1. Ano nga mga kahimtangan ang naeksperiensiahan sang mga Cristiano sang unang siglo?

SANG mga 62 asta 64 C.E., nagsulat si apostol Pedro sa “umalagi nga mga pumuluyo nga nagalinapta sa Ponto, Galacia, Capadocia, Asia, kag Bitinia.” (1 Ped. 1:1) Dapat palig-unon kag hatagan sing panuytoy ining mga kauturan sa nagkalainlain nga mga lugar kay ginahingabot sila kag ginapakalain. Nagaeksperiensia sila sang “nagahingalayo nga mga pagtilaw.” Kag nagakabuhi sila sa makahalanguyos nga tion. “Ang katapusan sang tanan nga butang malapit na,” sulat ni Pedro. Huo, indi na maglab-ot sa napulo ka tuig kag malaglag na ang Jerusalem. Ano ang makabulig sa mga Cristiano bisan diin nga maatubang ining mabudlay nga mga kahimtangan?—1 Ped. 4:4, 7, 12.

2, 3. Ngaa ginpalig-on ni Pedro ang iya mga kauturan nga magmaabiabihon? (Tan-awa ang piktyur sa umpisa sini nga artikulo.)

² Ginpalig-on man ni Pedro ang iya mga kauturan: “Mangin maabiabihon kamo sa isa kag isa.” (1 Ped. 4:9) Sa Griego, ang tinaga nga “pagkamaabiabihon” nagakahulugan sing “kahamuot, ukon kaayo, sa mga dumuluong.” Pero ginpalig-on ni Pedro ang iya mga kauturan nga mangin maabiabihon “sa isa kag isa,” bisan pa nga nagakilalahay na sila kag nagaupdanay. Ngaa dapat sila mangin maabiabihon?

 ³ Ang pagkamaabiabihon magapasuod pa gid sa ila. Talupangda ang imo eksperiensia. May nag-agda na bala sa imo sa ila puluy-an? Nalipay ka bala kon madumduman mo ini? Kag kon may gin-agda ka nga utod sa inyo puluy-an, indi bala nga nagasuod ka pa gid sa iya? Mas mahapos nga makilala naton ang aton mga kauturan kon mangin maabiabihon kita sa ila. Ang mga Cristiano sang tion ni Pedro dapat mangin suod pa gid sa isa kag isa kay nagalain ang mga kahimtangan sa ila palibot. Amo man sini ang kahimtangan sang mga Cristiano sining “katapusan nga mga adlaw.”—2 Tim. 3:1.

4. Ano nga mga pamangkot ang binagbinagon naton sa sini nga artikulo?

⁴ Ano nga mga kahigayunan nga mapakita naton ang pagkamaabiabihon “sa isa kag isa”? Ano ang mga kabangdanan nga mahimo nabudlayan kita sa pagpakita sang pagkamaabiabihon? Paano kita mangin maayo nga bisita?

5. Paano kita mangin maabiabihon sa aton mga miting?

⁵ Sa mga miting: Ginaabiabi naton ang tanan nga nagatambong sa aton mga miting kay kita tanan mga bisita. Si Jehova kag ang iya organisasyon amo ang nag-agda sa aton. (Roma 15:7) Kon magtambong ang mga bag-uhan, ginatinguhaan naton nga mapahamtang ang ila buot. Dapat abiabihon naton sila, bisan ano man ang ila pamayo ukon pamustura. (Sant. 2:1-4) Kon may bisita nga wala pa maatipan, puede mo bala sia maagda nga magtupad sa imo? Mahimo nga malipay sia kon buligan mo para mahangpan niya ang programa kag mapangita ang mga teksto nga ginabasa. Isa ini ka maayo nga paagi nga “mangin maabiabihon.”—Roma 12:13.

6. Sin-o gid ang dapat naton abiabihon?

⁶ Pag-agda nga magpamahaw ukon magkaon: Ang mga tawo sadto sa tion sang Biblia masami nga nagapakita sing pagkamaabiabihon sa ila bisita paagi sa pagpakaon sa ila. (Gen. 18:1-8; Huk. 13:15; Luc. 24:28-30) Ang pag-agda nga magkaon nagapahangop nga gusto nila nga mangin abyan ang ila bisita. Sin-o gid ang dapat naton abiabihon? Amo yadtong pirme naton maupod, ang mga kauturan sa aton kongregasyon. Kon mangin mabudlay ang kahimtangan, sila ang aton masaligan. Mangin matuod naton sila nga abyan. Sang 2011, ginsaylo sang Nagadumala nga Hubon ang Pagtinuon sa Ang Lalantawan sang pamilya Bethel sa Estados Unidos halin sa alas 6:45 sang gab-i pakadto sa alas 6:15 sang gab-i. Ngaa? Suno sa pahibalo, mahimo mas mahapos nga magpakita sing pagkamaabiabihon ang masigka-Bethelite kon temprano matapos ang miting. Gin-ilog man ini sang iban nga sanga talatapan. Nagsuod pa gid ang pamilya Bethel bangod sini nga kahimusan.

