Ginaimpluwensiahan gid sang Yawa kag mga demonyo ang mga tawo amo nga ang Biblia nagsiling: “Ang bug-os nga kalibutan yara sa gahum sang Malaut.” (1 Juan 5:​19, Biblia sang Katilingban sang mga Kristiano) Ginsugid sang Biblia ang mga paagi sang Yawa para maimpluwensiahan ang mga tawo.

•   Pagpangdaya. Ginapalig-on sang Biblia ang mga Cristiano nga ‘magbato sa malaot nga mga pahito ni Satanas.’ (Efeso 6:​11, Ang Pulong sang Dios) Ang isa sa mga pahito niya amo ang pagpapati sa mga tawo nga ang iya mga tiglawas mga alagad sang Dios.​—2 Corinto 11:13-​15.

•   Espiritismo. Ginapatalang sang Yawa ang mga tawo paagi sa mga espiritista, manughimalad, manugpakot, kag mga astrologo. (Deuteronomio 18:10-​12) Ang paggamit sang droga, hipnotismo, kag mga teknik sa pagpamalandong nga nagapablangko sang hunahuna mahimo man bangdan sang pagkontrol sang mga demonyo.​—Lucas 11:24-​26.

•   Butig nga relihion. Ang mga relihion nga nagatudlo sang butig nga mga doktrina nagapatalang sa mga tawo amo nga ginasupak nila ang Dios. (1 Corinto 10:20) Ining butig nga mga pagpati ginatawag sang Biblia nga “mga panudlo sang mga demonyo.”​—1 Timoteo 4:1.

•   Pagkontrol. Mabasa sa Biblia ang parte sa mga tawo nga ginakontrol sang malaut nga mga espiritu. Kon kaisa, ang mga tawo nga ginasudlan sang mga demonyo nagakabulag, nagaapa, ukon nagahalit pa gani sang ila kaugalingon.​—Mateo 12:22; Marcos 5:​2-5.

Kon paano malikawan ang impluwensia sang Yawa

 Indi ka dapat mahadlok nga makontrol sang mga demonyo kay ginasugid sang Biblia kon paano mo mapamatukan ang Yawa sing madinalag-on:

•   Tun-i ang mga paagi sang Yawa para ‘mahibaluan mo ang iya mga pahito.’​—2 Corinto 2:​11.

•   Tun-i ang Biblia kag sunda ang imo natun-an. Ang pagtuman sa mga prinsipio sang Biblia makaamlig sa imo batok sa impluwensia sang Yawa.​—Efeso 6:​11-​18.

•   Ihaboy ang bisan ano nga may koneksion sa mga demonyo. (Binuhatan 19:19) Nalakip sa sini ang mga musika, libro, magasin, poster, kag mga video nga may labot sa espiritismo.