Mapaayo Bala sang Pagtuo ang Nagamasakit?

KON nagamasakit, luyag naton mapaumpawan kag mag-ayo. Mahimo nga nahibaluan mo gikan sa Biblia nga madamong beses nga gin-ayo ni Jesucristo ang tanan nga sahi sang balatian, sa amo napaumpawan ang madamo nga nagamasakit. Paano nahanabo ini nga mga pagpang-ayo? Paagi sa “gahom sang Dios,” siling sang Biblia. (Lucas 9:​42, 43, NW; Binuhatan 19:​11, 12) Gani, ang balaan nga espiritu sang Dios ang nagpaayo, indi ang pagtuo sang indibiduwal. (Binuhatan 28:7-9) Amo kon ngaa wala ginasilingan ni Jesus ang mga nagamasakit nga magtuo anay sa iya agod mag-ayo.

Mahimo mamangkot ka: ‘Wala na bala karon sing milagruso nga pagpang-ayo, ukon mahanabo pa ayhan liwat ang pagpang-ayo kaangay sa ginhimo ni Jesus? Ano ang paglaum para sa mga nagaantos sing masakit ukon di-mag-ayo nga balatian?’

Ginapaathag sang Biblia nga mahanabo liwat sa matarong nga bag-ong kalibutan sang Dios, ang milagruso nga pagpang-ayo nga ginhimo ni Jesus sang yari pa sia sa duta paagi sa gahom sang Dios. Malipay ang mga Saksi ni Jehova sa inyo lugar nga ipakita sa imo kon paano kag kon san-o himuon sang Dios ang indi mahimo sang mga faith healer​​—⁠⁠ang pagdula sa tanan nga balatian, kag sa kamatayon. Huo, ‘lamunon sang Dios sing dayon ang kamatayon.’​​—⁠⁠Isaias 25:8.