Mga Pamangkot Gikan sa mga Bumalasa

Ang Colosas 1:16 nagasiling nahanungod sa Anak sang Dios nga “ang tanan iban pa nga mga butang gintuga paagi sa iya kag tungod sa iya.” Sa anong kahulugan nga ang tanan nga butang gintuga “tungod” sa Anak sang Dios, nga si Jesus?

Gingamit ni Jehova ang iya bugtong nga Anak subong ang batid nga manugpangabudlay sa pagtuga sang tanan iban pa nga butang, nga amo, ang tanan nga butang magluwas kay Jesus mismo. (Hulubaton 8:27-30; Juan 1:⁠3) Sing nagakaigo, ang Anak nakatigayon sing kalipay sa sini nga mga binuhatan, kag sa sini nga kahulugan nga gintuga ini “tungod” sa iya.

Nahibaluan naton nga ang tawhanon nga mga ginikanan nagalaum nga makatigayon sing daku nga kalipay gikan sa ila mga kabataan. Gani, ang hulubaton sa Biblia nagasambit tuhoy “sa anak nga sa iya nahamuot [ang iya amay].” (Hulubaton 3:12; 29:17) Sing kaanggid, si Jehova nga Dios nakatigayon sing kalipay sa Israel sang nangin matutom ang iya katawhan. (Salmo 44:⁠3; 119:108; 147:11) Nagatigayon man sia sing kalipay sa katutom sang mga mainunungon sa iya tubtob sa aton panahon.​​—⁠Hulubaton 12:22; Hebreo 10:38.

Gani, nagakaigo lang nga luyag sang Dios nga makatigayon sing kalipay ang iya masigkamanugpangabudlay, si Jesus, gikan sa mga hinimuan niya. Sa katunayan, ang Hulubaton 8:31 nagasiling nga ang Anak ‘nagakalipay sa mabungahon nga duta sang iya duta, kag ang mga butang nga iya nahamut-an yara sa mga anak sang tawo.’ Sa amo sini nga kahulugan nga ang Colosas 1:16 nagasiling: “Ang tanan iban pa nga mga butang gintuga paagi sa iya kag tungod sa iya.”