7, 8. Paano naton mapakita ang pagkamaabiabihon sa mga nagaduaw nga representante sang organisasyon ni Jehova?

⁷ Mapakita naton ang pagkamaabiabihon kon may magduaw nga mga humalambal halin sa iban nga kongregasyon, mga manugtatap sang sirkito, kag kon kaisa, mga representante halin sa sanga talatapan. (Basaha ang 3 Juan 5-8.) Mahimo agdahon naton sila nga magpamahaw ukon magkaon.

⁸ Ang isa ka utod sa Estados Unidos naghinumdom: “Pila na ka tuig nga ginaabiabi namon sang akon bana ang madamo nga humalambal pati ang ila asawa. Makalilipay gid ang kada higayon kag makapalig-on. Wala gid kami maghinulsol.”

9, 10. (a) Sin-o ang mahimo nagakinahanglan sing dalayunan? (b) Ano ang mabulig bisan sang mga may gamay lang nga puluy-an? Iilustrar.

⁹ Mga nagakinahanglan sing dalayunan: Ang pagkamaabiabihon sadto nagalakip sa pagpadayon sa masaligan nga mga bisita.  (Job 31:32; Filem. 22) Sa karon, dapat man naton ini himuon. Masami nga ang mga manugtatap sang sirkito dapat may madayunan kon magduaw sila sa mga kongregasyon. Ang mga estudyante sa teokratiko nga mga eskwelahan mahimo nagakinahanglan sing dalayunan, kag subong man ang mga boluntaryo sa pagpanukod. Ang mga kalamidad mahimo magguba sang balay sang pila ka pamilya amo nga dapat may ilistaran anay sila asta makay-o ang ila puluy-an. Indi lang kita magsalig pirme sa mga may dalagku nga balay nga amo ang magbulig; basi pila na ka beses nga nahimo nila ini. Puede ka bala makapadayon bisan gamay lang ang imo puluy-an?

¹⁰ Nadumduman sang isa ka utod sa South Korea ang pagpadayon niya sa iya puluy-an sang mga estudyante sa teokratiko nga mga eskwelahan. Nagsulat sia: “Sang primero nagapangalag-ag ako kay bag-o lang kami makasal kag gamay ang amon balay. Pero makalilipay gid nga magpadayon sang mga estudyante. Bag-o lang kami nakasal, kag nakita namon kon daw ano ang kalipay sang mag-asawa kon mag-alagad sila kay Jehova kag ginatinguhaan nila nga matigayon ang pila ka pribilehiyo.”

11. Ngaa dapat abiabihon ang mga bag-uhan sa inyo kongregasyon?

¹¹ Mga bag-uhan sa kongregasyon: Mahimo magsaylo sa inyo lugar ang mga indibiduwal ukon ang mga pamilya. Ang pila mahimo mag-alagad sa lugar nga kinahanglan ang dugang nga manugbantala. Mahimo ipadala ang mga payunir para buligan ang inyo kongregasyon. Tanan sila mahimo mamag-uhan. Dapat sila magpasibu sa bag-o nga lugar, bag-o nga kongregasyon, ukon mahimo sa bag-o pa gani nga lenguahe ukon kultura. Kon pamahawan naton sila, pakan-on, ukon iupod sa paglingawlingaw, mahimo makabulig ini sa ila nga makakita sing bag-o nga mga abyan kag makapasibu sa ila bag-o nga kahimtangan.

12. Ano nga eksperiensia ang nagapakita nga indi kinahanglan nga maghanda sing madamo kon nagaabiabi?

¹² Indi kinahanglan nga maghanda sing madamo kon nagaabiabi. (Basaha ang Lucas 10:41, 42.) Nadumduman sang isa ka utod ang natabo sang bag-o pa lang sia nga misyonero: “Bataon pa kami sadto, bag-uhan, kag namingawan. Isa ka gab-i, puerte gid ang kamingaw sang akon asawa, kag indi ko na sia mauloulohan. Sang mga alas 7:30 na sang gab-i, may nanuktok sa amon puertahan. Estudyante sia sang Biblia kag may dala sia nga tatlo ka kahil. Nagkadto sia sa amon para abiabihon kami nga bag-o nga mga misyonero. Ginpasulod namon sia kag ginpainom sing tubig. Nagtimpla dayon kami sing kape kag tsokolate. Wala pa kami sing namang-an sa Swahili, kag indi man sia makahangop sang Ingles. Pero diri nagsugod ang daku gid namon nga kalipay sa pagpakig-abyan sa mga kauturan sa sini nga duog.”

