BAIBEL ia gwau: “Natudia be Dirava ena harihari gauna ita dekenai.” (Sal. 127:3) Unai dainai, beibi matamata ta ia vara neganai, Keristani tama sina idia moale bada.

Danu, beibi ia vara neganai tama sina be maduna badana idia huaia. Dina ta ta ai beibi dekenai aniani namodia do idia henia, unai amo do ia tubu bona ia goada ia lao. To, edia natuna be Iehova ia tura henia namonamo totona, tama sina ese ia dekenai Baibel ena hakaua herevadia idia hadibaia be gau badana. (Aon. 1:8) Edena negai natuna do idia hadibaia matamaia, bona dahaka gaudia idia hadibaia be namo?

Sora hanua dekenai ia noho tauna ta ladana Manoa ena sivarai mani ita laloa. Manoa ena adavana be gabani, to Iehova ena aneru ta ese ia hamaoroa ia be natuna mero ta do ia havaraia. (Gun. 13:2, 3) Manoa bona ena adavana be unai sivarai idia kamonai neganai, idia moale bada. To, idia be gau ta dainai idia lalohekwarahi. Unai dainai Manoa ia guriguri, ia gwau: “Lohiabada e, oi dekenai lau noinoi, mani emu kara, hari oi siaia tauna, ma do oi siaia mai lou, ia ese ai ma do ia hadibaia. Badina ai ura diba, inai mero ia vara neganai, ia dekenai dahaka do ai karaia.” (Gun. 13:8) Oibe, Manoa bona ena adavana be edia natuna do idia naria bona hadibaia dalana idia lalohekwarahilaia. Idia ese edia natuna mero, Samson dekenai Dirava ena taravatu idia hadibaia, bona unai ese anina namona ia havaraia. Baibel ia gwau, “Lohiabada ena Lauma ese Samson ia hagoadaia hamatamaia.” Unai nega amo Samson be Israela taudia edia diadi ai ia lao, bona ia ese hoa karadia momo ia karaia.​—Gun. 13:25; 14:5, 6; 15:14, 15.

Edena nega ai tama sina ese natuna idia hadibaia matamaia be namo? Timoteo be “beibi negana amo” ena sinana, Eunike, bona ena tubuna hahine, Loi ese “Toretore Helagadia” amo idia hadibaia. (2 Tim. 1:5; 3:15) Oibe, Timoteo be do beibi negana Baibel amo idia hadibaia.

Namona be Keristani tama sina ese Dirava ena heduru idia noia, bona palani idia karaia edia natuna be “beibi negana amo” idia hadibaia totona. Aonega Herevadia 21:5 ia gwau: “Mai haheauka danu ia gaukara noho tauna ena laloa, ese anina ia havaraia bada noho.” Beibi ia do vara lasi neganai, namona be tama sina idia palani namonamo. Reana pepa ta dekenai beibi totona do idia karaia gaudia do idia torea. Edia beibi dekenai Iehova do idia hadibaia dalana idia palanilaia be namo. Edia tahua gauna be, natuna be beibi negana amo do idia hadibaia matamaia.

Buka ta (Early Childhood Counts​—A Programming Guide on Early Childhood Care for Development) ia gwau: “Beibi ia vara murina huadia lalonai, iena harana ena varovaro idauidau idia tubu haraga. Unai dainai beibi be gau idauidau ia dibaia haraga.” Namona be tama sina ese unai nega idia gaukaralaia, Dirava bona ena taravatu be beibi dekenai idia hadibaia totona!

Regula painia sina ta be ena natuna kekeni ia herevalaia, ia gwau: “Egu beibi be hua ta sibona neganai, haroro gaukara dekenai lau abia lao. Ena be ia laloparara lasi dahaka ai karaia, to lau diba unai kara ese ia durua. Iena mauri lagani be rua neganai, mai gari lasi ida taunimanima dekenai pepapepa ia hariharilaia.”

Tama sina ese natuna be ia beibi negana amo idia hadibaia neganai, anina namona ia havaraia. To, danu idia diba natuna dekenai Dirava ena hereva idia hadibaia be mai ena hekwarahi.

