Malipayon nga mga Alagad ni Jehova
Malipayon nga mga Alagad ni Jehova
“Malipayon ang mga mahunahunaon sang ila espirituwal nga kinahanglanon.”—MATEO 5:3.
1. Ano ang matuod nga kalipay, kag ano ang ginapakita sini?
GINAPAKABAHANDI gid sang katawhan ni Jehova ang ila kalipay. Nagtuaw si salmista David: “Malipayon ang katawhan nga ang ila Dios amo si Jehova!” (Salmo 144:15) Ang kalipay isa ka maayo nga pamatyag. Tudok gid ang aton kalipay bangod nahibaluan naton nga nahamuot si Jehova sa aton. (Hulubaton 10:22) Ginapakita sini nga kalipay nga suod ang aton relasyon sa aton langitnon nga Amay kag nga nahibaluan naton nga ginahimo naton ang iya kabubut-on. (Salmo 112:1; 119:1, 2) Talalupangdon nga ginsambit ni Jesus ang siam ka rason sa pagkalipay. Paagi sa pag-usisa sini nga mga rason nga binagbinagon sa sining duha ka nagasundanay nga artikulo, mahibaluan naton nga mangin malipayon gid kita kon mag-alagad kita sing matutom sa “malipayon nga Dios,” si Jehova.—1 Timoteo 1:11.
Paghunahuna sa Aton Espirituwal nga Kinahanglanon
2. Sa ano nga okasyon nagpamulong si Jesus tuhoy sa kalipay, kag ano ang iya introduksion?
2 Sang 31 C.E., ginhatag ni Jesus ang isa sa labing bantog nga mga diskurso sa bug-os nga maragtas. Gintawag ini nga Sermon sa Bukid bangod ginhatag ini ni Jesus sa higad sang bukid nga nagatamwa sa Dagat sang Galilea. Ang Ebanghelyo ni Mateo nagaasoy: “Sang nakita [ni Jesus] ang mga kadam-an nagtaklad sia sa bukid; kag sang nakalingkod na sia nagpalapit sa iya ang iya mga alagad; kag gintikab niya ang iya baba kag nagsugod sa pagtudlo sa ila, nga nagasiling: ‘Malipayon ang mga mahunahunaon sang ila espirituwal nga kinahanglanon, kay ila ang ginharian sang mga langit.’” Kon badbaron sing literal, ang introduksion ni Jesus nagasiling: “Malipayon ang mga imol sa espiritu,” ukon “Malipayon ang mga nagapakilimos sa espiritu.” (Mateo 5:1-3; Kingdom Interlinear; nota sa ubos) Ang Biblia sang Philippine Bible Society nagasiling: “Bulahan ang mga imol sa espiritu.”
3. Paano ang pagkamapainubuson makahatag sa aton sing kalipay?
3 Sa iya sermon sa higad sang bukid, ginpakita ni Jesus nga mas malipayon ang isa ka tawo kon mahunahunaon sia sa iya espirituwal nga kinahanglanon. Bangod nahibaluan sang mapainubuson nga mga Cristiano nga makasasala sila, nagapakitluoy sila kay Jehova nga patawaron sila pasad sa halad nga gawad ni Cristo. (1 Juan 1:9) Amo kon ngaa may malinong sila nga panghunahuna kag malipayon gid. “Malipayon sia nga ang iya paglalis ginpatawad, nga ang iya sala gintabunan.”—Salmo 32:1; 119:165.
4. (a) Sa anong mga paagi mapakita naton nga ginahunahuna naton ang aton espirituwal nga kinahanglanon kag ang iya sang iban? (b) Ano ang dugang pa nga nagapahalipay sa aton kon mahunahunaon kita sa aton espirituwal nga kinahanglanon?
4 Ang paghunahuna sa aton espirituwal nga kinahanglanon nagapahulag sa aton nga basahon ang Biblia adlaw-adlaw kag magbenepisyo gikan sa espirituwal nga pagkaon nga ginaaman sang “matutom kag mainandamon nga ulipon” sa “nagakaigo nga tion,” kag magtambong sa Cristianong mga miting sing regular. (Mateo 24:45; Salmo 1:1, 2; 119:111; Hebreo 10:25) Bangod sang aton gugma sa isigkatawo, nahibaluan naton ang espirituwal nga mga kinahanglanon sang iban kag nagapahulag ini sa aton nga magmakugi sa pagbantala kag sa pagpanudlo sing maayong balita sang Ginharian. (Marcos 13:10; Roma 1:14-16) Nalipay kita nga ipaalinton sa iban ang mga kamatuoran sang Biblia. (Binuhatan 20:20, 35) Nagadugang pa ang aton kalipay kon ginapamalandungan naton ang matahom nga paglaum sa Ginharian kag ang mga pagpakamaayo nga ihatag sang Ginharian. Para sa “diutay nga panong” sang hinaplas nga mga Cristiano, ang paglaum sa Ginharian nagakahulugan sing di-mamalatyon nga kabuhi sa langit subong bahin sang Ginharian nga panguluhan ni Cristo. (Lucas 12:32; 1 Corinto 15:50, 54) Para sa “iban nga mga karnero,” nagakahulugan ini sing kabuhi nga walay katapusan sa paraiso nga duta sa idalom sang Ginharian nga panguluhan.—Juan 10:16; Salmo 37:11; Mateo 25:34, 46.