13. Ano ang pila ka benepisyo sang pagkamaabiabihon?

¹³ Nagapangalag-ag ka bala nga magmaabiabihon? Kon amo, madula mo ang kahigayunan nga makatigayon sing makalilipay nga pag-inupdanay kag pag-abyanay. Ang pagkamaabiabihon amo ang isa sang pinakamaayo nga pangontra sa kasubo. Pero mahimo mamangkot ka, ‘Ngaa ang pila nagapangalag-ag nga ipakita ini?’ May pila ka rason.

14. Ano ang aton himuon kon kulang kita sing tion kag kusog nga batunon ukon ipakita ang pagkamaabiabihon?

¹⁴ Tion kag kusog: Masako gid ang mga alagad ni Jehova kag pirme sila madamo sing responsibilidad. Ang pila nagahunahuna nga kulang sila sing tion ukon kusog para abiabihon ang iban. Kon amo sini, puede mo binagbinagon ang imo iskedyul subong.  Puede mo bala ini pasibuon para may tion ka kag kusog nga batunon ukon ipakita ang pagkamaabiabihon? Ang Kasulatan nagapalig-on sa mga Cristiano nga dapat mangin maabiabihon. (Heb. 13:2) Maayo gid ini nga kinaiya. Pero para mahimo mo ini, basi dapat buhinan mo ang indi tanto ka importante nga mga hilikuton.

15. Ngaa ang pila nabudlayan mag-abiabi sa iban?

¹⁵ Ang pagtamod mo sa imo kaugalingon: Gusto mo bala mag-abiabi pero daw indi mo ini masarangan? Ang pila mahuluy-on kag nahadlok nga basi matak-an ang ila mga bisita. Ang iban kulang sing badyet kag nagakabalaka nga indi sila makaamuma pareho sa ginahimo sang iban nga kauturan. Pero indi dapat nga matahom gid ang imo balay kundi bastante na nga mahipid ini, matinlo, kag mainabyanon ka.

16, 17. Ano ang maayo nga himuon kon nabalaka ka nga may mga bisita?

¹⁶ Indi lang ikaw ang nabudlayan kon may mga bisita. Ang isa ka gulang sa Britanya nagsiling: “Medyo ginakulbaan ka gid man kon nagapaabot sang mga bisita. Pero basta parte sa pag-alagad kay Jehova, balewala ang bisan ano nga kabalaka kon ikumparar sa mga kaayuhan nga matigayon sang isa. Nanamian ako magpangape upod sa mga bisita kag istoryahon sila.” Makabulig man kon tinguhaan naton ang kaayuhan sang mga bisita. (Fil. 2:4) Nalipay ang kalabanan nga isugid ang ila mga eksperiensia. Kag ang pinakamaayo nga tion nga mabatian naton ini amo kon nagainupdanay kita. Ang isa pa ka gulang nagsulat: “Nakilala ko pa gid ang mga kauturan kon magkadto sila sa amon balay, ilabi na kon isugid nila kon paano sila nangin Saksi.” Ang pagpakita sing kaayo sa ila nagaresulta sa kalipay.

¹⁷ Ang isa ka payunir nga nagpadayon sa ila balay sang mga estudyante sa pila ka teokratikong eskwelahan nagsiling: “Nabalaka ako sang primero kay simple lang ang amon balay kag daan na ang mga kagamitan. Pero napahamtang ang akon buot sa ginhambal sang asawa sang isa sa mga instruktor. Nagsiling sia nga sang yara sila sa nagalakbay nga pag-alagad, ang pinakamaayo nga pagduaw nila amo ang pagtener sa mga utod nga medyo kulang sa materyal pero hamtong sa espirituwal. Nalipay sila kay pareho ang ila tulumuron nga alagaron si Jehova kag magkabuhi sing simple. Nadumduman ko ang ginsiling sadto ni Nanay sang bata pa kami: ‘Mas maayo nga utan lang ang ginakaon apang nagahigugmaanay.’” (Hulu. 15:17) Indi ka dapat mabalaka nga mag-abiabi kon ginahimo mo ini bangod sang gugma.

18, 19. Paano madula sang pagkamaabiabihon ang kalain sang aton buot sa iban?

