dirava ese tatau bona hahine dekenai mauri namona ia henia!

8. (a) Mani hari idia noho taunimanima edia kara oi herevalaia. (b) Ena be haida idia kara dika, to Dirava ese daidia ia lalonamo henidia?

⁸ Eden ai gwau-edeede ia vara murinai, tatau bona hahine edia kara be ia dika ia lao, bona idia hanaia lagani 100 lalodiai ia dika momokani. Baibel ia gwau, “dina gabediai” kara dika be do ia bada herea. Unai ese ia hamomokania, ita be “nega aukadia” ai ita noho. (2 Tim. 3:1-5) Ena be haida idia kara dika, to “Lohiabada [Iehova]” ese tatau bona hahine haida ia lalonamo henidia, badina idia ese ia idia abidadama henia, ena taravatu idia badinaia bona iena lohia dalana idia abia dae.—Salamo 71:5 duahia.

9. Taunimanima hida be Abata amo idia roho mauri, bona dahaka dainai?

⁹ Noa ena nega ai Dirava ese dagedage tanobadana be Abata amo ia hadikaia ore neganai, taunimanima haida sibona idia roho mauri. Bema unai nega ai Noa ena kakadia bona tadidia idia noho, idia danu be Abata lalonai idia mase. (Gen. 5:30) To, Abata amo idia roho mauri hahine bona idia roho mauri tatau edia namba be hegeregere. Idia roho mauri taudia be Noa, ena adavana, edia natudia memero toi bona edia adavadia. Idia be Dirava idia gari henia bona ena ura idia karaia dainai, ia hamauridia. Hari idia noho taudia ibounai be Iehova ese ia hamauria taudia 8 amo idia vara.—Gen. 7:7; 1 Pet. 3:20.

10. Dahaka dainai Iehova ese abidadama bese kwaradia haida edia adavadia ia naria bona durua?

¹⁰ Lagani haida murinai, Dirava ese abidadama bese kwaradia haida edia adavadia ia naria bona durua danu. Idia be edia mauri idia maumauraia lasi, bona Iehova ese ia hanamodia. (Iuda 16) Hegeregere, Aberahamo ena adavana Sara be Uru hanuana ena mauri namona idia rakatania, bona idau tano taudia bamona tano ma haida ai palai rumadia ai idia noho, to ia maumau lasi. Baibel ia gwau: “Sara ese Aberahamo ia kamonai henia bona Aberahamo ia gwauraia ‘lohiabada.’” (1 Pet. 3:6) Mani Isako ena adavana Rebeka ita laloa danu. Ia be harihari gauna ta Iehova amo, bona adavana namona ai ia lao. Unai dainai, Baibel ia gwau: ‘Isako ese Rebeka ia ura henia bada. Unai dainai inai lalokau ese ena lalona ia hagoadaia, bona sinana ena mase dainai ia taitai momo lasi.’ (Gen. 24:67) Ita moale badina hari iseda huanai, Dirava idia abidadama henia hahinedia idia noho, idia be Sara bona Rebeka bamona!

11. Edena dala ai Sipora bona Pua be gari lasi karana idia hahedinaraia?

¹¹ Israela besena be Aigupito ai igui hesiai taudia bamona idia noho neganai idia hutuma idia lao dainai, Farao ese oda ia henia Israela beibi memerodia ibounai idia hamasea totona. To, mani Israela hahine idia mara neganai idia durua hahinedia rua, Sipora bona Pua ita laloa. Idia be Iehova idia gari henia dainai, idia ura lasi Israela beibi memerodia idia hamasea. Unai dainai, gabeai Iehova ese ia hanamodia bona natudia momo idia havaraia.—Eso. 1:15-21.

12. Debora bona Iaele ese dahaka gaukara badana idia karaia?

¹² Diadi taudia ese Israela idia naria neganai, Dirava ese ia durua hahinena ta be peroveta hahinena Debora. Ia ese Diadi Tauna Baraki ia hagoadaia bona Israela taudia ia durua Kanana taudia idia halusia totona. To, Debora ia peroveta edia kwalimu ena hahenamo be Baraki ese do ia abia lasi, badina Dirava ese “hahine ta ena siahu henunai,” Kanana taudia edia tuari biaguna Sisera do ia atoa. Unai ia vara momokani, badina idau bese hahinena Iaele ese Sisera ia hamasea.—Gun. 4:4-9, 17-22.