Kon Paano Mangin Malipayon ang mga Nagalalaw
5. (a) Ano ang kahulugan sang ekspresyon nga “mga nagalalaw”? (b) Paano malugpayan ini nga mga nagalalaw?
5 Ang mga pulong sang masunod nga rason sa pagkalipay nga ginsambit ni Jesus daw nagasumpakilay. Nagsiling sia: “Malipayon ang mga nagalalaw, kay lugpayan sila.” (Mateo 5:4) Paano mangin malipayon ang isa ka tawo nga nagalalaw? Agod mahangpan naton ang kahulugan sang ginpamulong ni Jesus, dapat naton binagbinagon kon ano nga paglalaw ang ginapatuhuyan niya. Ginpaathag ni disipulo Santiago nga dapat kita maglalaw bangod sang aton pagkamakasasala. Nagsulat sia: “Tinlui ang inyo mga kamot, kamo nga mga makasasala, kag putlia ang inyo tagipusuon, kamo nga mga indi makapamat-od. Hatagi ninyo sing dalan ang kalisod kag maglalaw kag magtangis. Bayluhi ang inyo kinadlaw sing paglalaw kag ang inyo kalipay sing kasubo. Paubsa ang inyo kaugalingon sa panulok ni Jehova, kag bayawon niya kamo.” (Santiago 4:8-10) Malugpayan ang mga nagakasubo gid sa ila makasasala nga kahimtangan kon mahibaluan nila nga ang ila mga sala sarang mapatawad kon magtuo sila sa halad nga gawad ni Cristo kag magpakita sing matuod nga paghinulsol paagi sa paghimo sang kabubut-on ni Jehova. (Juan 3:16; 2 Corinto 7:9, 10) Nian, makatigayon sila sing hamili nga relasyon kay Jehova kag makalaum nga magkabuhi sing dayon agod alagdon sia kag dayawon. Nagahatag ini sa ila sing tudok nga kalipay.—Roma 4:7, 8.
6. Sa ano nga kahulugan nagalalaw ang iban, kag paano sila ginalugpayan?
6 Nalakip man sa ginpamulong ni Jesus ang mga nagalalaw bangod sang makangilil-ad nga mga kahimtangan sa duta. Gin-aplikar ni Jesus sa iya kaugalingon ang tagna sang Isaias 61:1, 2, nga nagasiling: “Ang espiritu sang Soberanong Ginuong Jehova yari sa akon, bangod nga ginhaplas ako ni Jehova sa pagwali sing maayong balita sa mga mahagop. Ginpadala niya ako sa pagbugkos sa mga buong sing tagipusuon, . . . sa paglugpay sa tanan nga nagalalaw.” Ini nga hilikuton naaplikar man sa hinaplas nga mga Cristiano nga yari pa sa duta, nga nagatuman sini upod sa bulig sang ila mga kaupod, ang “iban nga mga karnero.” Sila tanan nagapakigbahin sa pagbutang sing simbuliko nga mga tanda sa agtang sang “mga tawo nga nagapanghayhay kag nagabakho sa tanan nga kalangil-aran nga ginahimo sa tunga sini [ang apostata nga Jerusalem, nga nagalaragway sa Cristiandad].” (Ezequiel 9:4) Ini nga mga nagalalaw ginalugpayan sang “maayong balita sang ginharian.” (Mateo 24:14) Nalipay sila sa paghibalo nga sa indi madugay buslan na sang matarong nga bag-ong kalibutan ni Jehova ang malaut nga sistema sang mga butang ni Satanas.