¹⁸ Ang imo pagtamod sa iban: May mga utod bala nga nagapalain sang imo buot? Mahimo mabudlayan ka sa pagdula sini nga balatyagon sa ulihi kon pabay-an mo lang ini. Basi indi mo gusto agdahon ang isa sa inyo balay kay wala ka nanamian sa iya. Ukon basi may nalainan ka sang buot sadto, kag nabudlayan ka nga kalimtan ini.

¹⁹ Ang Biblia nagasiling nga mangin maayo ang imo kaangtanan sa iban, bisan sa imo mga kaaway, kon mangin maabiabihon ka. (Basaha ang Hulubaton 25:21, 22.) Ang pag-agda sa isa sa imo puluy-an mahimo makadula sang imo kalain sang buot kag magaresulta ini sang pag-abyanay. Mahimo matalupangdan mo ang maayo nga mga kinaiya sang imo bisita pareho sang nakita ni Jehova sang ginbuyok niya sia sa kamatuoran. (Juan 6:44) Kon wala ginapaabot sang isa nga agdahon mo sia bangod sang gugma, mahimo nga magabag-o na ang inyo kaangtanan. Paano mo mahibaluan nga gugma ang nagpahulag sa imo nga himuon ini? Ang isa ka paagi amo ang pagsunod sa laygay  sang Filipos 2:3: “Mapainubuson nga kabiga ang iban nga labaw sa inyo.” Dapat binagbinagon naton kon paano ang aton mga kauturan labaw sa aton. Mahimo nga makatuon kita sa ila pagtuo, pagbatas, kaisog, ukon iban pa nga kinaiya. Ang paghunahuna sining maayo nila nga mga kinaiya magapabakod sang aton gugma sa ila kag magapahapos sa aton nga pakitaan sila sing pagkamaabiabihon.

20. Ngaa dapat gid naton kadtuan ang ginbaton naton nga pangagda?

²⁰ Si salmista David namangkot: “O Jehova, sin-o ang makaduaw sa imo tolda?” (Sal. 15:1) Pagkatapos sini nga pamangkot, ginbinagbinag niya ang mga kinaiya nga gusto sang Dios sa iya mga bisita. Ang isa sini amo ang pagkamasaligan: “Ginatuman niya ang iya saad, bisan pa mabudlay ini tumanon.” (Sal. 15:4) Kon may ginbaton kita nga imbitasyon, dapat kadtuan naton ini magluwas lang kon may indi mapaiway nga kabangdanan. Mahimo naghanda na ang nag-agda sa aton, kag kanugon lang sang iya ginhanda kon indi kita magkadto. (Mat. 5:37) May pila kon kaisa nga nagkanselar sang isa ka imbitasyon kay nagkadto sila sa mas maayo nga okasyon. Mahigugmaon bala ini kag matinahuron? Dapat naton batunon kag pasalamatan ang bisan ano nga ginhanda sa aton sang mga nag-agda sa aton. (Luc. 10:7) Kag kon dapat gid nga ikanselar naton ini, maayo gid nga pahibaluon naton sing temprano ang mga nag-agda sa aton.

21. Paano makabulig ang pagtahod sa lokal nga kustombre para mangin maayo kita nga bisita?

²¹ Importante man nga tahuron naton ang lokal nga mga kustombre. Sa pila ka kultura, ginaabiabi ang wala ginapaabot nga mga bisita; sa iban, dapat anay abanse nga magpahibalo. Sa pila ka duog, ginapakaon sa mga bisita ang pinakamaayo; sa iban naman, palareho lang ang ginakaon sang tanan. Sa iban nga duog, nagadala sing pagkaon ang mga bisita; sa iban naman, wala ginapaabot nga magdala sila. Kag sa pila ka kultura, ginapangindian ang una ukon ikaduha nga imbitasyon; sa iban naman, masunggod ang tagbalay kon indi dayon pagbatunon ang una nga imbitasyon. Dapat himuon naton ang aton bug-os nga masarangan para mangin malipayon ang mga nag-agda sa aton.

22. Ngaa dapat ‘mangin maabiabihon sa isa kag isa’?

²² Maathag na gid nga “ang katapusan sang tanan nga butang malapit na.” (1 Ped. 4:7) Ginapaabot naton ang dakung kapipit-an nga wala pa maeksperiensiahan sang kalibutan. Samtang nagalain pa ang kahimtangan, dapat nga mangin suod pa gid kita sa aton mga kauturan. Ang laygay ni Pedro nagakaigo gid sa mga Cristiano: “Mangin maabiabihon kamo sa isa kag isa.” Isa ini ka makalilipay nga kinaiya nga dapat gid naton ipakita indi lang subong kundi sing dayon.—1 Ped. 4:9.