Kilala Mo Bala ang Imo Langitnon nga Amay?

DAW ano mo ka kilala ang imo amay? Mahimo nga natingala ka sa sini nga pamangkot, ilabi na kon nagdaku ka sa mahigugmaon nga pamilya. ‘Siempre, kilala ko gid si Tatay!’ mahimo nga isabat mo. Matuod gid man nga nahibaluan sang kalabanan nga tawo kon ano ang luyag kag indi luyag sang ila amay, kon ano ang mangin reaksion niya sa pila ka kahimtangan, kag kon paano niya ginaatipan ang iya pamilya.

Apang, mahimo may mga tion nga nakibot ka sa wala mo ginapaabot nga reaksion sang imo amay. Halimbawa, mahimo nga kilala sang bata ang iya amay bilang kalmado kag malulo. Nian, hinali lang nga may indi maayo nga natabo. Nakita karon sang bata ang iya amay nga determinado kag malig-on gid sa pag-amlig sa iya pamilya.

Kamusta naman kon tuhoy sa aton Manunuga? Tuhoy sa iya ang Biblia nagasiling: “Paagi sa iya kita may kabuhi kag nagahulag kag nagaluntad.” (Binuhatan 17:28) Utang naton sa Dios ang aton kabuhi; gani sia ang Amay sang tanan nga nagakabuhi. (Isaias 64:8) Kon amo sini ang imo ginabatyag tuhoy sa Dios, maayo kag nagakaigo gid ini. Apang, para sa aton kaayuhan kag kalipay, madamo pa ang aton hibaluon kag dapat tun-an tuhoy sa iya.

Ang imo balatyagon kag pagtahod sa imo amay nagadepende sa kon daw ano mo sia ka kilala. Sing kaanggid, samtang ginakilala mo sing maayo ang Dios, magasuod pa gid ang imo kaangtanan sa iya. Kon tinguhaan mo nga kilalahon pa gid ang Dios kag tun-an nga himuon ang iya kabubut-on, mabuligan ka niya nga mabatas ang mga kabudlayan sa kabuhi.

Ano nga sahi sang persona ang Dios? Kon mahibaluan naton ang iya mga kinaiya, ano ang epekto sini sa aton? May mga salabton bala ang pagkilala sa iya? Makita mo ang mga sabat sa sini nga mga pamangkot sa masunod nga artikulo.

[Blurb sa pahina 3]

Ang imo pagtamod sa iban mahimo maapektuhan sang imo pagkakilala sa ila