Malipayon ang mga Malulo
7. Ano ang indi buot silingon sang termino nga “malulo”?
7 Ginpadayon ni Jesus ang iya Sermon sa Bukid paagi sa pagsiling: “Malipayon ang mga malulo, kay magapanubli sila sang duta.” (Mateo 5:5) Kon kaisa, ang isa ka tawo nga malulo ginatamod nga may maluya nga personalidad. Apang, indi ini matuod. Sa pagpaathag sang kahulugan sang tinaga nga ginbadbad “malulo,” ang isa ka iskolar sa Biblia nagsulat: “Ang labaw nga kinaiya sang tawo nga [malulo] amo nga sia isa ka tawo nga may kontrol gid sa iya kaugalingon. Wala ini nagapatuhoy sa maluya nga buot, pagkamasentimiento, kag paghiposhipos lamang. Isa ini ka kontrolado nga kusog.” Si Jesus nagsiling tuhoy sa iya kaugalingon: “Ako malulo kag mapainubuson sing tagipusuon.” (Mateo 11:29) Apang, maisugon nga ginpangapinan ni Jesus ang matarong nga mga prinsipio.—Mateo 21:12, 13; 23:13-33.
8. Sa ano suod nga naangot ang kalulo, kag ngaa kinahanglan naton ini nga kinaiya sa aton pagpakig-angot sa iban?
8 Kon amo, ang kalulo suod nga naangot sa pagpugong sa kaugalingon. Sa pagkamatuod, ang kalulo kag pagpugong sa kaugalingon magkaupod nga ginlista ni apostol Pablo sang ginsambit niya ang “mga bunga sang espiritu.” (Galacia 5:22, 23) Ang kalulo dapat palambuon sa bulig sang balaan nga espiritu. Isa ini ka Cristianong kinaiya nga makabulig sa pagpakighidait sa mga tawo sa sulod kag sa gua sang kongregasyon. Nagsulat si Pablo: “Panapti ang inyo kaugalingon sing mapinalanggaon nga gugma nga may kaawa, kaayo, mapainubuson nga panghunahuna, kalulo, kag pagkamainantuson. Padayon kamo nga magpinaumuray sa isa kag isa kag hilway nga magpinatawaray sa isa kag isa.”—Colosas 3:12, 13.
9. (a) Ngaa dapat kita magmalulo indi lamang sa aton pagpakig-angot sa iban nga mga tawo? (b) Ngaa ‘mapanubli [sang mga malulo] ang duta’?
9 Apang, dapat kita magmalulo indi lamang sa aton pagpakig-angot sa iban nga mga tawo. Ginapakita man naton ang aton kalulo paagi sa kinabubut-on nga pagpasakop sa pagkasoberano ni Jehova. Ang panguna nga halimbawa sa sini amo si Jesucristo, nga sang diri pa sa duta nagpakita sing kalulo kag bug-os nga nagpasakop sa kabubut-on sang iya Amay. (Juan 5:19, 30) Si Jesus ang panguna nga manunubli sang duta, kay sia ang gintangdo nga Manuggahom sa sini. (Salmo 2:6-8; Daniel 7:13, 14) Upod sa iya amo ang 144,000 ka “masigkamanunubli,” nga ginpili gikan sa “katawhan” agod ‘maggahom subong mga hari sa ibabaw sang duta.’ (Roma 8:17; Bugna 5:9, 10; 14:1, 3, 4; Daniel 7:27) Gamhan ni Cristo kag sang iya kaupod nga mga manuggahom ang minilyon sang tulad-karnero nga mga lalaki kag mga babayi nga magaagom sang makalilipay nga katumanan sang matagnaon nga salmo: “Ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.”—Salmo 37:11; Mateo 25:33, 34, 46.
Malipayon ang mga Ginagutom sa Pagkamatarong
10. Ano ang isa ka paagi agod mabusog ang mga ‘ginagutom kag ginauhaw sa pagkamatarong’?
10 Ang masunod nga rason sa pagkalipay nga ginsambit ni Jesus sang nagapamulong sia sa higad sang bukid sa Galilea amo: “Malipayon ang mga ginagutom kag ginauhaw sa pagkamatarong, kay sila busgon.” (Mateo 5:6) Si Jehova ang nagahimo sing talaksan sang pagkamatarong para sa mga Cristiano. Busa, ang mga ginagutom kag ginauhaw sa pagkamatarong matuod gid nga ginagutom kag ginauhaw sa pagtuytoy sang Dios. Nahibaluan gid nila nga makasasala sila kag di-himpit kag nalangkag nga mahamut-an ni Jehova. Nalipay gid sila sang matun-an nila gikan sa Pulong sang Dios nga kon maghinulsol sila kag mangayo sing kapatawaran pasad sa halad nga gawad ni Cristo, makatigayon sila sing matarong nga tindog sa atubangan sang Dios!—Binuhatan 2:38; 10:43; 13:38, 39; Roma 5:19.