13. Baibel ese Abigaila be edena bamona ia herevalaia?

 ¹³ Abigaila be lagani 1,100 B.C.E. bamona ai ia noho abidadama hahinena ta. Ia be aonega hahinena, to ena adavana Nabala be kara auka, anina lasi bona kavakava tauna. (1 Sam. 25:2, 3, 25) Davida bona ena orea taudia be Nabala ena kohu idia gimaia, to ia amo aniani totona idia noinoi neganai, idia dekenai ia “hereva dika” bona aniani ia henidia lasi. Unai ese Davida ia habadua dikadika bona ia ura Nabala bona ena tatau do ia hamasedia. Abigaila be unai sivarai ia kamonai neganai, Davida bona ena tatau dekenai aniani bona uaina ia abia lao. Iena kara dainai Davida ese Nabala ia hamasea lasi. (1 Sam. 25:8-18) Gabeai, Davida ese Abigaila ia hamaoroa: “Lohiabada, Israela ena Dirava lau hanamoa noho inai! Badina be hari dina ia ese oi ia siaia.” (1 Sam. 25:32) Nabala ia mase murinai, Davida ese Abigaila ia adavaia.—1 Sam. 25:37-42.

14. Salumu ena natudia kekeni be dahaka gaukara idia karaia, bona hari edena dala ai Keristani hahine danu be unai bamona idia karaia?

¹⁴ Lagani 607 B.C.E. ai, Babulonia tuari taudia be Ierusalema bona dubu helagana idia hadikaia neganai, tatau, hahine bona natudia momo idia hamasea. Gabeai, lagani 455 B.C.E ai, Nehemia ena gunalaia henunai Ierusalema ena magu idia haginia lou. Unai gaukara idia karaia taudia huanai be “Ierusalema tano kahana ena lohia tauna,” Salumu ena natudia kekeni. (Neh. 3:12) Idia be mai ura ida unai gaukara aukana idia karaia. Hari, Keristani hahine momo be mai moale ida konstraksen gaukara idauidau idia karaia, bona edia gaukara ita laloa bada!

15. Dirava ese Maria dekenai dahaka hahenamo ia henia?

¹⁵ Iehova ese hahine haida dekenai mai anina bada hahenamo ia henia. Idia ta be rami hebou kekenina, Maria. Ia be Iosepa ida ia maoheni lalonai, hoa dalanai lauma helaga ena siahu amo ia rogorogo. Dahaka dainai Dirava ese Maria ia abia hidi Iesu ena sinana ai ia lao totona? Dirava ia itaia Maria be mai ena Keristani kara namodia dainai, ia hegeregere iena natuna goevadaena, Iesu do ia naria ela bona ia bada. Oibe, Maria be tanobada ai ia noho tau hereadaena ena sinana ai ia lao be hahenamo badana!—Mat. 1:18-25.

16. Iesu ese hahine be edena bamona ia kara henidia? Haheitalai ta gwauraia.

¹⁶ Iesu be hahine ia kara namo henidia. Hegeregere, “lagani 12 lalonai rara halusia gorerena ia abia” hahinena ena sivarai mani oi laloa. Ia be Iesu murinai ia lao bona ena dabua ia dogoatao. Iesu ese ia gwau-henia lasi to mai hebogahisi ida ia gwau: “Natugu e, emu abidadama ese oi ia hanamoa vadaeni. Mai maino ida oi lao bona inai gorere dikana ese oi do ia hahisia lou lasi.”—Mar. 5:25-34.

