Pablisa matamata ta ladana, María Isabel be siti badana, San Bernardo ai ia noho​—⁠unai siti be South America ena tano ladana, Chile, ai ia noho. María Isabel bona ena famili be Mapuche hanua taudia. Idia ibounai idia gaukara goada, Mapuche taudia edia Mapudungun gado, o Mapuche gado, kongrigeisen matamata ta idia haginia totona.

María Isabel ia kamonai Memorial hebouna be Mapudungun gado ai do idia karaia, bona unai gado ena invateisen pepadia 2,000 idia printaia, idia hariharilaia totona. Vadaeni, María Isabel be sibona dekenai ia nanadaia, ‘Dahaka do lau karaia unai gaukara lau durua totona?’ Ia ese Witnes matamata taudia haida edia ekspiriens ia laloa, hegeregere edena dala ai idia ese sikuli ai edia klas turadia bona tisa idia haroro henia. María Isabel be ena tama sina ida idia herevahereva, bona idia gwau ia ese palani ta do ia karaia, ena sikuli ai unai invateisen pepadia ia hariharilaia totona. María Isabel be dahaka palani ia karaia?

María Isabel ese ia karaia gau ginigunana be, sikuli idia naria taudia ia noia, bema namo sikuli ena iduara badana dekenai invateisen pepana ta do ia atoa. Unai taudia ese gwaumaoro idia henia bona María Isabel ena gaukara namona dainai ia idia hanamoa. Daba ta ai, hedmasta be laud-spika amo sikuli taudia edia ladana ia gwauraia neganai, unai invateisen pepana ia herevalaia danu!

Gabeai, María Isabel be tisa ibounai ia noia bema namo klasrum ibounai do ia vadivadi henia. Tisa amo gwaumaoro ia abia murinai, ia ese klas ta ta ia vadivadi henia bona ia henanadai bema stiuden haida be Mapuche taudia. Ia gwau: “Lau laloa Mapuche stiuden taudia be 10 o 15 sibona, to lasi, idia be momo, badina lau ese invateisen pepadia 150 lau hariharilaia!”

Hahine ta be sikuli ena iduara ai Memorial ena invateisen pepa badana ia itaia, bona ia henanadai unai hebou ia lao totona daika ia hereva henia be namo. Ia hoa bada badina mauri lagani 10 kekeni ta dekenai idia hakaua lao. María Isabel be mai kiri ida ia gwau: “Unai hahine ia laloa taunimanima badana ta do ia itaia.” María Isabel ese unai hahine dekenai invateisen pepana ia henia, bona ena anina ia herevalaia. Unai murinai ena adres ia abia, unai amo ia bona ena tama sina ese unai hahine do idia vadivadi henia, Dirava ena Basileia idia herevalaia totona. Mapudungun gado ena pablisa taudia 20 idia moale bada, badina unai hahine bona kamonai taudia 26 be Memorial hebouna dekenai idia lao. Mapudungun gado grup be ia bada ia lao bona hari ia be kongrigeisen ta!

Herevana emu mauri lagani be hida, to María Isabel bamona emu sikuli o gaukara turadia oi boiria Memorial, pablik tok eiava distrik hebouhebou ta idia mai totona, a? Namona be iseda buka o magasin ai idia noho ekspiriens oi duahia, idia ese oi do idia durua unai bamona oi karaia totona. Danu, Iehova ena lauma helaga totona oi guriguri, unai amo mai gari lasi ida oi haroro diba. (Luka 11:13) Bema unai oi karaia, do oi moale bona emu gaukara ese anina namona do ia havaraia.