11, 12. (a) Paano matigayon sang hinaplas nga mga Cristiano ang pagkamatarong? (b) Paano ginpaumpawan ang kauhaw sa pagkamatarong sang mga kaupod sang mga hinaplas?
11 Nagsiling si Jesus nga mangin malipayon sila, kay “sila busgon.” (Mateo 5:6) Ang hinaplas nga mga Cristiano nga gintawag agod “maggahom subong mga hari” upod kay Cristo sa langit ginapahayag nga “matarong para sa kabuhi.” (Roma 5:1, 9, 16-18) Gin-adoptar sila ni Jehova subong espirituwal nga mga anak niya. Mangin masigkamanunubli sila ni Cristo, nga gintawag agod mangin mga hari kag mga saserdote sa iya langitnon nga Ginharian nga panguluhan.—Juan 3:3; 1 Pedro 2:9.
12 Ang mga kaupod sang mga hinaplas wala pa mapahayag nga matarong para sa kabuhi. Apang, bangod sang ila pagtuo sa ginpaagay nga dugo ni Cristo, ginakilala sila ni Jehova nga may isa ka kasangkaron sang pagkamatarong. (Santiago 2:22-25; Bugna 7:9, 10) Ginakabig sila nga matarong subong mga abyan ni Jehova nga pagaluwason sa tion sang “dakung kapipit-an.” (Bugna 7:14) Ang ila kauhaw sa pagkamatarong dugang pa nga paumpawan kon, sa idalom sang “bag-ong mga langit,” mangin bahin na sila sang bag-ong duta nga ‘pagapuy-an sang pagkamatarong.’—2 Pedro 3:13; Salmo 37:29.
Malipayon ang mga Maluluy-on
13, 14. Sa anong praktikal nga mga paagi dapat kita magpakita sing kaluoy, kag ano ang benepisyo sini sa aton?
13 Sa pagpadayon sang iya Sermon sa Bukid, nagsiling si Jesus: “Malipayon ang mga maluluy-on, kay sila pakitaan sing kaluoy.” (Mateo 5:7) Sa hukmanan, ang kaluoy nagapatuhoy sa kaluoy sang isa ka hukom nga indi pag-ipadapat sa isa nga nakasala ang bug-os nga silot nga ginatugot sang kasuguan. Apang, sa Biblia, ang orihinal nga mga tinaga nga ginbadbad “kaluoy” masami nga nagapatuhoy sa pagpakita sing konsiderasyon ukon kaluoy nga nagahatag sing kaumpawan sa mga kubos. Sa amo, ginapakita sang maluluy-on nga mga tawo nga mainawaon gid sila. Ang ilustrasyon ni Jesus tuhoy sa mabinuligon nga Samaritano isa ka maayong halimbawa sang isa ka indibiduwal nga “nagpakita sing kaluoy” sa isa ka tawo nga nagakinahanglan sing bulig.—Lucas 10:29-37.
14 Agod maeksperiensiahan naton ang kalipay sa pagpakita sing kaluoy, dapat kita magpakita sing kaayo sa mga nagakinahanglan sini. (Galacia 6:10) Nagbatyag si Jesus sing kaawa sa mga tawo nga iya nakita. “Napahulag sia sang kaluoy sa ila, bangod subong sila sang mga karnero nga wala sing manugbantay. Kag nagsugod sia sa pagtudlo sa ila sing madamo nga butang.” (Marcos 6:34) Nahibaluan ni Jesus nga ang kinahanglan gid sang katawhan amo ang espirituwal nga bulig. Mapakita man naton nga mainawaon kag maluluy-on kita kon ipaalinton naton sa iban ang butang nga ginakinahanglan gid nila—ang “maayong balita sang ginharian.” (Mateo 24:14) Makatanyag man kita sing praktikal nga bulig sa may edad na nga mga masigka-Cristiano, mga balo nga babayi, kag mga ilo kag “maghambal sing malugpayon sa mga kalag nga ginapung-awan.” (1 Tesalonica 5:14; Hulubaton 12:25; Santiago 1:27) Indi lamang nga magahatag ini sa aton sing kalipay kundi kaluy-an man kita ni Jehova.—Binuhatan 20:35; Santiago 2:13.