Tama sina idia hekwarahi natudia idia hadibaia totona, badina vaia natudia be idia helai namonamo lasi bona idia gadara momo. Natudia idia ura gau matamatadia ibounai idia diba haraga. Tama sina ese dahaka idia karaia be namo, unai amo natudia be idia dibaia gaudia do idia laloa bada?

Mani Mose ena hereva Deuteronomi 6:6, 7 ai ita laloa, ia gwau: “Inai Taravatu, hari dina umui dekenai lau henia gaudia do umui laloaboio lasi. Umui emui natudia dekenai inai Taravatu do umui hadibaia goada, ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai, inai Taravatudia do umui herevalaia.” Inai hereva “hadibaia goada” anina be gwauraia loulou. Natu maragina be ia tubu matamata au maragina ta bamona, hanaihanai ranu ia abia be gau badana. Oibe, gwauraia loulou karana ese taunimanima badadia ia durua, mai anina bada gaudia idia laloatao totona. Unai hegeregerena, gwauraia loulou karana ese natudia do ia durua danu!

Tama sina be natudia dekenai Dirava ena hereva momokani idia hadibaia totona, nega idia atoa be namo. Hari inai negai, tama sina haida be idia bisi bada dainai, unai bamona idia karaia be auka. To, aposetolo Paulo ese Keristani taudia ia hagoadaia Keristani maduna idauidau idia huaia totona, nega do idia “hoia.” (Efe. 5:15, 16, futnout) Edena dala ai tama sina ese unai idia karaia diba? Elda tauna ta mani ita laloa. Ena adavana be regula painia taihu bona ia bisi bada herea. Unai dainai, tadikaka be palani namona do ia karaia, unai amo nega do ia atoa ena natudia do ia hadibaia, ena kongrigeisen maduna do ia huaia, bona moni gaukara do ia karaia. Idia be dahaka do idia karaia edia natuna kekeni idia hadibaia totona?  Tadikaka ia gwau: “Moni gaukara lau do lao lasi neganai, lau bona egu adavana be ia dekenai Lauegu Baibel Sivarai Bukana o Dina Iboudiai Buka Helaga Tahua buklet ai duahia. Hanuaboi ai, ia do mahuta lasi neganai, ia dekenai Baibel ena sivarai ta ai duahia, bona haroro gaukara ai lao neganai, ia ai abia lao danu. Ai ura ia be do beibi negana amo do ai hadibaia.”

Ita ura eda natudia idia bada idia lao neganai, mauri ena maduna idauidau do idia huaia. To, idia ita hadibaia ena badina badana be, mai edia kudouna ibounai ida Dirava do idia lalokau henia totona.​—Mar. 12:28-30.

Salamo 127:4 ia gwau: “Eregabe tauna ena natuna taudia be, tuari tauna ena imana dekenai peva ena diba bamona.” Baibel ese ia hahedinaraia, natudia be tuari tauna ena imana ai ia dogoatao “diba” bamona, bona ia ura ia pidia gauna ia makaia namonamo. Tuari tauna ena imana ai diba be nega sisina sibona do ia dogoatao bona ia pidia neganai, ia abia lou diba lasi. Unai hegeregerena, natudia be edia tama sina ida nega sisina sibona idia noho, bena taunimanima badadia ai do idia lao. Unai dainai, tama sina ese unai nega idia gaukaralaia be namo, Dirava ena hakaua herevadia be edia natudia edia kudouna bona lalona dekenai idia atoa totona.

Aposetolo Ioane be haida ia durua Iehova idia tomadiho henia totona, bona ia herevalaidia, ia gwau: “Lau kamonai egu natudia be hereva momokani ai idia raka noho neganai, lau moale bada bona moale ta ese unai moale ia hereaia lasi.” (3 Ioa. 4) Keristani tama sina be unai bamona idia moale diba, bema idia itaia edia natudia be “hereva momokani ai idia raka noho.”