17. Pentekoste 33 C.E. ai, dahaka hoa karana ia vara?

¹⁷ Hahine haida be Iesu ena hahediba taudia, bona idia ese Iesu bona ena aposetolo taudia idia naridia. (Luka 8:1-3) Danu, Pentekoste 33 C.E. ai, tatau bona hahine 120 be hoa dalanai Dirava ena lauma helaga idia abia. (Kara 2:1-4 duahia.) Lauma helaga be idia latanai ia bubua karana ese peroveta tauna Ioela ena hereva ia hagugurua, ia gwau: “Lau [Iehova] ese egu Lauma, be taunimanima ibounai dekenai do lau bubua diho. Bona emui natuna tau bona natuna hahine ese, egu peroveta hereva do idia gwauraia hedinarai. . . . Egu Lauma, be hesiai taudia bona hesiai hahinedia danu, edia latanai do lau bubua diho.” (Ioe. 2:28, 29) Pentekoste ai ia vara hoa karana amo Dirava ese ia hahedinaraia gwau-edeede Israela besena amo ena lauma helagana ia kokia, bona “Dirava ena Israela” oreana—tatau bona hahine—dekenai ia henia. (Gal. 3:28; 6:15, 16) Aposetolo edia negai, haroro gaukara idia durua Keristani hahinedia haida be evanelia tauna Filipo ena natuna kekeni foa.—Kara 21:8, 9.

18, 19. (a) Iehova ese tatau bona hahine dekenai dahaka hahenamo ia henia? (b) Salamo torea tauna ese sivarai namona idia harorolaia hahine be edena bamona ia herevalaia?

¹⁸ Lagani 1870 lalodiai, tatau bona hahine haida be tomadiho momokani idia tahua goadagoada. Idia ese Iesu ena sivarai harorolaia gaukarana idia gunalaia, bona inai peroveta herevana idia hagugurua: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.”—Mat. 24:14.

¹⁹ Unai Bible Student taudia edia orea maragina be ia bada ia lao, bona hari idia be Iehova ena Witnes taudia ibounai 8,000,000 mai kahana. Taunimanima 11,000,000 mai kahana be Baibel ena hereva idia kamonai, bona lagani ta ta ai Iesu ena mase ena Anibou dekenai idia mai. Idia momo be hahine. Danu, tanobada hegegemadai Basileia idia harorolaia ful-taim hesiai taudia 1,000,000 mai kahana huanai, momo be hahine. Oibe, Dirava ese hahine dekenai Ia do idia harorolaia ena hahenamo ia henia. Unai ese Salamo torea tauna ena hereva ia hagugurua. Ia gwau: “Iehova ese inai oda ia henia; sivarai namona idia harorolaia hahinedia be tuari orea badana ta bamona.”—Sal. 68:11, NW.

20. Ruma Bese ena Tomadiho bona sibona eda stadi lalonai, daidia edia sivarai ita stadilaia diba?

²⁰ Inai magasin ena rau be hegeregere lasi Baibel lalonai idia noho abidadama hahine momo edia sivarai ai torea totona. To ita ese Baibel bona eda magasin ma haida lalonai edia sivarai ita duahia diba. Hegeregere, ita ese Ruta ena badinaia karana ita laloa dobu diba. (Ruta 1:16, 17) Danu, Kwini Eseta ena sivarai ita duahia neganai, iseda abidadama ia hagoadaia diba. Unai bamona hahine edia sivarai be Ruma Bese ena Tomadiho lalonai ita stadilaia neganai ita idia durua diba. Bema ita be singul taudia, unai bamona sivarai be sibona eda stadi lalonai ita duahia diba.

21. Edena dala ai abidadama hahine ese hekwakwanai negadiai, Iehova idia badinaia?

²¹ Momokani, Iehova ese Keristani hahine edia haroro gaukara ia hanamoa bona hekwakwanai idia davaria neganai ia durudia. Hegeregere, Nazi bona Komiunis gavamani edia lohia negana ai, Keristani hahine be Dirava idia abidadama henia dainai, dagedage idia davaria bona haida idia mase. To, Iehova ese ia durudia dainai, ia idia badinaia noho. (Kara 5:29) Guna bamona, hari danu iseda taihu bona ma haida be Dirava ena lohia siahuna idia abia isi noho. Iehova ese idaunega Israela taudia ia kara henia bamona, hari danu ia ese taihu edia imana ia dogoatao bona ia gwau: “Do umui gari lasi, lau be umui dekenai lau noho!”—Isa. 41:10-13.

22. Nega vaira ai dahaka hahenamo do ita abia?

²² Kahirakahira, abidadama tatau bona hahine ese tanobada be paradaiso ai do idia halaoa, bona toreisi lou taudia milioni momo do idia durua Dirava ena ura idia diba totona. Unai nega ita naria noho lalonai, namona be tatau bona hahine be ‘mai eda lalona tamona’ ida Dirava ena hesiai gaukara ita karaia.—Sep. 3:9.