Putli sing Tagipusuon kag Mahidaiton
15. Paano kita mangin putli sa tagipusuon kag mahidaiton?
15 Ginsambit ni Jesus ang ikan-um kag ikapito nga rason sa pagkalipay nga amo ang masunod: “Malipayon ang mga putli sing tagipusuon, kay makita nila ang Dios. Malipayon ang mga mahidaiton, kay tawgon sila nga ‘mga anak sang Dios.’” (Mateo 5:8, 9) Ang putli nga tagipusuon matinlo indi lamang sa moral kundi sa espirituwal man kag bug-os tagipusuon nga nagasimba kay Jehova. (1 Cronica 28:9; Salmo 86:11) Ang mga tawo nga mahidaiton malinong nga nagapakig-upod sa ila Cristianong mga kauturan kag, kon mahimo, sa ila mga isigkatawo man. (Roma 12:17-21) Nagatinguha sila nga “pangitaon . . . ang paghidait kag tigayunon ini.”—1 Pedro 3:11.
16, 17. (a) Ngaa ginatawag ang mga hinaplas nga “mga anak sang Dios,” kag paano nila ‘makita ang Dios’? (b) Paano ‘makita sang “iban nga mga karnero” ang Dios’? (c) Paano kag san-o, sa bug-os nga kahulugan, ang “iban nga mga karnero” mangin “mga anak sang Dios”?
16 Ang mga mahidaiton nga may putli nga tagipusuon ginasaaran nga “tawgon nga ‘mga anak sang Dios’” kag ‘makakita sa Dios.’ Gin-adoptar ni Jehova ang hinaplas nga mga Cristiano subong “mga anak” niya samtang sa duta pa sila. (Roma 8:14-17) Kon banhawon na sila agod makaupod ni Cristo sa langit, magaalagad sila sa atubangan ni Jehova kag makita gid nila si Jehova.—1 Juan 3:1, 2; Bugna 4:9-11.
17 Ang mahidaiton nga “iban nga mga karnero” nagaalagad kay Jehova sa idalom sang Maayong Manugbantay, si Cristo Jesus, nga mangin ila “Dayon nga Amay.” (Juan 10:14, 16; Isaias 9:6) Ang mga makapasar sa hingapusan nga pagtilaw sa tapos sang Isa ka Libo ka Tuig nga Paghari ni Cristo pagaadoptaron subong dutan-on nga mga anak ni Jehova kag “magaagom sing mahimayaon nga kahilwayan sang mga anak sang Dios.” (Roma 8:21; Bugna 20:7, 9) Samtang ginapaabot nila ini, ginatawag nila si Jehova nga ila Amay, bangod gindedikar nila ang ila kabuhi sa iya kag ginakilala sia nga amo ang ila Taghatag sing Kabuhi. (Isaias 64:8) Kaangay ni Job kag ni Moises sang dumaan nga tion, ‘makita nila ang Dios’ paagi sa ila mga mata sang pagtuo. (Job 42:5; Hebreo 11:27) Paagi sa ‘mga mata sang ila tagipusuon’ kag paagi sa sibu nga ihibalo tuhoy sa Dios, makita nila ang dalayawon nga mga kinaiya ni Jehova kag nagatinguha sila nga ilugon sia paagi sa paghimo sang iya kabubut-on.—Efeso 1:18; Roma 1:19, 20; 3 Juan 11.
18. Suno sa una nga pito ka rason sa pagkalipay nga ginsambit ni Jesus, sin-o karon ang nakasapo sing matuod nga kalipay?
18 Nahangpan na naton nga ang mga mahunahunaon sang ila espirituwal nga kinahanglanon, ang mga nagalalaw, ang mga malulo, ang mga ginagutom kag ginauhaw sa pagkamatarong, ang mga maluluy-on, ang mga putli sing tagipusuon, kag ang mga mahidaiton makasapo sing matuod nga kalipay paagi sa pag-alagad kay Jehova. Apang, ini nga mga tawo pirme nga nakasumalang sing pagpamatok kag paghingabot pa gani. Nadula bala ang ila kalipay bangod sini? Binagbinagon ini nga pamangkot sa masunod nga artikulo.
Subong Repaso
• Ano nga kalipay ang naeksperiensiahan sang mga mahunahunaon sang ila espirituwal nga kinahanglanon?
• Sa anong mga paagi ginalugpayan ang mga nagalalaw?
• Paano kita mangin malulo?
• Ngaa dapat kita mangin maluluy-on, putli sing tagipusuon, kag mahidaiton?
[Mga Pamangkot sa Pagtinuon]
[Retrato sa pahina 10]
“Malipayon ang mga mahunahunaon sang ila espirituwal nga kinahanglanon?”
[Mga retrato sa pahina 10]
“Malipayon ang mga ginagutom kag ginauhaw sa pagkamatarong”
[Retrato sa pahina 10]
“Malipayon ang mga maluluy-on”
